Read Ntcham Ezéchiel 17 Bible Online

Ezéchiel 17 - Ntcham bible

Ezéchiel 17

¹Ti-Dindaan sòon̄ nì mi yii:

²«Nisaaleen, pɔ́ɔǹ Isirayeel yab ipɔɔn nee kí dū tibɔti nee kí ŋmàntī-bi.

³Tùkù-bi yii man a-Dindaan Unimbɔti di bíi sòoǹ yii: <Ukaaluŋkpaan ubɔ di nìn bí ki cáá ifeeŋkpaan ní u-kuti fɔ̀kɔ̀ ki náaǹ ki cáá inyiŋfi kupaau. U nìn ŋàan̄ ki bāań Leebanɔn jooŋŋi. U nìn yá ki kɔ́fì seedir subu bubɔ yilpu.

⁴U nìn bátì bu-pandi din fɔ̀kɔǹ ŋi-kɔkɔ kíǹee ní ki yōoǹ-dì ki cáa cūnnì binyampoobi tiŋkin ki dū-dì ki bíl̀ bibantiliibi tiŋkin.

⁵Míǹ boonee ní u yōoǹ Isirayeel tiŋkin subu bubɔ ki cáa cóoǹ kitiŋ kin bi yɔ̄kɔtèe ni. U nìn cóoǹ-bu mbun ŋun cáá nnyim tikpilee gbandi, a lì kii busubu bun néeń nnyimee.

⁶Busubuee cɔ́tì ní ki pɔ̄kɔtì ki kpántì bufiinyisubu ki lālim̀. Bu nìn tòó bu-paŋŋi ki cá ukaalunee watil pú ní bu-nyaaŋyi wīintí u-feeŋyi taapu. Busubuee nìn dūu kpántì bufiinyisubu ki cɔ́tì cɔ́tì ní ki tɔ́ tɔ́ mpamu.

⁷Ama ní ukaaluŋkpaan uliliiti ubɔ mun dūu bāań. U-feeŋyi nìn sá ikpaan ní ki cáá tikuti tikpil. Niinee ní bufiinyisubuee tɔ́ bu-nyaaŋyi ki túĺ ukaalunee cee ní ki fātì bu-paŋŋi u-watil pú. Bu nìn dàkafī kí ká u-cee nnyim kí jītíǹ laakin bu cɔ́ee.

⁸Ama bi nìn cóoǹ-bu kitiŋ kin ŋān̄ee poon ní, mbun ŋun cáá nnyim tikpilee gbandi, bú ŋmā kí tɔ̄ apan, kí lòoǹ abil kí kpántí bufiinyisubu bunyaambu.>

⁹«Dū tin man ni-Dindaan Unimbɔti sòon̄ee kí nàatī yii: <Bufiinyisubu gbanti ŋūǹ kí wíiǹaaa? Ukaalumpeekaayee kaa làá cúú bu-nyaaŋyi kí fùkù, kí bīil̀ bu-biliŋ ní kí yàntī bu nín cɔ́tì cɔ́tì pu mpɔminee ń kpāaa? Kí fùkù-buee, an kaa làá bàlifì ú ŋá mpɔn àá ú nyàab̀ binib tikpil.

¹⁰Bi baasii cóoǹ bufiinyisubuee ní, ama bu làá ŋmā kí pɔ̀kɔtāaa? Kubuŋu yaa nyánní ŋwìiń nyalaŋki pú ki jítì bu-puee, buaa làá kpā dicilpu dicilpu niinaaa? Laakin bi cóoǹ-bu bú bàà wíiǹee, niin ní bu làá kpā!>»

¹¹Ti-Dindaan sòon̄ nì mi yii:

¹²«Bàlifì pɔɔgaatib nee yii bi gbìl̄ tibɔŋmantikaal nee taapuɔɔɔ? Tùkù-bi yii Babiloon bɔtiu dɔ́miń Jeerusaleem ki cúú ubɔti nì bitindaŋkpilib ki cūnnì u-tiŋkin.

¹³U nìn yōoǹ ubɔti dicaŋkun niliu ubɔ, ní u nì u ŋá mpèé ní ki yāntì u pūtì yii waa làá nyā mpèéyee boon. U nìn yōoǹ kitiŋee pu bɔtibiliŋ

¹⁴án nín làá ŋá pu kitiŋee ń sìntī ki-ba taapu kí taa ti ŋmā kí yīkì, ní kí nīn tɔ́ mpèéyee deedeeyee.

¹⁵Ama ní ubɔtipɔɔnee yíkìi bíi jáà nì Babiloon bɔtiu. U tú ituun Eejipiti án nín làá ŋá pu Eejipiti ń tīī-u itaamu nì bijanjaliibi tikpilee. Án làá ŋmā kí bútí-uaaa? U nín bíi ŋáań mimmee, u làá ŋmā kí fīī u-baaa? Waa làá ŋmā kí fīī u-ba, di sá yii u nyáń mpèé boon!

¹⁶«Man ni-Dindaan Unimbɔti nín bí dimaŋfalin nee, ubɔti gbanti làá kpú Babiloon bɔtiu un di kāaǹ-u dibeelee tiŋkin ní. Di sá yii u kpēē dipùtil din u pūtèe fám ki nyáń mpèéyee boon. Míǹ puee Babiloon tiŋkin ní u làá kpú.

¹⁷Báà Eejipiti bɔtiu Faaroo yaa cáań bijanjaliibi bin pɔ̄ɔ̄yee tikpil gba, waa làá ŋmā kí mɔ̄tì u-pu, kun puee Babiloon yab làá mā ŋgumu mun boon bi làá nīn bāal̀ee, ní kí gbà ibòó kí pɔ̀fì binib tikpil.

¹⁸U nín kpēē dipùtil din u pūtèe fámee, u nyáń mpèéyee boon dee. U nín ŋá pu ki kíí ki nyīī ŋŋal ní ki ŋá tin bí nee kɔkɔee, waa làá ŋmátí!

¹⁹«Man ni-Dindaan Unimbɔti un bí dimaŋfalin nee nín bíi sòoǹ puee sɔ̀. Isirayeel bɔtiu nín ŋá pu ki nyáń mpèé ŋun ní u nìn pūtì m-nimbiin ki nyīī ŋŋalee boonee, m làá dáaĺ u-tafal.

²⁰M làá píĺ-u kutaliŋŋu ní kí cúú-u. M làá cùnnì-u Babiloon tiŋkin ní kí sòoǹ u-bɔti niin, di sá yii waa yúl̀ nì mi deedee.

²¹Bi làá kpɔ̀ u-janjamɔntiibi kujaaun ní bin kíǹ kaa kpíìyee ń sāǹ kí yàl̄ ijaan kɔkɔ pu. Niinee ni làá béé yii man ni-Dindaan di sòon̄.»

²²«Man ni-Dindaan Unimbɔti nín sòon̄ puee sɔ̀. Man m-ba làá lēē seedir subu yilpu dipampɔmbil din túkú bu-paŋkpaaŋŋi nyɔkɔpuee ní kí cáá cóoń dijoofɔŋfɔkɔl diba yilpu.

²³M làá dū-dì kí cóoń Isirayeel jool din fɔ̀kɔ̀ee yilpu. Di làá wíiǹ kí tɔ̄ apan, kí lòoǹ abil ní kí kpántí buseedirisubu bunyannyaambu. Inoon kɔkɔ nì i-bulifi làá páań i-diiŋi bu-paŋŋi pu, ní kí nīn ŋùŋfī bu-booŋŋu taapu.

²⁴Niinee tisatin sufii kɔkɔ làá béé yii man di sá ni-Dindaan. M gùutī isufi in fɔ̀kɔ̀ee pu ní kí yàntī in kaa fɔ̀kɔ̀ee ń wíiǹ. M làá yàntī isufi in sɔ̀m̀ee ń kpā ní kí tīī in kūńee ŋkpiim. Man ni-Dindaan di sòon̄, ní tin m yaa lēe, m ŋáań míǹ ní.»