Read Ntcham Ezéchiel 25 Bible Online

Ezéchiel 25 - Ntcham bible

Ezéchiel 25

¹Ti-Dindaan sòon̄ nì mi yii:

²Nisaaleen, fàtī a-ba kí túĺ Amɔn yab cee kí sòoǹ kí tɔ̄ bi-pu.

³Tùkù-bi yii bí pīlifì tibɔti tin man ni-Dindaan Unimbɔti cáá kí sòoǹ nì bee. Ŋyunti ŋun ní bi kɔ́ǹ m-circir kɔŋkooŋŋu tijɔkɔndi, ki nāaǹ Isirayeel tiŋki ní ki cúú Juuda yab ki cūnnì kuyuŋuee, ni nìn láń.

⁴An puee, m làá yàntī ŋwìiń nyalaŋki pú yab ń fōō ni-tiŋki. Bi làá gāā bi-janjanaapaaŋi ni-tiŋki pu ní kí cóoń bi-tantib niin. Bíǹ di làá ŋmɔ́ ni-sufii biliŋ ní kí nyɔ̀ ni-waŋkuti naabiim.

⁵M làá yàntī ni-tiŋyil Raaba ń kpántí kunaakpaapɔɔu kí tīī igutaamu, ní kí yàntī Amɔn tiŋki ń kpántí ipii naabakati. Niinee ni làá béé yii man di sá ni-Dindaan.

⁶«Man ni-Dindaan Unimbɔti nín sòon̄ puee sɔ̀. Ni nín gbìl̄ nnaabu ŋun jéetì Isirayeel puee, an mɔ́ɔkiǹ-ni tikpil ní ni kpáafì abaal. Ni ŋá míǹ ki dàkā ni nín kpèé m-nibul fám puee ní.

⁷An puee m làá dàkà-ni m-pɔŋŋu ní kí dū-ni kí líiǹ atimbun ŋin kíǹee nib bí fūkul̀-ni pílpil. M làá kúntí-ni anibul kansikin, naa ti làá nīn cáá kitiŋ ní kí kúntí-ni múb. Niinee ni làá béé yii m sá ni-Dindaan.»

⁸«Man ni-Dindaan Unimbɔti nín sòon̄ puee sɔ̀. Moowaab yab lī yii Juuda yab kpántì kii atimbun ŋin kíǹee nib nín bí puee ní.

⁹An puee m làá yàntī bí jáǹ ntimu mun wúń Moowaab tiŋkpaanyɔmmuee. Binannanliibi làá nàan̄-mu kiba kiba ki kpáaǹ ntinnyaammu kii Beeti-Yeesimooti nì Baal-Meeyɔn nì Kiiriyatayiimee.

¹⁰M làá yàntī ŋwìiń nyalaŋki pú yab ń já kí fōō Moowaab tiŋki kii bi nín jáń ki fōō Amɔn tiŋki puee. An yaa ŋá mimmee, baa ti làá téetí Amɔn yab pu atimbun kansikin.

¹¹M làá dáaĺ Moowaab yab tafal ní bí béé yii man di sá bi-Dindaan.»

¹²«Man ni-Dindaan Unimbɔti nín sòon̄ puee sɔ̀. Eedoom yab tɔ̀n̄ Juuda yab ipɔntoon, an pu ní bi fōō dibɔkpil.

¹³An puee man ni-Dindaan Unimbɔti nín sòon̄ puee sɔ̀. M làá dàkà Eedoom yab m-pɔŋŋu. M làá kúntí kitiŋ gbanti nib nì ki-waŋkuti. M làá yàntī kí kpántí kuteeu kí yòon̄ Teeman tiŋki kí cáá sāā Deedan tiŋki. Bi làá kpɔ̀ bin kóò Eedoom tiŋkinee kujaaun ní.

¹⁴M làá yàntī m-nibul Isirayeel yab nín tɔ̀ m-pɔntooŋyi Eedoom yab pu. M-ŋuukpaandi nín bàlifī puee, míǹ ní Isirayeel yab làá ŋá-bi. Mimmee, Eedoom yab làá béé kun di sá m-pɔntooŋyee. Man ni-Dindaan Unimbɔti di sòon̄ míǹ.»

¹⁵«Man ni-Dindaan Unimbɔti nín sòon̄ puee sɔ̀. Fiiliistii yab tɔ̀n̄ ipɔntoon. Bi dū nnimbidiki ki tɔ̀n̄ bi-nannanliibi bin sá talku nannanliibee ipɔntoon ní ki céetì-bi.

¹⁶An puee, man ni-Dindaan Unimbɔti nín sòon̄ puee sɔ̀. M làá dàkà-bi m-pɔŋŋu. M làá kúntí-bi, bíǹ bin kɔkɔ nyánní Kafitoor ki dɔ́miń ki kāl̀ ditiŋkugbandee.

¹⁷M làá tɔ̀-bi ipɔntoon in sá ikpaanee ní kí dáaĺ bi-tafal ŋkpitim pu. Niinee bi làá béé yii man di sá bi-Dindaan.»