Read Ntcham Ezéchiel 27 Bible Online

Ezéchiel 27 - Ntcham bible

Ezéchiel 27

¹Ti-Dindaan bí-mi yii:

²«Nisaaleen, gāā Tiir tiŋki ŋkpiisilan.

³Kitiŋ gbanti bí ditiŋkugbandi ní ki bàntī nì atimbun ŋin timmu tiŋku nyim māntìi túee. Nàatī-kì tin man ni-Dindaan Unimbɔti sòon̄ee yii: Sii, Tiir tiŋki, a lì yii: <M ŋān̄ kunyaaŋŋu!>

⁴A-tiŋki wāā ki tin bàn̄ tiŋku kansikin. Bi máń-si a ŋān̄ tikpilku.

⁵Bi máń-si kii meelee. Bi dū Seeniir tiŋkin subu bun bi yíì siipreesee ki dūu kpáá a-wunti boon. Bi dū Leebanɔn tiŋkin subu bun bi yíì seediree ní ki cóoǹ ki sàkantí a-ŋaabiki.

⁶Bi dū Baasan tiŋkin subu bun bi yíì seenee ki kpítì a-laalii in a cáa kùtī nnyiminee. Bi dū Siipiri tiŋkin subu bun bi yíì seedir bi dū akuntinyin ki nyūntèe ki máń a-kadulkau.

⁷Bi dū fálfal ŋaabui in nyánní Eejipiti bi gbáńee ki lùn̄ a-ŋaabui in bi cáa sàkantí iŋaliŋfi puee. Iŋaabu gbanti di yàntī a yaa páaǹní ndanee bí béé-si. Satab bin máǹ wèeee ki máń cínciŋ ki nyánní Siipiri tiŋkinee ní a nìn cáa bìintí a-wannyafikaati pu.

⁸Bin nìn ŋàal̀ a-meelauee nìn nyánní Siidɔn nì Arfaadi timmun ní, Tiir yab bin yáb̀ee di nìn ŋàal̀ meela gbanti.

⁹Biibiloosi tɔntɔnliibi bin nìn nyí ditundi ki yáb̀ee di nìn ŋáŋkí meelee. Meelab bin kɔkɔ nìn bí tiŋku puee nìn yūlifí a-cee ní, ní bin nìn kā u-poonee dāā a-wanti tin a nyáfée.

¹⁰Peersi nì Luudi nì Puuti yab janjaliibi di nìn bí a-janjakitilin. Bi nìn cáá bi-gbampɔɔŋi nì bi-janjafuulimmu ki sīintí a-cee ní. Bíǹ di nìn tìì-si tinyool.

¹¹Arfaadi yab nìn kútí a-janjaliibi pu ní bí jɔ̄m̀ a-guŋŋi pu ki cí kitiŋ, ní Gamaadi yab nìn yūlifí a-sintil difɔkɔŋi pu sintil. Bi nìn dù bi-gbampɔɔŋi ní kí lúntí agun ŋin māntìi tú-see pu. Bíǹ di nìn gíti kútí-si kunyaaŋŋu.»

¹²«Taarsiisi yab nìn cáá tigaajati kɔkɔ nì ti-bulifi ki kpántí a-wanti. Bi nìn cáá animbil nì tikúti nì tikúnyuntikaal nì tikúbɔn tin nyìm̀ee ki dāā a-wanti.

¹³Greeki yab nì Tuubaal yab nì Meeseeki yab nìn bàntī a-cee ní. Bi nìn cáá iyumbu nì tasa kúti ki kpántí a-wanti.

¹⁴Beeti Toogarma yab nìn nyáfíǹ-si itaamu in tūǹ ditundee nì itaamu in pu bi kàal̀ ki jáà kujaauee nì imamboon.

¹⁵Deedan yab mun nìn bàntī a-cee. Ntimu tikpil nib nìn dòoń ki dāā a-wanti. Bi nìn cáá kunti nyiŋŋi nì busubu bun bi yíì eebeenee dɔi ní ki pà-si.

¹⁶Eedoom yab nìn dāā a-cee tiwan tikpil ní ki nìn cáá ataŋkpamɔnti nì satab bin bi dū nnyim min bí gùŋgumee ki nyūntèe nì satab bin bi gbáńee nì iŋaabu in bí fálfalee nì ataŋkpamɔnti ŋin bi yíì kooraai nì rubiisee ki kpántí-si tiwan.

¹⁷Juuda yab nì Isirayeel yab nìn dāā a-cee tiwan ní ki nyáfíǹ-si Miiniiti tiŋki bileeu nì idi nì tisiil nì ŋkpam nì talaalu un bi dū digbumbitiki ki ŋée.

¹⁸Damaasi yab nìn dāā a-cee tiwan tin a ŋáańee tikpil nì tigaajawan yíri yiri. Bi nìn cáá Eelbɔn tiŋki damam nì ipii kuti tin nyánní Sawaar tiŋkinee ki pà-si.

¹⁹Daani nì Yafan naakɔti nìn cáá tikúti tin bi mɔ́ɔ̀yee nì talaalub ki pà tin bi dāā a-ceeyee Uusal tiŋkin.

²⁰Deedan yab nìn nyáfíǹ-si igban in bi cáa pāantí itaamu puee.

²¹Bilaalibub nì Keedaar tiŋki yab cáá apibil nì ipii nì iŋɔsal ki pà tiwan tin bi dāā a-ceeyee pu.

²²Saba nì Ragima nyampoobi nìn bàntī a-cee. Bi nìn cáá talaalumɔntiibi nì ataŋkpamɔnti kɔkɔ nì ŋi-bulifi nì sindaariya ki kpántí nì tiwan tin a nyáfée.

²³Karan nì Kanee nì Eedeen timmun yab nìn bàntī a-cee. Míǹ mbaantiim ní Saba nì Asuur nì Kilmad timmun yab nìn bàntī.

²⁴Bi nìn nyáfíǹ-si tiwampeeŋkaal tin pɔ̄ɔ̄ kudaau ki máń wèeeeyee nì tiwampeeŋkaal tin bi gbáńee nì satab bin cáá inyiŋfi kupaauee nì iŋmii in bi lùn̄ i dàfì tiŋanee.

²⁵Taarsiisi tiŋkin meelab di nìn tūntí a-wanti.» «Bi dū tiwannyafikaal ki gbéeǹ-si an nyìm̀ a bí tiŋku kansikin.

²⁶Bin ŋàal̀-see cáá-si ki cūnnì laakin nnyim nyóòyee. A bàn̄ tiŋku kansikinee ní ŋwìiń nyalaŋki buŋku yāntì a wīī.

²⁷A-gaajati nì a-wanti tin a nyáfée nì a-gaajawanti kɔkɔ, nì bin kɔkɔ bí meela poon ki tūǹ ditundee, nì bin nìn ŋáŋkí a-meelabee, nì binyampoobi bin bàntī a-ceeyee, nì bijanjaliibi bin bí a-tundinee, nì samaa un bí a-ceeyee kɔkɔ tɔ́ nnyimin ŋwiin ŋun a wīī ki gbíntì nnyiminee.

²⁸Bin bí meela poon ki tūǹ ditundee nín fáá mbiilee, atiŋkugbán cīŋkì ní.

²⁹Niinee bin kɔkɔ ŋúb́ buŋalimbu laaliiyee yíkì ki yāntì bi-meelab. Bin bí meelabinee kpákatì kitiŋ.

³⁰Bi kíĺ ki bíi sūǹ a-pu, ki bíi yáliŋkí ŋkpitim pu. Bi kāfì ntam ki sītì bi-yiliŋ pu ki dɔ̄ ki bíntí ŋfantamin.

³¹A-puee, bi kōol̀ diyibaakpandi ki dū kpɔsata ki lōoǹ. Bi bíi sūǹ a-pu nì kunimbaau ki yáliŋkí ŋkpitim pu.

³²An nín wù-bi puee, bi bíi gà-si iyaliŋki laŋŋu, bi bíi gà-si ŋkpiisilan nee yii: <Ŋma di nìn bí kii Tiir tiŋkee, ama kɔŋkɔnnee, kì nāaǹ múb tiŋku kansikin.>

³³Bi yaa nìn nyāntí a-bantil wanti a-meelabinee, anibul tikpil nìn jīǹ ní kí díkí. A-gaajawanti nín nìn wīikí puee nì tiwan tin a nyáfée nìn yàntī kitiŋ pu bɔtiibi kpántí bigaajab.

³⁴Kɔŋkɔnnee, tinyiŋgban yá ki wīī-si, a múĺ tiŋku taapu. Tiwan tin a túee nì bin bí a-poon ki tūǹ ditundee kútì a-pu ki múĺ tiŋkun.

³⁵Bin kɔkɔ kóò atiŋkugbánee bí kunimbaakpaaŋŋun sii pu. Bi-bɔtiibi kɔ́ dinyoondin, a yaa kpēē-bee, a béetí yii bi-bɔbiliŋ bíil̀.

³⁶Anibul ŋin kíǹee nyampoobi fátí dipɔɔbiildi biilii a-pu, di sá yii a kpántì tiwan tin fàantée, a wáŋkì kí nīn cáa cá jaanjaan!»