Read Ntcham Ezéchiel 19 Bible Online

Ezéchiel 19 - Ntcham bible

Ezéchiel 19

¹Ti-Dindaan bí-mi yii ḿ gāā iyaliŋki laŋŋu nee kí tīī Isirayeel bɔtibiliŋ:

²«Ni-na nìn sá ugbikintinaati ní ki bí gbikintib kansikin. U nìn dɔ̀ agbikintipɔmbil kansikin ní ki kpīintí u-biyaamu.

³U nìn péé u-biki kiba. Kíǹ kpántì digbikintipɔmbilee, ní ki bífì ki kíǹ ki ŋūǹ kí tɔ̀ntī kuwaŋkuluu, ní ki cútì binib ki ŋmɔ́.

⁴Binicambi nìn gbìl̄ u-pu. Bi nìn gbìn̄ mbòó ki sàl̄-u ní ki dū dibɔmbil ki túuń u-maŋfal ki cáá-u ki cūnnì Eejipiti tiŋkin.

⁵Ugbikintinaati kāl̀ ki cíitì ki gīī. Ŋyunti ŋun u ká yii dimákal kaa ti bée, ní u lēē u-biyaamu kansikin kiba. U nìn dū-kì ki kpántì digbikintipɔmbil din cáá mpɔnee.

⁶U nìn kóò gbikintib kansikin ní ki dūu kpántì digbikintipɔmbil. U bífì ki ŋūǹ kí tɔ̀ntī kuwaŋkuluu ní ki cútì binib ki ŋmɔ́.

⁷U nìn gbáń ki wīil̀ bi-gunlɔkɔŋ ní ki nāaǹ bi-timmu. Kitiŋee pu nib yaa nìn gbìl̄ u sūǹee, dinyoondi nìn cútí-bi ní.

⁸Niinee atimbun nib kpáfì kí jáǹ-u, anibul nìn nyánní an kɔkɔ pu. Bi nìn dū kulaaŋŋu ki cúú-u ní ki dū-u ki tɔ́ mbòó poon.

⁹Bi dū dibɔmbil ki lɔ̀kɔ̄-u ní ki dū-u ki tɔ́ dikantandin ki cáá-u ki cūnnì Babiloon bɔtiu cee. Bi nìn dū-u ki tɔ́ sarkan kí taa ti gbìl̄ u-pu yii u gbùkum̄ Isirayeel jooŋŋi pu.»

¹⁰«Ni-na nìn náań nì bufiinyisubu bun bi cóoǹ mbun caŋinee ní. Bu nìn lòoǹ tiŋan ní ki cáá tifaal tikpil, kun puee bu nìn kāntí nnyim tiŋan pu.

¹¹Bu-paŋŋi nìn pɔ̄ɔ̄ tiŋan, ní ki kpántì bibɔtiibi kpandɔŋu. Bu nìn wíiǹ ki fɔ̄kɔǹ ki páaǹ isufi pu. Bu-fɔkɔŋŋu nì bu-paŋŋi puee, báà ŋma nìn wāĺ-bu ní.

¹²Ama ní bi fùkū-bu nì diŋuul poon ki lúkú kitiŋ. Ŋwìiń nyalaŋki pú buŋku yāntì bu-biliŋ kūń ki lítì. Bu-paŋŋi ŋin nìn pɔ̄ɔ̄yee kūń ní ki wùn̄ ŋŋmi.

¹³Kɔŋkɔnnee, bi dū bufiinyisubu ki cóoǹ kuteeun, kitiŋ kin kūń nnyim kpée.

¹⁴Ŋŋmi ŋubɔ nyáń bu-dɔŋu poon, ŋu wùn̄ bu-paŋŋi nì bu-biliŋ. Buaa ti cáá dipandi din pɔ̄ɔ̄ ki ŋūǹ kí kpántí ubɔti kpandɔŋuee.» Bí nīn gà nlan nee kii bi nín gà ŋkpiisilan puee.