Read Ntcham Ezéchiel 29 Bible Online

Ezéchiel 29 - Ntcham bible

Ezéchiel 29

¹Bi nín cúú Isirayeel yab kuyuŋu abin saalaa boon, uŋmal usaalaati wiiŋyi saalaa nì ili dalee ní ti-Dindaan sòon̄ nì mi yii:

²«Nisaaleen, fàtī a-nimbiin kí túĺ Eejipiti bɔtiu Faaroo watil pú kí sòoǹ kí tɔ̄ u nì Eejipiti tiŋki kɔkɔ pu.

³Nàatī-u tibɔti tin ní man ni-Dindaan Unimbɔti bíi sòoǹ nì uee yii: <M làá jáǹ sii Faaroo, Eejipiti bɔtiu. A bí kii kunyiibiliŋŋuee ní ki dɔ̄ Niil mɔɔlin. A lì yii sii di yì Niil mɔɔl, sii di náań-dì ki tīī a-ba.

⁴Too, m làá dū tikúti kí kpàl̄ a-nyɔɔkpaweeŋyi ní kí dū a-mɔɔl poon jɔmii kí nákań a-pɔkɔi pu. M làá nyāntí-si Niil mɔɔlin kí kpáaǹ ijɔm in kɔkɔ náká a-jɔmpɔkɔi puee.

⁵M làá dū-ni kí lúkú kuteeun, sii nì ijɔm gbanti kɔkɔ. A làá lítí kitiŋ ní kí kpú ní ubɔ mun kpá kí yòon̄-si àá kí síb́-si. M làá yàntī á kpántí inoon nì ipeel jinti.

⁶Niinee Eejipiti yab kɔkɔ làá béé yii man di sá bi-Dindaan. «A nín tútúǹ Isirayeel yab puee kaa bàn̄ kukaluu nín ŋūǹ kí tūtuǹ-bi puee.

⁷Bi nín dīntì a-puee, a kɔ́fì ki gbíntì bi-ŋalin ní ki gíí bi-gbigbipeeu ní ki yɔ̄tì bi-wunti.

⁸Too, man a-Dindaan Unimbɔti nín sòon̄ puee sɔ̀. M làá dū ajanjakiti kí tɔ̄ń a-pu ní kí kpɔ̀ kí céetí a-tiŋkin nib nì ki-waŋkuti.

⁹Bi làá nàan̄ Eejipiti tiŋki ní kitiŋee ń kpántí kii kuteeuee. Niinee binib làá béé yii man di sá ni-Dindaan. «A lī yii sii di yì Niil mɔɔl, sii di náań-dì.

¹⁰An puee m làá jáǹ sii nì a-mɔɔl. M làá yàntī Eejipiti ń kpántí adigbuŋkati ŋma. M làá yàntī kí kpántí kuteeu kí yòon̄ Miigidool tiŋki ŋgan pú kí cáá sāā Asuwan tiŋki nì Eetiiyoopii tiŋkpaanyɔkɔ ŋgiil pú.

¹¹Báà unil àá kuwaŋkuluu kaa ti làá kíí kí cù niin. Baa làá ti ká tin cáá kufoouee abin imuŋku ili Eejipiti tiŋkin.

¹²M làá yàntī Eejipiti tiŋki ń kpántí kuteeu kun pée kūń ki jítiǹ kuteeu kamaayee. Bi làá nàan̄ Eejipiti timmu min ní baa láa pée ká kitiŋ pu dooyee. Abin imuŋku ilee, m làá yàntī Eejipiti yab ń yàl̄ kí tin nín̄ bí atimbuncaan poon, kí nīn bí ntincamun.

¹³«Man ni-Dindaan Unimbɔti di sòon̄ yii: Abin imuŋku ili boonee, m làá kóoǹní Eejipiti yab kí nyāntí atimbun ŋin poon bi yàl̄ ki bíńee kí kpāfì.

¹⁴M làá fàtīí gíiǹní iyumbu, m làá fàtīí gíiǹní-bi Eejipiti tiŋkin, ŋgiil pú, kitiŋ kin poon bi màl̄-bee. Bi làá fàtīí náań kibeewaai,

¹⁵dibeel din di làá nīn sá abee kɔkɔ poon kiwaayee, ní baa làá ti yīkì kí tɔ́kɔń atimbun ŋin kíǹee pu. M làá bàtī bi-wíiŋŋu pu án nín làá ŋá pu bí taa ti jī abee ŋin kíǹee pu dinyandee.

¹⁶Isirayeel yab kaa làá ti nín̄ báká bi-pu bí jòoń-bi. Isirayeel yab kaa làá ti yíiń Eejipiti yab ń dāá jòoń-bi kí gíti ŋá ikpiti. Niinee báà ŋma làá béé yii man di sá ni-Dindaan.>»

¹⁷Bi nín cúú Isirayeel yab ki cūnnì kuyuŋu abin mmuŋku nì aluli boon, uŋmapeekaa wimpeekaaŋuee, ní ti-Dindaan sòon̄ nì mi yii:

¹⁸«Nisaaleen, Babiloon bɔtiu Neebukadineesaar yāntì u-janjakitil ŋá ditumpɔɔl ki jáń nì Tiir yab. Bijanjaliibi gbanti kɔkɔ yiliŋ nìn ŋātì ní bi-gbigbipati fōō tiweendi, ama nì míǹ kɔkɔee, ubɔtaaa, u-janjaliibaaa, ubɔ kaa páatì ditundi din bi túń ki jáń nì Tiir tiŋkee pu.

¹⁹Too, man ni-Dindaan Unimbɔti nín sòon̄ puee sɔ̀. M làá dū Eejipiti tiŋki kí ŋá Babiloon bɔtiu Neebukadineesaar ŋaan. U làá fūkul̀-kì, kí yòon̄ ki-gaajawanti ní kí nàan̄-kì. Eejipiti gaajawanti di làá nīn sá u-janjaliibi paati.

²⁰M làá dū Eejipiti ní ki tīī-u kí pà u-tundi paati, di sá yii man ní u-janjakitil túń ditundi ki tīī. Man ni-Dindaan Unimbɔti di sòon̄ míǹ.

²¹«Ŋwiin gbantee, m làá dāá kūtì Isirayeel yab mpɔn. Sii Eeseekiyeelee, m làá tīī-si ŋŋmam á sòoǹ nì bi. Niinee bi làá béé yii man di sá bi-Dindaan.»