Read Ntcham Ezéchiel 30 Bible Online

Ezéchiel 30 - Ntcham bible

Ezéchiel 30

¹Ti-Dindaan gíti sòon̄ nì mi yii:

²«Nisaaleen, fōō m-bɔti kí nàatī kí lì yii: Ti-Dindaan Unimbɔti nyɔɔbundi sèé: <Nín̄ yáliŋkímaan iyunti in bí ki dòońee pu!

³Di sá yii ti-Dindaan wiiŋŋu dòoń, ŋu tóobiń. Án làá dāá nīn sá atagbambɔn wiiŋŋu ní, ŋwiin ŋun ní bi làá sòoǹ atimbun ŋin kíǹee bɔtee.

⁴Kujaau làá dāá nīn bí Eejipiti tiŋkin ní Eetiiyoopii ń kɔ́ dinyoondin. Bi làá dāá pɔ̀fì Eejipiti yab, kí fūkul̀ bi-gaajati ní kí nàan̄ bi-tiŋki.

⁵Bi làá dāá kpɔ̀ Eetiiyoopii yab nì Puuti yab nì Luudi yab nì Arabii yab nì Liibii yab kí kpáaǹ Isirayeel yab kujaaun.

⁶Man ni-Dindaan di sòon̄ yii, kí yòon̄ Miigidool ŋgan pú kí cáá sāā Asuwan ŋgiil púee, bi làá kpɔ̀ bin mɔ́tí Eejipiti puee dikɔ̀ndin, ní kí nàan̄ Eejipiti pɔŋŋu ŋun yòontí-kèe. Man ni-Dindaan Unimbɔti di sòon̄ míǹ.

⁷Eejipiti làá dāá kpántí kuteeu kun baasii kūń kitiŋ puee ní. Ki-timmu làá dāá kpántí adigbuŋkati ŋma ní.

⁸M yaa láa tūū Eejipiti tiŋki ŋŋmi ki kūū ki céetì bin mɔ́tí ki-puee kɔkɔee, ni làá dāá béé yii m sá ni-Dindaan.

⁹Ŋwiin gbantee, ituun làá dāá kɔ́ meela kí cùú yàntī Eetiiyoopii yab bin dàkafī yii bi bí ŋgbansɔŋfinee ń nyɔ̀ ŋkpatim. Ŋwiin ŋun m làá dāá nàan̄ Eejipitee, bin kóò Eetiiyoopiiyee làá dāá kɔ́ dinyoondin ní bi-wunti ń nīn jìkì. Ŋwiin gbanti tóobiń!>

¹⁰«Man ni-Dindaan Unimbɔti nín sòon̄ puee sèé: <M làá dī Babiloon bɔtiu Neebukadineesaar pu ní kí kpɔ̀ kí céetí Eejipiti nipaaku nee.

¹¹Úǹ nì u-nibul din néeń tipɔmbɔti ki jítiǹ binib kɔkɔee làá dāan̄ kí nàan̄ kitiŋ gbanti. Bi làá jáǹ Eejipiti yab ní kí yàntī anikpil ń gbí Eejipiti tiŋki.

¹²M làá yàntī Eejipiti buntaaŋi ń kpā ní kí dū Eejipiti yab kí ŋá binikpitib ŋaan. M làá yàntī binicambi ń nàan̄ kitiŋ gbanti ní kí fūkul̀ ki-gaajawanti kɔkɔ. Man ni-Dindaan di sòon̄.>

¹³«Man ni-Dindaan Unimbɔti nín gíti sòon̄ puee sèé: <M làá kúntí awaakpitikaa nì amakaa ŋin bí Meemifiisi tiŋkinee. Ubɔti dāa gíti kpá Eejipiti tiŋkin. M làá yàntī dinyoondi ń gbí kitiŋee kɔkɔ.

¹⁴M làá nàan̄ Eejipiti tiŋki ŋgiil pú, kí tūū Soowan tiŋki ŋŋmi ní kí sòoǹ Teebi tiŋki bɔti kí dáaĺ ki-tafal.

¹⁵M làá kpáatí m-bum kí sìtī Siini tiŋki kin di wúń Eejipiti tiŋki puee. M làá kúntí Teebi nipaaku nee.

¹⁶M làá tūū Eejipiti tiŋki ŋŋmi. Siini yab làá kɔ́ dinyoondin. Bi làá sāā kí cíĺ digundi din māntìi tú Teebi tiŋkee ní nnyim ń gbí kí léeń ki-pu.

¹⁷Bi làá dāá kpɔ̀ Ooni nì Pii-Beeseeti naacimpɔmbi kujaaun ní kí cúú binib bin kíǹee kí cùnnì kuyuŋu.

¹⁸M yaa láa nāaǹ Eejipiti pɔŋŋu ki kúntì ki-lambil din kì cáá mpɔn gbanti puee, kutaa kaa làá dāá wúntí Tapaneesi tiŋki pu. Ditagbambɔndi làá dāá bìin̄ kitiŋee pu ní ki-nib ń búntí kuyuŋu.

¹⁹M làá dāá sòoǹ Eejipiti bɔti kí dáaĺ ki-tafal ní báà ŋma ń béé yii man di sá ni-Dindaan.>»

²⁰Bi nín cúú Isirayeel yab kuyuŋu abin saalaa nì diba boon, uŋmapeekaa winluluútiŋuee ní ti-Dindaan sòon̄ nì mi yii:

²¹«Nisaaleen, m nyīī ki kɔ́fì Eejipiti bɔtiu Faaroo ŋal. Ubɔ kaa bí ki dáaĺ-u àá ki ŋá-u nnyɔkɔ. Ubɔ mun kaa tí nyàab̄ kiŋaabiki ki fìn̄-u ú bàà fàtīí ká mpɔn kí ŋúb́ kitàataajiki.

²²Too, man ni-Dindaan Unimbɔti nín sòon̄ yii m làá jáǹ Faaroo, Eejipiti bɔtiu. M làá nyīī kí kɔ̄fì u-ŋalii, ŋun pée kɔ́fèe nì ŋun dáá pɔ̄ɔ̄yee. U-tàataajiki làá ŋmátíí nyā u-ŋaan kí lítí.

²³Niinee ní ḿ jà Eejipiti yab kí kɔ́ǹ atimbun aban, m làá yàaǹ-bi kí kɔ́ǹ ntincamun.

²⁴M làá kūtì Babiloon bɔtiu mpɔn ní kí dū man m-ba tàataajiki kí ŋúbiǹ-u. M làá nyīī kí kɔ̄fì Faaroo ŋalii, ní ú nīn dɔ̄ ki yáliŋkí u-nannanliu nimbiin kii unil un bi tīī tiweendi waa ti làá ŋmátée.

²⁵M làá kūtì Babiloon bɔtiu ŋalii mpɔn, ama ní Faaroo yai ń nīn jòon̄ fám. M làá dū man m-ba tàataajiki kí ŋúbiǹ-u ní ú dū-kì kí jáǹ Eejipiti yab. Niinee báà ŋma làá béé yii man di sá ni-Dindaan.

²⁶M làá yàntī Eejipiti yab ń yàl̄ kí kɔ́ atimbun aban, m làá yàaǹ-bi kí kɔ́ǹ ntincamun. Niinee bi làá béé yii man di sá ni-Dindaan.»