Read Ntcham Ezéchiel 24 Bible Online

Ezéchiel 24 - Ntcham bible

Ezéchiel 24

¹Bi nín cúú Isirayeel yab ki cūnnì kuyuŋu abin awa boon, iŋmal saalaa poon iwiin saalaa dalee ní ti-Dindaan sòon̄ nì mi yii:

²«Nisaaleen, ŋmà díǹ wiiŋŋu nín sá ŋwiin ŋuŋyee kí bíĺ. Di sá yii díǹ ní Babiloon bɔtiu làá jáǹ Jeerusaleem tiŋki.

³Dū tibɔŋmantikaal nee kí ŋmàntī m-nibul yab yii man bi-Dindaan Unimbɔti di bíi sòoǹ nì bi yii: <Bɔ́ntí daansee. Jōō nnyim kí gbéeǹ.

⁴Dū anaŋkún kí ŋá poon, anaŋkún ŋin ŋān̄ee, ditaal nì kugbigbipeeu. Dū akpamɔnti kí gbéeǹ kí púntí.

⁵Yòon̄ upii nammɔntiiti, kí dū akpab kí ŋá daansee taapu. Yàntī an kɔkɔ ń nùuǹ dicilpu, di sá yii bi máaǹ kí tɔ́kɔń akpab mun.

⁶Man ni-Dindaan Unimbɔti nín sòon̄ puee sɔ̀. Nnikpaakoon tiŋki, nnaabu dɔ̄ ki cí-kèeee! Kì náań nì daansee un dámintì baa ŋūǹ kí fíntí-uee ní. Kpáatí anaŋkúnee daansee poon kí bíĺ diba diba kí taa tɔ̄ kasi.

⁷Fatiku un Jeerusaleem kpáatìi fée dáá gbíntìi bí kitiŋ nee poon. U kpáatì-u ki fá ditaŋkpal pu ní, waa kpáatì-u ki fá kitiŋ, kaa ti dū ntam ki bīiǹ u-pu.

⁸M yāntì fatikuee bí ditaŋkpal pu, laakin ní baa ŋūǹ kí dū-u kí báĺee, án nín làá ŋá pu ú gbítí m-ŋuul ḿ ŋmā kí tɔ̀ ipɔntoonee.

⁹Man ni-Dindaan Unimbɔti di sòon̄ yii: Nnikpaakoon tiŋki, nnaabu dɔ̄ ki cí-si, di sá yii m làá kpāā ŋŋmikpaan kí bíĺ!

¹⁰Nyàab̀ idɔ kí ŋá poon kí pàà ŋŋmi. Púntí kí tɔ́kɔń tinanee, nyàab̀ tikpàntikaal kí ŋá ní kí yàntī akpab ń wà kɔkɔ múb.

¹¹Dū daanseekulimee kí tɔ́kɔń amɔsiŋkoon pu ú píĺ kí mántí cínciŋ. An yaa ŋá mimmee, tijɔkɔndi tin bí u-poonee làá wāŋkì ní an wà an nín dámintì puee.>

¹²Ama dipɔ́ɔǹdi kɔkɔ sá fám ní. Ŋŋmi kaa làá wà an nín dámintì pu nee kɔkɔ.

¹³Jeerusaleem, a ŋá alaakpaatuun nee kɔkɔ ki kɔ́ǹ a-ba tijɔkɔndi. M bàà nyàab̄ kí ŋá-si circir ama ní a yíì kaa kpántì circirdaan. Too, aa làá ŋmā kí kpántí circirdaan kí cáá sāā ŋyunti ŋun ní m-ŋuul làá tɔ̄ a-pu di-tundi kí cáá kátée.

¹⁴Man ni-Dindaan nín sòon̄ ní án làá bàń míǹ. Maa làá gítí m-boon kaa làá sɔ̄ isaa mun. Án kaa làá nīn páb́-mi gba. M làá sòoǹ a-bimbim nì a-tuuŋŋi bɔti. Man ni-Dindaan Unimbɔti di sòon̄ míǹ.»

¹⁵Ti-Dindaan sòon̄ nì mi yii:

¹⁶«M làá yòon̄ un tìì-si dipɔɔpindee. Aa làá ŋá u-kpool, kaa làá sɔ̄ u-pu ní a-nyinnyim kaa làá nyā.

¹⁷Nín̄ nìiǹ diŋmiŋŋmilin kí taa kàl̄ dikpool. Dū a-ŋaabuŋu kí yíĺ kí dū a-naatakaŋ kí táká. Taa dū tiba kí bìin̄ a-nimbiin kí taa jī bukpɔsaa.»

¹⁸M sòon̄ nì samaa kutaafaauee, ní m-nimpuu kpíì kujoou. Kutaa wúntì ní m ŋá kii ti-Dindaan nín kpáafì-mi yii ḿ ŋá puee.

¹⁹Ní binib bālifì-mi ḿ tùkù-bi kun ní m ŋée taapu.

²⁰Ní m kíí-bi yii: «Ti-Dindaan tīī-mi dinyɔɔbundi nee

²¹ḿ dūú nàatī nimbi Isirayeel yab yii: <Man ni-Dindaan Unimbɔti di sòon̄ yii m làá kɔ́ǹ m-circir kɔŋkooŋŋu ŋun pu ni fàal̀, an mɔ̄ǹ-ni ni kpèé an tìì-ni dimákalee tijɔkɔndi. Bi làá dū ntàataajimu kí kpɔ̀ ni-jipɔmbi nì ni-bisalib bin kíǹ Jeerusaleem tiŋkinee.

²²Ni làá ŋá kii Eeseekiyeelee. Naa làá dū tiba kí bìin̄ ni-nimbiin kaa làá jī bukpɔsaa.

²³Ní dū iŋaabu kí fìn̄ ni-yiliŋ kí nīn táká anaataka. Ní taa yāliŋkì kí taa sɔ̄. Ama, ni-kpitii puee, ni làá dúntí ní báà ŋma làá nīn yáliŋkí u-juti pu.

²⁴Eeseekiyeel làá nīn sá kudaaŋŋu ní ki tīī-ni. Tin bi sòon̄ ki síiǹ yii án làá bàńee yaa láa bāańee, ní dāá ŋámaan kii úǹ nín ŋá puee deedee. Niinee, ni làá béé yii man di sá ni-Dindaan Unimbɔti.>»

²⁵«Sii nisaaleen, pīlifì, m làá yòon̄ bi-kansikin circir kɔŋkooŋŋu ŋun di sá bi-balilaŋki, ki sá bi-pɔɔpindi bi kpèé, ŋkɔŋkoon ŋun pu bi fàal̀ ní ki dū bi-mákal ki páaǹee. M làá dāá yòon̄ bi-jipɔmbi nì bi-bisalib.

²⁶Ŋwiin gbantee, un ŋmátì ki nyáń nnaabu gbantinee làá dāá māafì-ni tin jítèe.

²⁷Ŋwiin gbantee, a làá dāá ŋmā kí sòoǹ. A làá dāá ká kinyɔkɔ kí sòoǹ nì un ŋmátì ki nyáń nnaabun ki dɔ́mińee. A làá dāá nīn sá kudaaŋŋu ní ki tīī m-nibul ní bí dāá béé yii man di sá bi-Dindaan.»