Read Ntcham Ezéchiel 2 Bible Online

Ezéchiel 2 - Ntcham bible

Ezéchiel 2

¹U nìn bíi sòoǹee nìn bí-mi yii: «Sii nisaaleen, yīkìí sīĺ ḿ sòoǹ nì si.»

²Ŋyunti ŋun u bíi sòoǹ nì mi mimmee ní Unimbɔti Fam kɔ́ m-ni ní ki yōoǹ-mi ki síiǹ. Niinee ní m pílifì un bíi sòoǹ nì mee.

³U bí-mi yii: «Sii nisaaleen, m làá tɔ̄-si Isirayeel yab cee, bíǹ bin sá pɔɔgaatib ki yíkìi jáń nì mee. Bi pée jáà nì mi kaa gbèentí kii bi-naanjabee ní.

⁴Binib bin yiliŋ pɔ̄ɔ̄ bi-pɔbiliŋ gbìfì gbanti cee ní m bíi tūǹ-si nee. Á tùkù-bi yii: <Ti-Dindaan Unimbɔti nín bíi sòoǹ puee sèé>.

⁵Niinee pɔɔgaatib gbanti yaa pílifiǹ-saaa, bi yaa kaa pílifiǹ-saaa, bi làá béé yii Unimbɔti bɔnaatiliu ubɔ bí bi-kansikin.

⁶«Ama sii nisaaleen, á taa fàŋkì-bi kí taa fàŋkì bi-nyɔɔbuŋŋi. Bi làá kpákáǹ-si. Án làá nīn bí kii ikuŋkum di māntìi tú-si àá a kā inoom puee ní. Taa yàntī bi-nyɔɔbuŋŋi ń fàaǹ-si kí taa fàŋkì bi-nimbiiŋyi, di sá yii bi sá pɔɔgaatib ní.

⁷Bi yaa bíi pílifíǹ-saaa, bi yaa kaa bíi pílifiǹ-saaa, á dū m-nyɔɔbuŋŋi kí tùkù-bi, di sá yii pɔɔgaatib ní bi sá.

⁸«Ama sii nisaaleen, á pīlifì tin m cáá kí tùkù-see, á taa nín̄ sá pɔɔgaati kii bimbee. Wàan̄ a-nyɔkɔ ní kí dū tin m làá tīī-see kí ŋmɔ́.»

⁹Niinee, m bí yii ḿ kpèèyee, ŋŋal ŋubɔ tāntì ki túĺ m-watil pú. Ŋu nìn ŋúb́ kugbɔŋu kubɔ an kpáb́[2].

¹⁰Ŋu cúú kugbɔŋuee ki kpátì. Bi nìn ŋmàn̄ ajanliitil pu. Tin bi nìn ŋmàn̄ kugbɔŋuee poonee nìn sá iyaliŋki nì nsiim nì dinimbinaamandi bɔti ŋma ní.