Read Ntcham Ezéchiel 18 Bible Online

Ezéchiel 18 - Ntcham bible

Ezéchiel 18

¹Ti-Dindaan sòon̄ nì mi yii:

²«Isirayeel tiŋkinee, ba pu ní bi gà nlan nee yii: <Bibaatiibi ŋmɔ́ ayeeŋgaan, ama ní mbiyaamu nyiŋŋi nyāŋfì ní?>

³Man ni-Dindaan Unimbɔti un bí dimaŋfalin nee di bíi sòoǹ yii, naa ti làá gāā nlan gbanti Isirayeel tiŋkin.

⁴Tiŋman, unil kamaa maŋfal kā man ŋaan ní. Bibaatiibi nì mbiyaamu kɔkɔ maŋfal kā man ŋaan ní. Un yaa ŋá ikpitee, udaan di kúù[11].

⁵«Tí dūú ŋmàntī kii deedeedaan di bí ní ki ŋáań tin kítèe nì tin bí deedeeyee.

⁶Waa jīǹ tiwaajin awaajoon pu, kaa tòotī Isirayeel yab waaŋi. Waa mɔ̀nnì u-juti nimpuu, ní kaa dɔ̀ nì unimpu un bíi fùul̀ ŋkpinee.

⁷Waa mùul̄ u-juti kaa yù u-juti wanti mun. U gīintí u-pɔ̀nliu nín dū tin ki síiǹ u-cee toolimee ki tìì-u. U tìì un ŋkùm cááyee tijin, ki tìì un kaa cáá tiba kí pèen̄ee tiwampeeŋkaal.

⁸Waa pìntí u-nimbiliŋ bí dāá téeǹ-u kí páań àá ki nyàab̀ ipaati[12]. U fàtī u-boon ki tìì tin kaa bí deedeeyee ní ki sòoǹ binib bɔti nì ibaamɔn.

⁹U tɔ́ m-bɔkpaaŋi nì m-marab ní ki nóó ibaamɔn saŋŋu. Too, man ni-Dindaan Unimbɔti di bíi sòoǹ yii an niliuee sá deedeedaan ní ki làá nīn bí dimaŋfalin.

¹⁰«Tí tí dūú ŋmàntī kii an niliuee cáá jipɔɔn ní u-jipɔɔnee fìkì binib wanti ki kù binib ní ki ŋáań atuŋkpiti kɔkɔ nì ŋi-bulifi.

¹¹U-baa kaa pée ŋá míǹ ki ká. U jīǹ tiwaajin awaajoon pu, ki mɔ̀nnì u-juti nimpuu.

¹²U mùul̄ usoodaan nì unandaan, ki yù u-juti wanti, kaa gīintí u-pɔnliibi nín dù tin ki sīintí u-cee toolimee ki tìì-bi. U tòotī awaa ní ki ŋáań ntimbiil tuuŋŋi.

¹³U pìntí u-nimbiliŋ bí dāá téeǹ-u kí páań àá ki nyàab̀ ipaati. An niliu gbanti làá nīn bí dimaŋfalinaaa? Aayee, kpataaa! U ŋá ntimbiil tuuŋŋi nee kɔkɔ, see ú kpú, ní u-kúm kpuulool làá gítí úǹ u-ba pu ní.

¹⁴«Tí tí dūú ŋmàntī kii u cáá jipɔɔn. U-jipɔɔn gbanti ká u-baa tuŋkpitiŋ, ama ní kaa nóó u-tabɔbiliŋ.

¹⁵Waa jīǹ tiwaajin awaajoon pu, kaa tòotī Isirayeel yab waaŋi. Waa mɔ̀nnì u-juti nimpuu kí kɔ́ǹ u-ba tijɔkɔndi.

¹⁶Waa mùul̄ u-juti kaa yù u-juti wanti. U gīintí u-pɔ̀nliu nín dū tin ki síiǹ u-cee toolimee ki tìì-u. U tìì un ŋkùm cááyee tijin nì un kaa cáá tiba kí pèen̄ee tiwampeeŋkaal.

¹⁷U fàtī u-boon ki tìì tin kaa bí deedeeyee ní kaa pìntí u-nimbiliŋ bí dāá téeǹ-u kí páań àá ki nyàab̀ ipaati. U tɔ́ m-bɔkpaaŋi nì m-marab ní ki nóó ibaamɔn saŋŋu. An niliuee kaa làá kpú u-baa kpitii pu. U làá nīn pée bí dimaŋfalin ní.

¹⁸U-baa nín mūul̀ binib, ki yùn̄ u-nabiki wanti ki sāaǹ bin māntìi tú-uee, úǹ di máaǹ kí kpú u-kpitii pu.

¹⁹«Ama ní ni bàlifī yii ba pu ní ujipɔnti kaa máaǹ kí fōō u-baa yìntitam tafadaaldi? Too, kun di yì-tèe di sá yii ujipɔntee ŋá tin bí deedee ki kítèe ní ki tɔ́ m-bɔkpaaŋi kɔkɔ. An puee u làá nīn bí dimaŋfalin.

²⁰Un ŋá ikpitee di kúù. Mbiyaamu kaa cáá kí pà mu-baabi kpitii pɔndi, ní bibaatiibi mun kaa cáá kí pà bi-biyaamu kpitii pɔndi. Bi làá pà deedeedaan u-deedeetuuŋŋi paati ní, ní kí pà unikpiti u-kpitii tuuŋŋi paati.

²¹«Unikpiti yaa gbēeǹ kaa tí bíi ŋáań u-tuŋkpitiŋ ní ki kíǹ ki tɔ́ m-bɔkpaaŋi ki ŋáań tin bí deedee ki kítèe, waa làá kpú, u làá pée ŋmátí ní.

²²Bi làá súntí u-yìntitam kɔkɔ pu, ní ú nīn kíǹ ki bí dimaŋfalin u-deedee tuuŋŋi ŋin u kíǹ ki bíi ŋáańee pu.

²³Ni dàkafī yii an mɔ̄ǹ-mi ḿ ká unikpiti ń kpú níii? Man ni-Dindaan Unimbɔti di bíi tùkù-ni yii kun m lèe di sá unikpiti ń kpántí u-bimbim kí nīn kíǹ ki bí dimaŋfalin.

²⁴Ama deedeedaan yaa gbēeǹ kaa tí bíi ŋáań deedee tuuŋŋi, ní ki kíĺ ki kíǹ ki bíi ŋáań ntimbiil tuuŋŋi ŋin binikpitib ŋáańee, ni dàkafī yii an niliuee làá nīn bí dimaŋfalinaaa? Aayee, kpataaa! Bi làá súntí u-deedee tuuŋŋee kɔkɔ pu. U làá kpú, di sá yii waa yúl̀ deedee ní ki bíi ŋáań ikpiti.

²⁵Ni lì yii: <Ti-Dindaan nín ŋáań puee kaa kítì!> Isirayeel yab, pīlifìmaan-mi tiŋan. Man di ŋáań tin kaa kítèeee? An kaa sá nimbaaa?

²⁶Deedeedaan yaa gbēeǹ kaa tí bíi ŋáań deedee tuuŋŋi ní ki bíi ŋáań ikpitee, see ú kpú. Ikpiti in u bíi ŋáańee pu ní u làá kpú.

²⁷Ama unikpiti yaa fātì u-boon ki tīī u-tuŋkpitiŋ ní ki kíĺ ki bíi ŋáań deedee tuuŋŋi nì tin kítèe, u làá fīī u-maŋfal.

²⁸U yaa dáań ki ká yii u bíi ŋáań atuŋkpiti ní ki fātì u-boon ki tīī-ŋee, u làá nīn bí dimaŋfalin, waa làá kpú.

²⁹Ama ní nimbi Isirayeel yab bí ki lì yii: <Tin ti-Dindaan ŋáańee kaa kítì!> Mimmee man nín ŋáań puee di kaa kítàaa? Nimbi nín ŋáań puee di kaa kítàa!

³⁰An pu ní m làá sòoǹ nimbi Isirayeel niliu kamaa bɔti ubɔ ubɔ kí nóó nì u-tundi, man ni-Dindaan Unimbɔti di sòon̄ míǹ. Kpántímaan mbimbim, kí fàtīmaan ni-boon kí tīī ikpiti in kɔkɔ ni bí ki ŋáańee. Ní taa yàntī ikpiti iba ń kpántí ditaŋkpagbéetikaal kí tīī-ni.

³¹Fámaan atuŋkpiti ŋin ni ŋáańee, kpántímaan ni-pɔbiliŋ nì ni-landɔkɔi. Isirayeel yab, ba pu ní ni là kí kpú ní?

³²Man ni-Dindaan Unimbɔti, m bíi lì yii maa là ubɔ kúm. Fàtīmaan ni-boon kí tīī ikpiti ní kí nīn bí dimaŋfalin!»