Read Ntcham Ezéchiel 28 Bible Online

Ezéchiel 28 - Ntcham bible

Ezéchiel 28

¹Ti-Dindaan bí-mi yii:

²«Nisaaleen, tùkù Tiir bɔtikpaaŋwu tin man ni-Dindaan Unimbɔti sòon̄ee: Dilambil kɔ́-see ní a kíǹ ki lì yii: <M sá unimbɔti. M kā inimbɔti jal pu tiŋku kansikin.> A dàkafī yii si nì unimbɔti ŋmà ní, ama a sá unil ní, aa sá unimbɔti!

³A dàkafī yii a sá uciŋfiti ki jítiǹ Daniyeel ní ki ŋūǹ kí gbìl̄ tibɔti tin sá abɔɔnee taapu.

⁴A dū dinyil nì nciin ki ká tigaajati tikpil. A kóoǹ sindaariya nì animbil ki kpáafì a-cee.

⁵A nín nyí dibàntil tundi tikpil puee, a kútì a-gaajati pu ní an yōoǹ-si.

⁶«An pu ní man ni-Dindaan Unimbɔti bíi sòoǹ yii, a dū a-ba ki síiǹ unimbɔti paaŋŋu.

⁷A nín ŋá mimmee puee, m làá cáań atimbuncaan ŋin nib néeń tipɔmbɔtee kí tɔ̄ a-pu. Bi làá bīil̀ tiwammɔntiil tin a dū a-nyil ki nyàab̄ ki kée ní kí kpèè kí sìŋkīǹ a-nyooti.

⁸Bi làá yàntī á sìntī ditaŋkpiilin ní kí kpú dulim kúm tiŋku kansikin.

⁹Bi yaa láa dɔ́miń kí kpɔ̀-see, a làá dāá gíti lì yii a sá unimbɔtaaa? Ama a làá dāá nīn sá unil ní bin làá kpɔ̀-see ŋaan, kaa sá unimbɔti.

¹⁰A làá kpú bin kaa gíí dikpancandee kúm ní binicambi ŋaan. Man ni-Dindaan Unimbɔti di sòon̄ ní tin m sòon̄ee dee.»

¹¹Ti-Dindaan gíti sòon̄ nì mi yii:

¹²«Nisaaleen, gāā Tiir bɔtiu iyaliŋki laŋŋu. Á tùkù-u yii man ni-Dindaan Unimbɔti nín sòon̄ puee sèé: <Sii boonee, an nìn gíti kpá. A nìn cáá dinyil tikpil ní ki nìn ŋān̄ kunyaaŋŋu.

¹³A nìn kóò Unimbɔti kpaabun, Eedeen tiŋkin ní bi nìn dū ataŋkpamɔnti ki máń digundi ki māntìi tú-si. Ataŋkpamɔnti ŋin bi yíì rubiisi nì diyaaman nì Kriistooliiti nì Koornaliini nì jaaspi nì greenaati nì eemeeroodee ní bi nìn dūu máń-dì. Sindaariya un bi nyūntì a-gaŋgaŋŋi nì a-wulimmuee, bi bɔ́ntì-u ŋwiin ŋun bi náań-see ní.

¹⁴M nìn dū keerubim un yáàyee ki yóoǹ a-cee ú nīn cí-si. A nìn kóò m-circir jool pu, ní ki nìn còom̄ ataŋkpee ŋin jìl̀ee kansikin.

¹⁵Kí yòon̄ ŋwiin ŋun bi náań-see, a cōom̀ disaŋkimmɔntiil ki cáá sāā daliŋkin bi ká ikpiti a-ceeyee.

¹⁶A-nyampuyil nín cōom̀ tiŋan puee yāntì a ŋá tipɔmbɔti. A yīntì. An puee ní m làá yàntī á kpántí kii binifantantiibee ní kí jà-si m-jool pu. Keerubim un cí-see làá jà-si kí nyāntí ataŋkpee ŋin jìl̀ee kansikin.

¹⁷A-nyaaŋku yāntì a kɔ́ dilambilin ní an nín bútì-si puee yāntì a-yil lábitì. An pu ní m làá lúkú-si kitiŋ ní á kpántí tinimbikɔntiwan kí tīī bibɔtiibi bin kíǹee.

¹⁸A ŋá ikpiti tikpil ní ki mūul̀ binib a-nyampuyil poon ki kɔ́ǹ circir paaŋyi tijɔkɔndi. An pu ní m kpāā ŋŋmi ŋun làá nàan̄-see a-tiŋki kansikin. A làá dāá kpántí ŋfantam ní bin bíi kpèé-see nimbiin.

¹⁹Kun làá bàń a-puee làá kɔ́ǹ anibul ŋin nyí-see kunimbaau, di sá yii a làá kpántí tiwan tin fàantée ní. A làá wāŋkì ní kí nīn cáa cá jaanjaan.>»

²⁰Ti-Dindaan bí-mi yii:

²¹«Nisaaleen, fàtī a-nimbiin kí túĺ Siidɔn tiŋki kí sòoǹ m-bɔti kí tɔ̄ ki-nib pu.

²²Dū tin man ni-Dindaan Unimbɔti sòon̄ee kí nàatī-bi yii: <M làá jáǹ sii Siidɔn tiŋki! M làá dàkà m-nyooti tin m làá ŋá-see poon. M yaa láa dáaĺ a-tafal ki dàkā m nín bí circir puee, báà ŋma làá dāá béé yii m sá ni-Dindaan.

²³M làá cáań bìlbil kúm weeŋyi kí tɔ̄ a-pu, ní fatiku ń nīn dɔ̄ ki pùub̀ a-daŋŋi pu. Bi làá dāá jáǹ-si ijaan kɔkɔ pu ní kí kpɔ̀ bin kóò a-tiŋki poonee tikpil. Niinee báà ŋma làá dāá béé yii m sá ni-Dindaan.»

²⁴«Atimbun ŋin māntìi tú Isirayeel yabee diba kaa ti làá kpèè-bi fám. Ŋaa ti làá páb́-bi kii ikuŋkum nín sàatī unil pu, àá abɔjanaakun nín pàtī unil puee. Niinee báà ŋma làá béé yii m sá ni-Dindaan.

²⁵«Man ni-Dindaan Unimbɔti di sòon̄ yii m làá nyāntí Isirayeel yab kɔkɔ anibul ŋin poon m jìn̄-bi ki cūnnèe kansikin kí kóoǹ-bi kí kpāfì. M làá ŋá míǹ ní kí dàkà anibul ŋin kíǹee yii m sá circir Nimbɔtiu. Isirayeel yab làá fàtīí gítí kí kɔ́ bi-tiŋkin, kitiŋ kin ní m tīī m-tɔntɔnliu Jaakɔbee.

²⁶Bi làá dāá nīn kóò niin nì ŋgbansɔŋfi, kí mā adiin ní kí cóoń fiinyib. Bi làá dāá nīn bí ŋgbansɔŋfin, di sá yii m làá dáaĺ bin kɔkɔ kóò ki māntìi tú-bi ki kpēē-bi fámee tafal. Niinee bi làá dāá béé yii man di sá bi-Dindaan bi-Nimbɔtiu.>»