Read Ntcham Ezéchiel 23 Bible Online

Ezéchiel 23 - Ntcham bible

Ezéchiel 23

²«Nisaaleen, binimpoobi bili di bí ki pēē na.

³Bi nín nìn sá bisapɔmbee, bi nìn kpántì nlaakpaamu Eejipiti tiŋki kin poon bi nìn kóòyee. Niin ní bininjab ŋmáaḿ ŋmáaḿ bi-biiŋi ní ki ŋmáliŋkì bi-bindi din sá disapɔmbindee.

⁴Bi nìn yíì ukpil yii Ooyoola ní ki yíì uwaal yii Ooyooliiba. Ukpilee, Samaarii dee, ní uwaal sá Jeerusaleem. Man di nìn cáab́-bi ní bi màl̄-mi mbininjabiyaamu nì nnimpubiyaamu.

⁵Min kamaa man di yì Ooyoolayee, u nìn kpántì kinimpulaakpaai. U nìn cáá kukpeeu ki néeń u-bɔmbi, Asuur yab bijanjaliibi

⁶bin pēē abɔkutiman cínciŋee nì gɔminab nì kɔmandambi nì binaacimpɔmbi bin ŋān̄ee nì bitanjakaliibi.

⁷Ooyoola nìn néeń Asuur yab kàliŋkpaambi gbanti ní ki nìn kɔ̄ntí u-ba tijɔkɔndi ki tòotī bin kɔkɔ u nìn pée néeńee waaŋi.

⁸U nín nìn bí Eejipiti tiŋkin ki kíĺ alaakpaatuun ŋiŋyee, ŋíǹ ní u gbíntìi nìkì. U nín nìn bí niin ki sá usapɔɔnee, bininjab nìn dɔ̀ nì u ní ki ŋúb́ u-sapɔmbiiŋi ki ŋmáliŋkí ní ki kɔ́ǹ-u ajɔkɔntuun poon.

⁹Niinee ní m dū-u ki ŋá u-bɔmbi, Asuur yab bin u nìn lèe ŋaan.

¹⁰Bíǹ cúú-u ki pēetì ní ki yōoǹ u-jipɔmbi nì u-sapɔmbi ní ki dū kitàataajiki ki kūū-u. Míǹ ní bi nìn dáaĺ u-tafal ní u kpántì ŋabika ki tīī binimpoobi bin kíǹee.»

¹¹«U-naal Ooyooliiba ká tíǹ gbanti kɔkɔ. Ama u-kpeeku poonee, úǹ gíti kɔ́ tijɔkɔndin ki jítiǹ Ooyoola. Úǹ gíti ŋá alaakpaatuun ki jítiǹ u-maan gba.

¹²U mun nìn néeń Asuur yab ní, gɔminab nì kɔmandambi nì bijanjaliibi bin pēē tiwannyaandee nì bitanjakaliibi nì binaacimpɔmbi bin ŋān̄ee.

¹³U mun nìn dū u-ba ki múĺ tijɔkɔndin. M nìn ká yii bi-liitil dī nsambaanti ní.

¹⁴Ama Ooyooliiba úǹ nìn gíti ŋá tilaakpaal kí jítiǹ u-maan. Dalbee ní u ká bi lēē bininjab ki nákáǹ digundi pu ki dū peentaman ki kɔ̀l̄-bi. Bininjab gbanti nìn sá Babiloon yab ní.

¹⁵Bi nìn dū dambalab ki gbìn̄ bi-cammu ní ki dū ŋŋaabu ki fìn̄ bi-yiliŋ. Bin nìn náań nì bibaatandambi binyaambi. Babiloon yab nín pée bí pu bi-dumpuee ní bi nìn lēē ki nákáǹ.

¹⁶Ooyooliiba nín pée wál̀-bi yéèyee ní bi kɔ́-u ní u tú binib bi-cee bi-tiŋkin.

¹⁷Niinee ní Babiloon yab dɔ́miń ki dōoǹ nì u. Bi nìn kɔ́ǹ-u tijɔkɔndi. Ŋyunti ŋun bi bíil̀-u kpataaayee, ní u kíǹ ki ná-bi.

¹⁸U ŋá alaakpaatuun báà ŋma nimbiin ki yāntì báà ŋma wál̀ u-cancaŋgbeel. Niinee ní m fātì m-boon ki tīī-u kii m nín fātì m-boon ki tīī u-maan puee.

¹⁹Ama ní u mɔ̀tīi múl̀ alaakpaatuunni ní ki ŋáań ajɔkɔntuun kii ŋyunti ŋun u sá usapɔɔn ki bí Eejipiti tiŋkinee.

²⁰U nìn néeń bilaakpaadambi bin di bí kii ipeelee. Mmamu nì itaamu sɔ́ǹ-bi.»

²¹«Ooyooliiba, a kíĺ ki bíi ŋáań ajɔkɔntuun kii a-sapɔntin ŋyunti ŋun a nìn yàntī Eejipiti yab ŋmáliŋkí a-bindi ki ŋúb́ a-biiŋi ki ŋmāam̀ee.

²²An pu ní, Ooyooliiba, man a-Dindaan Unimbɔti bíi sòoǹ nì si yii: <M làá yàntī a-bɔmbee kɔkɔ ń jáǹ-si. Kɔŋkɔnnee, a-naŋki nín nyáń nì bi nee, m làá yàntī bí nyānní an kɔkɔ pu kí jáǹ-si.

²³M làá lùkutī Babiloon yab, Kaldee yab kɔkɔ, bin kóò Peekoodi nì Soowa nì Koowa ní Asuur yab ń kūtì bi-pu. M làá kóoǹ binaacimpɔnnyaambi gbanti nì gɔminab nì kɔmandambi nì bibaatandambi nì bikàliŋkpilib nì bitanjakaliibi gbanti kɔkɔ kí kpāfì a-cee.

²⁴Bi làá nyānní ŋgan pú ki kāń janjatɔrɔkub nì loolib kɔkɔ nì bi-bulifi nì dijanjakitikpaandi. Bi làá dāá nīn ŋúb́ agbampɔɔ ki cíkí kujaau fuulimmu kí dāá màntīí tū-si. M làá dāá dū a-bɔti kí bíĺ bi-nimbiin ní bíǹ ń sòoǹ a-bɔti kí nóó nì bi-marab.

²⁵M nín gíí a-pu diŋuul diŋyee puee, bi làá jáǹ-si nì diŋuul poon. Bi làá gíí kí gùutī a-maŋfal nì a-tafaliŋ ní kí dū ntàataajimu kí púntí-si. Bi làá yòon̄ a-bininjabiyaamu nì a-nimpubiyaamu ní ŋŋmi ń wà kí céetí bin kíǹ ki bí dimaŋfalinee.

²⁶Bi làá dāá gbākal̀-si a-wampeeŋkaati nì a-wannyɔkɔntikaati.

²⁷M làá dāá kúntí a-jɔkɔntuuŋŋi nì a-laakpaatuuŋŋi ŋin a kíĺ Eejipiti tiŋkinee. Aa dāa gíti là báà ubɔ ní kaa dāa gíti dàkafī Eejipiti yab pu gba.

²⁸«Man a-Dindaan Unimbɔti di bíi sòoǹ yii m làá dū-si kí ŋá bin a née ŋaan, bin pu a-naŋki nyánnée.

²⁹Bi làá dū kináŋ ní kí jáǹ-si. Bi làá dāá yòon̄ a nín túń ditundi ki ká tiŋyee kɔkɔ. Bi làá yàntī-si dicancaŋgbeel, ní kí dū-si kí síiń mpaampiin pu kii kinimpulaakpaayee báà ŋma ń nīn kpèé. A-laakpaatuuŋŋi nì a-jɔkɔntuuŋŋi

³⁰di làá cáań tíǹ gbanti kɔkɔ a-pu. Si nì ntincamun ninjab ŋá tilaakpaal ní ki kɔ́ǹ a-ba tijɔkɔndi ki tōotì bi-waaŋi.

³¹A dī a-maan tabɔbiliŋ, an pu ní m làá yàntī á nyɔ̀ m-ŋuul yuku[17] poon.>

³²Man a-Dindaan Unimbɔti nín sòon̄ puee sèé: <A làá nyɔ̀ a-maan yuku poon ní, kuyuu kun wāā ki nyóòyee. Bi làá lā-si kí bèel̀-si, di sá yii kuyuuee gbí tiŋan.

³³Kuyuuee làá yàntī iween ń gbí-si. Tifaandi nì falaa yuku gbantee, a-maan Samaarii úǹ nyùn̄-ku ki dóò.

³⁴A làá nyɔ̀ kun kā ku-poonee ní kɔkɔ, a làá dū a-nyiŋŋi kí wīī-ku, a làá dū ku-jaŋŋi kí gíí a-biiŋi. Man a-Dindaan Unimbɔti di sòon̄, m nín sòon̄ puee dee.

³⁵An puee man a-Dindaan Unimbɔti nín sòon̄ puee sɔ̀. A nín súntì m-pu ki fātì a-boon ki tīī-mee puee, a làá fōō a-jɔkɔntuuŋŋi nì a-laakpaatuuŋŋi paati.>»

³⁶Ti-Dindaan bí-mi yii: «Nisaaleen, aa làá sòoǹ Ooyoola nì Ooyooliiba bɔtaaa? Dū ntimbiil tuuŋŋi ŋin bi ŋée kí bíĺ bi-nimbiin.

³⁷Bi sá binimpoobi bin ŋá tilaakpaal ki kūū binibee ní. Bi tōotì awaa ki ŋá tilaakpaal, ní ki dū mbininjabiyaamu mun bi màl̄-mee ki kūū ki ŋá saraa.

³⁸An kaa sá tíǹ gbanti baba ní bi ŋá. Ŋwimbaantee, bi kɔ́ǹ m-circir paaŋyi tijɔkɔndi ní kaa tɔ́ ŋwiŋŋuŋfikaa ŋun bi dūu sú-mee.

³⁹Di sá yii ŋwiin ŋun bi kūū bi-jipɔmbi ki ŋá saraa ki tīī awaayee, ŋwiin gbanti ní bi kɔ́ m-circir kɔŋkooŋŋun ki kɔ́ǹ-ŋu tijɔkɔndi. Tin ní bi ŋá man m-ba diikunee dee.

⁴⁰Kí kūtèe, bi tú binib bí yíiń bininjab bin nyánní ndandati timmunee. Bíǹ tin pée lì yii bi fòol̄ bi-nyɔɔbundee, bi kpáàa bāań bi-cee. Bi nìn fùl̄ ki bɔ̄ntì culoo ki nyɔ̄kɔntì bi-ba ki kíǹ ki kā ki cí-bi.

⁴¹Míǹ boonee ní bi tātìi dōoǹ nlambanyaamu pu. Nlambamuee nyɔkɔpuee, teebil un pu talaalutuukaa nì ŋkpam min sɔ́fì m nìn tīī-uee tɔ́kɔ́.

⁴²Binib tikpil nìn bí niin, ní bi gbìl̀ kunipaau kun tiba kaa pée páb́ee wooku pu. Bininjab biba mun nìn nyánní ijaan tikpil kuteeun. Bi nìn dū tifuuŋkaal ki fúuń unil nì u-naalee ŋal ní ki dū kibeefuulii kinyannyaaŋŋi ki cíkiǹ-bi.

⁴³Niinee ní m bí yii: <Ki kpáaǹ un ní alaakpaatuun nùkū waa ti bí tibanee gbíntìi ŋáań tilaakpaal!

⁴⁴Bininjab dòoń u-cee kii bi nín cá kinimpulaakpaai cee puee! Kii bininjab nín cá kinimpulaakpaai cee puee, míǹ ní bi dɔ́miń Ooyoola nì Ooyooliiba, nnimpulaakpaamu nee cee.

⁴⁵Ama deedeedambi làá sòoǹ kí kpɔ̀ binimpoobi gbanti bɔti yii bi nín ŋá tilaakpaal ki kūū binibee pu, di sá yii bi ŋá tilaakpaal ki kūū binib!

⁴⁶«Man ni-Dindaan Unimbɔti nín sòon̄ puee sèé: <Lùkutī diniwul kí tɔ̄ bi-pu bí fàaǹ-bi kí gbākal̀ bi-gaajawanti.

⁴⁷Yāŋkìmaan-bi ataŋkpee, dūmaan ntàataajimu kí kpɔ̀-bi. Kpɔ̀maan bi-jipɔmbi nì bi-bisalib ní kí tūū bi-diiŋŋi ŋŋmi.

⁴⁸M làá kúntí alaakpaatuun kitiŋ nee poon. Án làá nīn sá ŋabika ki tīī binimpoobi kɔkɔ bí taa nóó nnabiyaamu muli nee laakpaatuuŋŋi tabɔbiliŋ.

⁴⁹Binimpoobi bili nee làá fōō bi-laakpaatuuŋŋi paati ní bi-waatootii gìŋ́ŋi làá fàtīí gítí bi-pu. Niinee ni làá béé yii m sá ni-Dindaan Unimbɔti.»