Read Ntcham Ezéchiel 20 Bible Online

Ezéchiel 20 - Ntcham bible

Ezéchiel 20

¹Bi nín cúú Isirayeel yab ki cūnnì kuyuŋu abin aluli boon, uŋmaŋmooŋmooti iwiin saalaa dalee, ní Isirayeel tindaŋkpilib biba dɔ́miń ki kāl̀ m-nimbiin kí bàlifì kí béé Unimbɔti lammi.

²Niinee ní ti-Dindaan bí-mi yii:

³«Nisaaleen, tùkù Isirayeel tindaŋkpilib yii man bi-Dindaan Unimbɔti nín sòon̄ puee sɔ̀. Kéè ni dɔ́miń kí bàlifì kí béé m-lammi naa! Too, m nín bí dimaŋfalin nee, maa làá yàntī ní bàlifì-mi tiba, man ni-Dindaan Unimbɔti di sòon̄ míǹ.

⁴«Sii un sá nisaaleenee, a bɔ́ntì kí sòoǹ bi-bɔtaaa? Māafì-bi bi-baabi nín túń ntimbiil tuuŋŋi ŋiŋyee.

⁵Á tùkù-bi yii man ni-Dindaan Unimbɔti nín sòon̄ puee sɔ̀. M nín lēē Isirayeelee, m nìn yōoǹ m-ŋal yilpu ki pūtì ki pōoǹ Jaakɔb naantiibi. M nìn yāntì bi béè-mi Eejipiti tiŋkin. M nìn yōoǹ m-ŋal yilpu ki pūtì ki lī yii: <Man di sá ni-Dindaan ni-Nimbɔtiu.>

⁶Ŋwiin gbantee, m nìn yōoǹ m-ŋal yilpu ki pūtì kí nyāntí-bi Eejipiti tiŋkin kí cáá-bi kí kɔ́ǹ kitiŋ kin poon m nyàab̄ kí tīī-bee. Kitiŋ kin di ŋān̄ ki jítiǹ ntimu kɔkɔ nnaabiim nì tisiil còol̀ee[13].

⁷M nìn tīī-bi mara nee yii: <Ni-kɔkɔ ń dū ntimbiil waaŋi ŋin dátí-ni nee kí fá. Ní taa ti tòotī Eejipiti yab waaŋi nee kí kɔ́ǹ ni-ba tijɔkɔndi. Man di sá ni-Dindaan ni-Nimbɔtiu>

⁸«Ama ní bi yíkìi jáń nì mi, ní kaa kíí kí pīlifiǹ-mi. Báà ubɔ kaa dū ntimbiil waaŋi ŋin nìn dátí-bee ki fá. Baa nìn dū Eejipiti waaŋee ki fá. M nìn ká nlandɔkɔ yii m làá kpáatí m-ŋuul kí sìtī bi-pu, kí ŋá kii m nín bí yii m làá ŋá puee kí cáá kátí Eejipiti tiŋkin niin.

⁹Ama man m-ba yindi puee ní maa nìn ŋá míǹ. Maa nìn là yii atimbun ŋin kansikin bi nìn kóòyee nib ń kpèè-mi fám. Di sá yii m nìn lēē m-ba ki dàkā-bi atimbun gbanti nimbiin ní ki pōoǹ yii m làá nyāntí-bi Eejipiti tiŋkin.

¹⁰Niinee ní m nyántìń-bi Eejipiti tiŋkin ki cáá-bi ki cūnnì kuteeun.

¹¹M nìn dàkā-bi m-bɔkpaaŋi nì m-marab bin ní un yaa dūu túń ditundee kāntí dimaŋfalee.

¹²M nìn tīī-bi ŋwiŋŋuŋfikaa án nīn sá kudaaŋŋu kí nīn bí man nì bi kansikin, án nín làá ŋá pu bí béé yii man di sá bi-Dindaan un di ŋáań-bi circiree.

¹³Ama Isirayeel yab nìn yíkìi jáń nì mi kuteeun. Baa nìn ŋúb́ m-bɔkpaaŋi ní ki dū m-marab bin tìì un ŋúb́-bee dimaŋfalee ki fá. Baa nìn tɔ́ ŋwiŋŋuŋfikaa dal. M nìn tí ká nlandɔkɔ yii m làá kpáatí m-ŋuul kí sìtī bi-pu kuteeun niin kí céetí-bi.

¹⁴Ama ní m tí kpēē m-yindi pu, án nín làá ŋá pu atimbun ŋin nib nìn ká m nín nyántìń-bi Eejipiti tiŋkinee ń taa kpèè m-yindi fámee.

¹⁵Ama, kuteeun niinee ní m pūtì yii maa làá cáá-bi kí kɔ́ǹ kitiŋ kin poon m bàà bí yii m làá tīī-bee, kitiŋ kin poon ní nnaabiim nì tisiil còol̀ee.

¹⁶M nìn pūtì kun puee bi nìn dū m-marab nì m-bɔkpaaŋi ki fá ní kaa nìn tɔ́ ŋwiŋŋuŋfikaa dal. Di sá yii bi nìn baasii dū bi-ba ki yá ki nákáǹ bi-waaŋee ní.

¹⁷Ama m nìn súń bi-saai ní kaa kūū ki céetì-bi kuteeun[14].

¹⁸«M nìn tīī bi-biyaamu abɔkpaa nee kuteeun yii: <Ní taa nín̄ nóó abɔkpaa nì marab bin ni-baabi bi-ba mɔ́ɔ́yee. Ní taa tòotī awaa kí kɔ́ǹ ni-ba tijɔkɔndi.

¹⁹Man di sá ni-Dindaan ni-Nimbɔtiu! Ní nīn nóó m-bɔkpaaŋi kí nīn tɔ́ m-marab kí dū-bi kí tɔ̄ ditundi.

²⁰Ní dūmaan ŋwiŋŋuŋfikaa dal kí sú-mi kí dàkà mpèé ŋun di bí man nì ni kansikinee, ní kí téetí yii man di sá ni-Dindaan ni-Nimbɔtiu.>

²¹Ama bíǹ mun yíkì ki jáń nì mi. Baa nìn nóó m-bɔkpaaŋi ní kaa ŋúb́ m-marab bin ní unil máaǹ kí nīn ŋúb́ kí ŋmátée. Baa nìn tɔ́ ŋwiŋŋuŋfikaa. Niinee ní m ká nlandɔkɔ yii m làá kpáatí m-bum kí sìtī bi-pu kuteeun, kí yàntī m-ŋuul ń tɔ̄ di-tundi kí tin cáá kátí.

²²Ama m nìn tí cúú m-ba m-yindi pu, án nín làá ŋá pu atimbun ŋin nib ká-mi m nín nyántìń-bi Eejipiti tiŋkinee ń taa kpèè-mi fámee.

²³Kuteeun niinee ní m yōoǹ m-ŋal ki pūtì yii m làá jà-bi kí yàl̄ atimbun aban nì ntincamun.

²⁴Di sá yii baa nìn ŋúb́ m-bɔkpaaŋi nì m-marab, ní kaa tɔ́ ŋwiŋŋuŋfikaa, ama ní ki nìn yāntì bi-baabi waaŋi dáaĺ-bi.

²⁵Áli gba m nìn tīī-bi abɔkpaa ŋin kaa nìn ŋān̄ee nì marab bin kaa nìn ŋūǹ kí yàntī bí nīn bí dimaŋfalinee.

²⁶M nìn yāntì bi kɔ́ǹ bi-ba tijɔkɔndi. Di sá yii bi nìn cáá bi-jipɔŋkpilib ki wù ŋŋmi ki ŋáań saraabi. M nìn là kí kɔ́ǹ-bi agìń poon bí béé yii man di sá bi-Dindaan ní.

²⁷«An puee, nisaaleen, sòoǹ nì Isirayeel yab kí tùkù-bi tin man ni-Dindaan Unimbɔti sòon̄ee. Ni-baabi nìn sīī-mi kaa nìn yúl̀ nì mi deedee.

²⁸M nìn cáań-bi kitiŋ kin ní m nìn pōoǹ kí tīī-bee poon. Bi bāań ki kpēē ŋgbantamu puee ki ká isufi cáá tifaasɔn ní bi kíĺ ki bíi ŋáań saraabi niin. Bi nìn ŋá saraabi ki tūutì talaalub ní ki fá idafi ki gbítì m-ŋuul.

²⁹Niinee ní m bālifì-bi yii: <Ba di sá iwaatootipaan in pu ni cá nee ní?> Kí yòon̄ ŋyunti gbanti ní bi kíǹ ki yíì ipaan gbanti yii iwaatootipaan.

³⁰An puee á tùkù Isirayeel yab yii man ni-Dindaan Unimbɔti nín sòon̄ yii: <Ní taa kɔ́ǹ ni-ba tijɔkɔndi kii ni-baabi nín nìn ŋá puee, kí taa nyā m-boon kí cùú nīn tòotī bi-timbiiliwaaŋi.

³¹Too kɔŋkɔnnee, ni yaa bíi ŋáań ni-saraabi ki yaa bíi wù ni-biyaamu ŋŋmi ki ŋáań saraabi ki tìì awaayee, ni bíi kɔ̄ntí ni-ba tijɔkɔndi dee. Ní ni dàkafī yii m làá kíí ní bàlifì-maaa, Isirayeel yab? Man ni-Dindaan Unimbɔti nín bí dimaŋfalin nee, maa làá kíí ní bàlifì-mi.

³²Ni lì yii: <Ti là kí nīn bí kii atimbun ŋin kíǹee nín bí puee, a lì kii ntimu mun kíǹee nib nín bí puee. Ti là kí nīn tòotī isufi nì ataŋkpee. Ama an kaa làá ŋá kii ni nín dàkafī puee.

³³Man ni-Dindaan Unimbɔti nín bí dimaŋfalin nee, m nín lī puee sɔ̀. M làá dàkà-ni m-pɔŋŋu nì m-kpabil ní kí kpáatí m-ŋuul kí sìtī ni-pu ní kí nín ŋmā kí jī ni-pu dibeel.

³⁴M làá dàkà-ni m-pɔŋŋu nì m-kpabil nì m-ŋuul ní kí ŋmā kí nyāntí-ni atimbun nì ntimu mun poon ni yàl̄ee, ní kí kóoǹ-ni kí kpāfì.

³⁵M làá cùnnì-ni kuteeun kí kàkatī-ni kí wàatī atimbun ŋin kíǹee, ní kí sòoǹ ni-bɔti niin.

³⁶Kii m nín nìn sòon̄ ni-bɔti Eejipiti teekun puee, míǹ ní m làá sòoǹ ni-bɔti. Man ni-Dindaan Unimbɔti di sòon̄ míǹ.

³⁷M làá dū m-kpandɔŋu ní kí kpàà-ni, ní kí yàntī ní nīn tɔ́ m-poondi.

³⁸M làá nyāntí bin jáń nì mi kaa tɔ́-mee ni-kansikin. M làá nyāntiń-bi ntimu mun poon bi kóòyee, ama bi-taal kaa làá tāā Isirayeel tiŋkin. Niinee ni làá béé yii man di sá ni-Dindaan.>

³⁹Man ni-Dindaan Unimbɔti nín sòon̄ puee sèé: <Isirayeel yab, báà ŋma ŋūǹ kí tòotī u-waaŋi, ama míǹ boonee, ni là kaa là, ní làá dāá nīn tɔ́-mi ní. Ní taa kpèè m-circir yindi fám kí nīn ŋáań saraabi ki tìì ni-waaŋi.

⁴⁰Di sá yii Isirayeel yab, ni-kɔkɔ làá dāá jāam̀-mi m-circir jool pu, Isirayeel joofɔkɔl pu. Man ni-Dindaan Unimbɔti di sòon̄ míǹ. Niin ní m làá dāá fōō-ni nì iŋal ili ní kí dāá fōō tin ni dūu sú-mee, ni-wampɔkaati nì ni-saraamɔntiibi.

⁴¹M yaa láa nyántìń-ni atimbun kansikin nì ntimu mun poon ni yàl̄ee ki kóoǹ-ni ki kpáfì ki dóòyee ní ḿ dāá fōō ni-saraabi bí nīn sɔ́fì ki sɔ̀ŋkī m-pɔbil. M yaa ŋá-ni mimmee, m dàkā atimbun ŋin kíǹee yii m sá circir Nimbɔtiu dee.

⁴²M làá dāá gíiǹní-ni Isirayeel tiŋkin, kitiŋ kin ní m yōoǹ m-ŋal yilpu ki pūtì kí tīī ni-baabee. Ŋyunti gbantee, ni làá béé yii man di sá ni-Dindaan.

⁴³Niinee, ni làá dāá téetí ni-bimbim nì atuun ŋin kɔkɔ ni ŋá ki kɔ́ǹ ni-ba tijɔkɔndee pu. Atuŋkpiti ŋin kɔkɔ ni ŋée puee, ni-naŋki làá dāá nyā nì ni-ba.

⁴⁴Isirayeel yab, an kaa sá ni-bimbikpitim nì ni-jɔkɔntuuŋŋi ní m làá kpèè, ama m-yindi pu ní m làá ŋá míǹ kí tīī-ni. Niinee ni làá béé yii man di sá ni-Dindaan, man ni-Dindaan Unimbɔti di sòon̄ míǹ.>»