Read Ntcham Ezéchiel 16 Bible Online

Ezéchiel 16 - Ntcham bible

Ezéchiel 16

²«Nisaaleen, dàkà Jeerusaleem tiŋki ntimbiil tuuŋŋi ŋin kì ŋée.

³Á tùkù-kì yii: <Ni-Dindaan Unimbɔti nín bíi sòoǹ nì Jeerusaleem puee sɔ̀. Kanaan sá a-naanjab tiŋki ní. Niin ní bi màl̄-si. A-baa sá uamɔɔrja ní a-na sá ueetinimpu.

⁴Daliŋkin bi màl̄-see, ubɔ kaa nìn gíí a-puluuŋmiiŋu. Baa nìn fùl̄-si nnyim kí ŋá-si circir. Baa nìn dū ŋyaam ki ŋmītì-si[10], ní kaa nìn tí dū sata ki bīiǹ-si.

⁵Ubɔ kaa nìn súń a-saai àá ki dàkā-si kulaŋŋaŋfitiiu kí ŋá-si tíǹ gbanti kɔkɔ. Ama bi nín màl̄-see, bi dū-si ki bíl̀ kitiŋ ní, di sá yii baa nìn là bi-nimbil ń wāl̀-si.

⁶M nín jítì a-ceeyee, m ká yii a dɔ̄ a-fatikuun. A nín dɔ̄ a-fatikuun mimmee ní m bí-si yii á nīn bí dimaŋfalin, ní ki būsì ki lī yii á nīn bí dimaŋfalin.

⁷M yāntì a wíiǹ kii kusaaun subuee ní. A wíiǹ ki cíkitì ní ki kpántì usapɔnnyaan. A nìn nyáń abii ki túkú tikuti. Ama a nìn pée bí dicancaŋgbeel ní.

⁸Míǹ boonee ní m gíti tí jítì a-cee ní ki ká yii a cíkitì ki bàn̄ dicamɔndi. Niinee ní m dū m-bɔkutikpaandi ki bīiǹ a-cancaŋgbeel pu. M nìn pūtì yii m làá nīn yú nì si deedee ní man nì si ŋá mpèé. Niinee ní a kpántì m-yɔu>. Man ni-Dindaan Unimbɔti di lī míǹ.

⁹«Niinee ní m yōoǹ nnyim ki fíntì fatiku un bí a-puee ní ki dū ŋkpam min sɔ́fèe ki ŋmītì-si.

¹⁰M nìn dū tiwampeeŋkaal tin bi gbáńee nì igban imɔnti naatakaŋ nì dambalamɔnti nì ŋŋaamɔnti bɔkutikpaandi ki tīī-si.

¹¹M nìn dū tinyɔkɔntikaal ki nyɔ̄kɔntì-si, ki nìn dū dibɔmbil ki fúuń a-ŋal ní ki dū tiléeŋkaal ki léeǹ-si.

¹²M nìn dū kibɔmbiki ki túuń a-maŋfal ní ki dū falfatib ki túuń a-tafaliŋ ní ki dū kibeefuulii kinyannyaaŋŋi ki cíkiǹ-si.

¹³A-wannyɔkɔntikaati nìn sá sindaariya nì animbil ní, ní a-wampeeŋkaati sá ŋŋaapiin ní bi dū gulfamɔnti ki gbáń. Ŋyimmɔntiim nì tisiil nì ɔliifi kpam ní a nìn jīǹ. Niinee ní a dūu kpántì usapɔnnyaan ki bàn̄ kí nīn sá ubeenimpu.

¹⁴A-nyaaŋku puee, a-yindi nìn gbītì ki bàn̄ atimbun kɔkɔn, di sá yii m nín nyɔ̄kɔntì-si puee, a lafun kpántì unyannyaan. Man a-Dindaan Unimbɔti di sòon̄ míǹ.»

¹⁵«Ama a dū a-mákal ki páaǹ a-nyaaŋku pu. A-yindi nín gbītì an kɔkɔ puee, a dūu kpántì kilaakpaai. A dōoǹ nì bisanjitiliibi kɔkɔ ní ki dūu kpántì bi-wanti.

¹⁶A lēē a-wampeeŋkaati tin cáá inyiŋfi tikpilee ki dūu nyɔ̄kɔntì a-waatootipaaŋyi ki ŋá niin a-laakpaatuuŋŋi. Ubɔ kaa nìn pée ŋá míǹ ki ká, ní kaa ti làá ŋá míǹ mun jaanjaan.

¹⁷A dū sindaariya nì animbil wannyɔkɔntikaati tin m tīī-see ki dūu mɔ́ɔ́ iwaajaa, ní ki dōoǹ nì i ki ŋá tilaakpaal.

¹⁸A dū a-wampeeŋkaati tin bi gbáńee ki bīiǹ bi-pu, ní ki dū ŋkpam nì talaalub bin m tīī-see ki ŋá saraa ki tīī-bi.

¹⁹Kí fáatíǹ-bee, a dū tijin tin kɔkɔ m nìn tīī-see ki ŋá-bi saraa, ŋyimmɔntiim nì ŋkpam nì tisiil. Kpèè tin ní a ŋée dee, man a-Dindaan Unimbɔti di sòon̄ míǹ.

²⁰Jeerusaleem, a dū a-jipɔmbi nì a-bisalib bin a màl̄-mee ki ŋá saraa ki tīī awaa gbanti an kpántì ŋi-jinti. A-laakpaatuuŋŋi ŋin a ŋáańee kaa bàn̄-see,

²¹see a nín lāntì m-jipɔmbi ki dūu ŋá saraa ki tīī a-waaŋee!

²²Ŋyunti ŋun a nìn bíi ŋáań ntimbiil nì alaakpaatuun gbantee, aa dākafì ki téetì a-sapɔnti yuntiŋu, ŋyunti ŋun ní a nìn bí dicancaŋgbeel ki dēē a-fatikuunee.

²³«A nín ŋá atuŋkpiti gbanti kɔkɔ ki dóòyee, nnaabu di dɔ̄ ki cí-si, man a-Dindaan Unimbɔti di sòon̄ míǹ.

²⁴Nì míǹ kɔkɔee, a gbíntìi nìkì ki māā akumpoo nì isaraafan ipaan kɔkɔ pu.

²⁵A máń dikumpool disaŋkaŋkpil kamaa pu ní ki dū a-nyaaŋku ki ŋá ntimbiil tuuŋŋi. A dū a-ba ki tīī usanjitil kamaa ní ki mɔ̄tìi būtì a-laakpaati.

²⁶A kpáfì nì Eejipiti yab, a-kɔŋkɔnnaatɔb bin cáá ŋgbannyaanee ki ŋá tilaakpaal, ní ki gíti ŋá tin jítì mimmee ki gbítì m-ŋuul.

²⁷Niinee ní m dàkā-si m-pɔŋŋu. M fōō tin a cááyee dijandi diba ní ki dū-si ki líiǹ a-nannanliibi, Fiiliistii yab timmu mun a-laakpaabimbim nìn kɔ̄ntí icooyee.

²⁸Ama an kaa bàn̄-see ní a cūtìi bíi ŋáań tilaakpaal nì Asuur yab. Nì míǹ kɔkɔee, an kaa yá ki kɔ́-si.

²⁹A gíti ŋá alaakpaatuun tikpil nì Babiloon yab, binyampoobi tiŋkin, ama an kaa túń-si ditundi.

³⁰Ama a-mul kaa bōotí mmɔ́ɔneeee! Man a-Dindaan Unimbɔti di sòon̄ míǹ. A nín nìn ŋáań tíǹ gbanti kɔkɔee, a náań nì kinimpulaakpaai páaa ní.

³¹A máń akumpoo disaŋkaŋkpil kamaa pu. A máń iwaatootipaan an kɔkɔ pu. Ama aa fōō animbil kii bilaakpaadambi bin kíǹee nín ŋáań puee!

³²A bí kii unimpu un néeń binicambi ki jítiǹ u-calee ní.

³³Nnimpulaakpaamu kɔkɔ fòol̄ a-nimbil ní, ama siiyee, a pūǹ a-bɔmbi tiwan ní ki pà-bi bí nīn nyēeń an kɔkɔ pu ki dòoń ki dɔ̀ nì si.

³⁴A-laakpaatuuŋŋi poonee, sii kaa ŋáań kii nlaakpaadamu mun kíǹee nín ŋáań puee. Baa nyàab̀-si, kaa pà-si, ama sii di pà-bi. Sii kaa ŋáań kii bin kíǹee nín ŋáań puee.

³⁵«Too, Jeerusaleem kilaakpaai, pīlifì ti-Dindaan nyɔɔbundi.

³⁶Pīlifì tin man a-Dindaan Unimbɔti bíi sòoǹee. A dū a-cancaŋgbeel ki páaǹ mpaampiin pu ki yāntì a-wunti ncal ŋyunti ŋun ní a bíi ŋáań tilaakpaal nì a-bɔmbi, a-timbiiliŋu waaŋee. A dū a-jipɔmbi ki ŋá saraa ki tīī a-waaŋi ki kpáatì bi-fatikuu ki fá.

³⁷An pu ní m làá kóoǹ a-bɔmbi bin nìn tìì-si mmɔnee kɔkɔ kí kpāfì, bin a nìn néeńee nì bin bɔti kaa nìn mɔ̄ǹ-see. M làá kóoǹ-bi an kɔkɔ pú kí kpāfì a-cee ní kí pèetī-si ní bí wāl̀ a-cancaŋgbeel.

³⁸Binimpoobi bin ŋáań tilaakpaal nì bin kù binibee tafadaaldi ní m làá dūú dáaĺ a-tafal. M-ŋuul nì m-poompooŋyi poonee, m làá dū ŋkúm ní kí dáaĺ a-tafal.

³⁹M làá dū-si kí líiǹ a-bɔmbi. Bi làá gbá kí wìil̀ a-kumpooŋi ní kí bīil̀ a-waatootipaaŋyi. Bi làá cúú a-wampeeŋkaati kí pèetī ní kí gbākal̀-si a-wannyɔkɔntikaati tinyaandee kɔkɔ ní kí yàntī-si dicancaŋgbeel.

⁴⁰Míǹ boonee ní bí lùkutī diniwul kí tɔ̄ a-pu. Bi làá yāŋkì-si ataŋkpee kí kpɔ̀ ní kí dū ntàataajimu kí tɔ̀ntī-si,

⁴¹ní kí wà a-diiŋŋi ŋŋmi. Bi làá dáaĺ a-tafal min máaǹee kunimpupaau nimbiin. M làá kúntí a-laakpaatuuŋŋi ní aa ti làá ŋmā kí pà a-bɔmbi.

⁴²M làá yàntī m-ŋuul ń tɔ̄ a-pu di-tundi kí cáá kátí. Míǹ boonee ní m-ŋuul ń páatí a-pu ní m-pɔbil ń sɔ̀ŋkì, ní maa ti làá gíí diŋuul.

⁴³Aa ti téetí tin ní m ŋá ki tīī-si doooo a-sapɔnti yuntiŋuee ní ki dū a-tuuŋŋi ki gbítì a-ŋuul. Too, ma muee, m làá pà a-bimbim paati. Man a-Dindaan Unimbɔti di sòon̄ míǹ. Di sá yii a ŋá icoo tuuŋŋi ki kútì ntimbiil tuuŋŋi ŋin kɔkɔ a ŋá nì awaayee pu.

⁴⁴«Jeerusaleem, bilaŋgaaliibi làá gāā-si nlan yii: <Unaati nín bí puee, míǹ ní u-bisal mun bí>.

⁴⁵Ibaamɔn poonee, a lafun sá a-na bisal, unimpu un di nìn ná u-cal nì u-biyaamuee. A pée bí kii a-naalib bin di nìn ná bi-calib nì bi-biyaamuee ní. Ni-na nìn sá ueetinimpu ní, ní ni-baa sá uamɔɔrja.

⁴⁶A-maan di sá Samaarii ŋgan pú tiŋki ki kpáaǹ ntimbilimu mun māntìi tú-kèe. A-naal di sá Soodoom ŋgiil pú tiŋki nì ntimbilimu mun māntìi tú-kèe.

⁴⁷An kaa sá bi-bimbim nì bi-timbiilituuŋŋi ŋmaniŋma ní a fōō, ama a gíti ŋá tin jítiǹ mimmee!

⁴⁸Man a-Dindaan Unimbɔti nín bí dimaŋfalin nee, a-naal Soodoom nì ntimbilimu mun māntìi tú-kèe kaa pée ŋá ikpiti kii sii nì ntimbilimu mun māntìi tú-see nín ŋá puee.

⁴⁹Soodoom nì ntimu mun māntìi tú-kèe yìntitam sɔ̀. Mu nìn cáá dilambil, ki nìn jīǹ ki lákatí mu-ba pu ní ki nìn bí ŋgbansɔŋfin kaa dàkafī tiba pu. Muaa nìn jōō bisoodambi nì binandambi.

⁵⁰Mu nìn yòontí mu-ba yilpu ní ki nìn ŋá ntimbiil tuuŋŋi. Niinee ní m kúntì-mu kitiŋ pu kii a nín nyí puee.

⁵¹Samaarii tiŋki kíǹ kaa ŋá ikpiti in a ŋá nee dijandi gba! A ŋá ntimbiil tuuŋŋi tikpil ki jítiǹ-kì. Bi yaa dū a-maan Samaarii nì a-naal Soodoom ki ŋmāntiǹ siiyee, bíǹ sá deedeedambi ní!

⁵²Too, kɔŋkɔnnee, an kíǹ á túń a nín fá a-jilmau puee cooi dee. A tīī a-naal nì a-maan ibaamɔn, di sá yii ikpiti in a ŋée nyāŋkì ki jítì bi-yai, ní ki yāntì bi kpántì deedeedambi ki jítiǹ-si. Icoo ń nīn cáá-si ní á jī falaa a nín fá a-jilmauee pu.

⁵³M làá yàntī ntimu gbanti ń fàtīí gítí kii mu nín nìn bí puee. M làá yàntī an fàtīí bútí Soodoom nì ntimbilimu mun māntìi tú-kèe nì Samaarii nì ntimbilimu mun māntìi tú-kèe. Míǹ boonee ní ḿ dāá yàntī án bútí si mun.

⁵⁴An yaa ŋá mimmee, icoo làá cúú-si ní á fá a-jilmau tin kɔkɔ a ŋée pu. An di làá ŋméeǹ-mu.

⁵⁵Án làá fàtīí bútí Soodoom nì Samaarii nì ntimbilimu mun māntìi tú-muee. Án làá fàtīí bútí si mun nì ntimbilimu mun māntìi tú-see.

⁵⁶Ŋyunti ŋun a nìn cáá dilambilee, a nìn kpèé a-naal Soodoom fám ní.

⁵⁷An sá ŋyunti ŋun ní a-kpitii nìn dáá bí dibalinee ní. Sii mun yuntiŋu bāań Eedoom timmu nì ntimu mun māntìi tú-muee ń bèel̀-si dee. Fiiliistii yab timmu làá kpèè-si fám ijaan kɔkɔ pu.

⁵⁸Icoo nì ntimbiil tuuŋŋi ŋin a ŋée paati dee. Man a-Dindaan di sòon̄ míǹ.

⁵⁹«Man a-Dindaan Unimbɔti nín sòon̄ puee sɔ̀. A kpēē dipùtil din a pūtèe fám ki kpītì mpèé ŋun bí man nì si kansikinee. Míǹ puee, a nín ŋá-mi puee, míǹ ní m làá ŋá-si.

⁶⁰Ama mamee, maa làá súntí dipoondi din ní m pōoǹ-si a-sapɔnti yuntiŋuee. M làá yàntī dipoondi gbanti ń kpántí talku poondi.

⁶¹A làá dāá téetí a-bimbim pu ní icoo ń cúú-si ŋyunti ŋun ní a yaa láa fōō a-mambi nì a-naalib a-ceeyee. M làá dāá dū-bi kí ŋá a-taapu bí kpántí kii a-bisalibee, min kamaa an kaa bí dipoondi din m pōoǹ-see poonee.

⁶²M làá fàtīí pɔ̀ntī dipoondi din ní m pōoǹ-see, niinee a làá béé yii m sá a-Dindaan.

⁶³A làá téetí tin jítèe pu ní icoo ń cúú-si ní a-nyɔkɔ ń kpú, kun puee a fá a-jilmau. Ama mamee, m làá dū tin kɔkɔ a ŋée kí pɔ̄-si.» Man ni-Dindaan Unimbɔti di sòon̄ míǹ.