Read Ntcham Ezéchiel 21 Bible Online

Ezéchiel 21 - Ntcham bible

Ezéchiel 21

¹Ti-Dindaan sòon̄ nì mi yii[15]:

²«Nisaaleen, fàtī a-nimbiin kí túĺ ŋgiil pú. Sòoǹ kí tɔ̄ dijandi gbanti pu, ní kí dū m-bɔti kí nàatī binib bin kóò Neegeeb bambaŋkunee.

³Á tùkù-bi yii bí pīlifì tin man ni-Dindaan Unimbɔti cáá kí sòoǹ kí tɔ̄ ŋgiil pú bambaŋku puee. M làá tūū ŋŋmi ni-kansikin ní ŋú wà kí céetí isufi in sɔ̀m̀ee nì in kūńee kɔkɔ. Aŋmilimbil kaa làá kpú, ní án làá wà báà ŋma, kí yòon̄ ŋgiil pú kí cáá sāā ŋgan pú.

⁴Báà ŋma làá dāá wāl̀ yii man ni-Dindaan di tūū ŋŋmi gbanti ní ubɔ kaa dāa ŋūǹ kí gbíntí-ŋu.»

⁵Ní m kíí yii: «Áù ti-Dindaan Unimbɔti, bi bí ki yáliŋkí m-pu ki lì yii: <Alaŋkpan ŋma ní u pée nyí ki gà.>»

⁶Ti-Dindaan sòon̄ nì mi yii[16]:

⁷«Nisaaleen, fàtī a-nimbiin kí túĺ Jeerusaleem tiŋki, kí sòoǹ kí tɔ̄ circir kɔŋkooŋŋu pu. Fōō m-bɔti kí nàatī Isirayeel yab.

⁸Tùkù Isirayeel yab yii ti-Dindaan nín sòon̄ puee sèé: <M làá jáǹ-ni, m làá dáaĺ m-tàataajiki kí fúutí kujitooun ní kí kpɔ̀ deedeedaan nì unikpiti kɔkɔ.

⁹M nín làá kpɔ̀ deedeedaan nì unikpiti puee pu ní m làá fúutí m-tàataajiki kujitooun kí tàntī-kì ni-kɔkɔ pu, kí yòon̄ ŋgiil pú kí cáá sāā ŋgan pú.

¹⁰Báà ŋma làá béé yii man, ni-Dindaan di fúutì m-tàataajiki kujitooun. Maa làá fàtīí gíiǹ-kì kí fúuń.>

¹¹An puee, sii nisaaleen, nín̄ yáliŋkí. Nín̄ yáliŋkí nì dipɔɔbiildi poon nì ntuntun bi-kɔkɔ nimbiin.

¹²Bi yaa láa bālifì-si yii ba pu ní a yáliŋkée, á kíí-bi yii: <M gbìl̄ atulim bɔti tin dòońee pu. Báà ŋma pɔbil làá bīil̀, iŋal kɔkɔ làá kpú, binib landɔkɔi làá gátí ní bi-tabiŋyiliŋ làá nīn jìkì. Ŋyunti bāań! Án làá pée ŋá míǹ ní kɔŋkɔnnee, ti-Dindaan Unimbɔti di sòon̄ míǹ.>»

¹³Ti-Dindaan gíti tí sòon̄ nì mi yii:

¹⁴«Nisaaleen, fōō m-bɔti kí nàatī. Tùkù binib tin man ni-Dindaan bíi sòoǹ nì bee. Kitàataajiki kiba sɔ̀, kitàataajiki kin jītí ki jìl̀ pàlpalee.

¹⁵Bi lōoǹ-kì kí pɔ̀fì binib ní, bi pítì-kì kí nīn jìl̀ ní.

¹⁶M dū-kì ki tīī bí pítí-kì kí ŋmā kí dū-kì kí tɔ̄ ditundi. Bi lōoǹ-kì kì jìl̀ pàlpal kí dū-kì kí ŋúbíǹ un làá kpɔ̀ binibee ní.

¹⁷Nisaaleen, fáá dinimbinaamandi biilii! Bi tāntì kitàataajiki gbanti m-nibul nì abɔtibil ŋin kɔkɔ kpòotī Isirayeel tiŋkee pu ní. Bi làá kpɔ̀-bi kí kpáaǹ m-nibul. Fáá a-bindi kí dàkà a-nimbaaku.

¹⁸An sá icɔŋki in pɔ̄ɔ̄yee ní. Ba di làá jītí ŋyunti ŋun ní mbɔtikpandɔ ŋun kaa bí tibanee gíti kpée? Ti-Dindaan Unimbɔti nín sòon̄ puee dee.

¹⁹Sii nisaaleenee, fōō m-bɔti kí nàatī. Kpāafì abaal, diba, mili, mita pu, di sá yii ŋkúm tàataajiki dee, kitàataajiki kin di làá pɔ̀fì binib ki māntìi tú-bi an kɔkɔ puee.

²⁰Kì làá bīil̀ bi-pɔbil kí yàntī bí lítí tikpil. M dū ŋkúm tàataajiki ki bíl̀ mpunyɔmu kɔkɔ pu. Bi bɔ́ntì-kì kí nīn jìl̀ ní, bi lōoǹ-kì kí ŋmā kí pɔ̀fì binib ní.

²¹Kitàataajiki kin jītí pámpamee, pɔ̀fì binib ŋgan pú nì ŋgiil pú. Fàtī a-nyɔkɔ kin cɔ́m̀ee an kɔkɔ pú.

²²Ma mun làá kpāafì abaal ní kí yàntī m-ŋuul ń tɔ̄ di-tundi. Man ni-Dindaan di sòon̄.»

²³Ti-Dindaan bí yii:

²⁴«Nisaaleen, cátí adan ali ŋin pu ní Babiloon bɔtiu tàataajiki làá ŋmā kí dī kí dāan̄ee. Adan alee làá nyānní kitimbaantiin ní. Didandi kamaa kílilaŋkee, ní ŋmà kupiliŋu pu kitiŋ kin poon ní di cée yindi.

²⁵Cátí didandi din pu ní Babiloon janjaliibi làá dī kí cù Amɔn yab tiŋki Raabee, ní didandi din kíǹee ń nīn cá Jeerusaleem tiŋki kin bi máń digundi ki tú kì bí Juuda tiŋkinee.

²⁶Babiloon bɔtiu síl̀ isampuyakati, laakin adan alee kífée kí bɔ̄ tibɔɔl. U cīkifì ipiin, ki bālifì awaa ki kpēē tiwaŋkuti pɔɔŋi címmm.

²⁷Mpiin ŋun dàkà Jeerusaleemee lítì u-ŋaŋgiilin. U làá pɔ̄ kinyɔkɔ bí cùú kpɔ̀ binib bin bí niinee ní kí fáá iwinliili bí kíĺ kujaau. U làá dū kujaau masiimbi kí gbàan̄ kitiŋ punyɔmmu pu, kí mā agun ŋin boon bi làá nīn bāal̀ ki jáà kujaauee, ní kí gbà abɔbil ŋin poon bi làá nīn kàal̀ ki jáàyee.

²⁸Jeerusaleem yab dākafì yii bi nín bālifì an cúú Jeerusaleemee kaa sá tiba, di sá yii bi pūtì yii bi làá wúń bi-pu. Ama ní Babiloon bɔtiu bíi téetí-bi bi nín kaa yúl̀ nì ti-Dindaan deedeeyee pu. An puee u làá cúú-bi kí cùnnì kuyuŋu.

²⁹An puee man bi-Dindaan Unimbɔti bíi sòoǹ nì bi tin bí nee yii: <Ni pée téetí-mi ni-yìntitam nì ni-kpitii pu ní kaa gbèentí. Ni-tuuŋŋi kɔkɔ poonee, ni-kpitii pée nyáń ní ki pá mpaampiin pu. Too, ni nín kaa yàntī bí súntí ni-puee puee, ni làá kɔ́ unannanli ŋaan.

³⁰«Sii dibɔtibil din di kā Isirayeel tiŋki pu dibeel kaa yú deedee ki sá unikpitee, ŋwiin ŋun ní a-kpitii làá gbèen̄ee dòoń.

³¹Man a-Dindaan Unimbɔti nín sòon̄ puee sɔ̀. Bi làá fōō ŋŋaabu ŋun dàkà yii a sá ubɔtee ní kí cíkití a-beefuuliiki. Tiwan làá kpántí ti-paaŋyi! Bi làá yòon̄ un nìn sīntì u-ba taapuee yilpu, ní kí sìntī un nìn yōoǹ u-ba yilpuee taapu.

³²Adigbuŋkati, adigbuŋkati ŋma! M làá yàntī Jeerusaleem ń kpántí adigbuŋkati ŋma. M tīī ubɔ mpɔn ú jáǹ-kì. Bi làá yàaǹ Jeerusaleem tiŋki kɔkɔ, ama see un m tīī mpɔn gbantee ń bàń kí wàatī.»

³³«Nisaaleen, sòoǹ m-bɔti kí nàatī Amɔn yab. Sòoǹ nì bi yii ti-Dindaan Unimbɔti nín sòon̄ Amɔn yab nì bi nín sīī Isirayeel yab pu puee sèé, yii: <Kitàataajiki! kitàataajiki! bi fúutì-kì kujitooun. Bi lōoǹ-kì kí dūú kpɔ̀ binib, kí tɔ̀ntī binib ní kí nīn bí ki ŋmóò làka laka.

³⁴Ŋyunti ŋun ni kā ki máká inyimɔn leedakaŋ nì bi nín sòon̄ ki nāatì-ni tinyimɔmbɔti puee, kitàataajikee kíǹ bɔ́ntì kí tùkutī binikpitib nì bikpitiŋaliibi yiliŋ dee. Di sá yii ŋyunti ŋun ní bi-tuŋkpitiŋ làá gbèen̄ee dee.>

³⁵Kɔŋkɔnnee, gíim̀maan ni-tàataajimmu kí fúuń mu-jitootin. M làá sòoǹ ni-bɔti laakin bi náań-nee, kitiŋ kin poon bi màl̄-nee ní.

³⁶M làá kpáatí m-ŋuul kí sìtī ni-pu. M làá dū m-ŋuul ŋmiŋu kí tɔ̄ ni-pu, ní kí dū-ni kí ŋá kìrikiri nib ŋaan, binib bin tundi pée sá yii bí nīn kù ki céetée ŋaan.

³⁷Ŋŋmi di làá wà-ni ní ni-fatikuu ń nīn pùub̀ kitiŋ nee kɔkɔn. Míǹ boonee ubɔ kaa ti làá téetí ni-pu. Man ni-Dindaan Unimbɔti di sòon̄.»