Read Ntcham Ezéchiel 31 Bible Online

Ezéchiel 31 - Ntcham bible

Ezéchiel 31

¹Bi nín cúú Isirayeel yab ki cūnnì kuyuŋu abin saalaa nì diba boon, uŋmatataati wimpeekaaŋuee ní ti-Dindaan sòon̄ nì mi yii:

²«Nisaaleen, tùkù Eejipiti bɔtiu Faaroo nì kunipaau kun pu u kā dibeelee yii: <Sii un cáá mpɔŋkpaan nee, m làá dū-si kí ŋmàntīǹ ba dee?

³A náań nì Leebanɔn subu bun bi yíì seedir bu cáá apan ŋin ŋān̄ ki tìì mboon ŋun taapu sɔ̀m̀ fílfilee ní. Busubuee fɔ̀kɔ̀ tiŋan ní bu-yilpu tùutī atagban.

⁴Ntaanyim yāntì bu wíiǹ. Kitiŋ taapu buŋŋu ŋubɔ yāntì bu yíkì ki jɔ́m̀. Nnyim nìn kōontí kí màntīí tū bu-nyaaŋyi, ní kí pùub̀ kí cù tisatin sufii kɔkɔ cee.

⁵Nnyim min u nìn kāntí tikpilee puee, bu nìn wíiǹ ki jítiǹ isufi in kíǹee kɔkɔ. U nìn cáá apan náaǹ ki lālim̀ ki cūtì ndan.

⁶Inoon kɔkɔ nì i-bulifi nìn pāantí i-diti bu-paŋŋi pu. Ipeel kɔkɔ nìn dɔ̀ ŋi-taapu ki màal̀ ní atimbun tikpil nìn kóò ŋi-booŋyi taapu.

⁷Busubuee nìn ŋān̄ ní ki fɔ̀kɔ̀ ní bu-paŋŋi béetì tiŋan pu, di sá yii bu-nyaaŋyi nìn kóò kitiŋ taapu taapu laakin nnyim wīikée.

⁸Unimbɔti kpaabunee, seedir subu bubɔ kaa bí bí dū-bu kí ŋmàntīǹ, siipreesi subu bubɔ kaa cáá apan ŋān̄ kii bu-yaŋee, plataani subu bubɔ faati kaa bàn̄ bu-faati ní busubu bubɔ kaa bí bukpaayee poon ki ŋān̄ nì bu.

⁹M nìn tīī-u apan ŋin ŋān̄ee áli gba Unimbɔti kpaabu Eedeen sufii kɔkɔ nìn cáá bu-pu ipoompoon ní.>»

¹⁰«Too, man ni-Dindaan Unimbɔti nín sòon̄ puee sèé: <Buseedirisubu wíiǹ. Bu yíkì ki tūū atagban ní ki kpántì ulambidaan.

¹¹An pu ní m dū-bu ki fá ní ki dū-bu ki ŋá kitiŋ pu bɔtiu un pɔ̄ɔ̄yee ŋaan. Busubuee nín ŋá ikpiti puee, míǹ ní ubɔtee làá ŋá-bu kí téeǹ.

¹²Binicambi bin néeń tipɔmbɔti tikpilee gāā-bu ki lúkú ní ki fātì bi-boon ki tīī-bu. Bu-paŋŋi kɔkɔ lítì ki dɔ̄ kitiŋee jooŋŋi pu nì ki-tantakaŋin. Binib bin kɔkɔ nìn kóò bu-booŋŋu taapuee yíkì ki dū kitiŋee ki fá.

¹³Inoon kɔkɔ nì i-bulifi dòoń ki tɔ̄kɔntí bu-dɔŋu pu ní ipeel kɔkɔ yùkufī ki póotí bu-paŋŋi pu.

¹⁴Tin bí nee kɔkɔ ŋá míǹ án nín làá ŋá pu isufi in yú ibun caŋinee bubɔ ń taa tí kɔ́ dilambilin kí wíiǹ kí tūū atagban, ní isufi in kāntí ntaanyimee bubɔ ń taa yòon̄ bu-ba yilpu kí fɔ̀kɔn̄ kí jītíǹ in kíǹee. Di sá yii isufi nì binib kɔkɔ bí kí kpú ŋwindal. Bi-kɔkɔ làá kɔ́ kitiŋ taapu kí cùú ŋàl̄ bin kpíì ki dɔ̄ niinee.>

¹⁵«Man ni-Dindaan Unimbɔti nín sòon̄ puee sèé: <Daliŋkin seedir subu nín cá ditaŋkpiilinee, m nìn yāntì tin kɔkɔ bí duulinyanee kāl̀ dikpool ní. Bu-puee, m yāntì mmɔɔnyim min bí kitiŋ taapuee bīiǹ bu-pu. M yāntì mi-buŋyi yúl̀, m cúú mi-nyim mí taa ti pùub̀. Bu-puee, m yāntì Leebanɔn bambaŋku kɔ́ dibɔmbɔndin ní ki yāntì tisatin sufii kɔkɔ kūń.

¹⁶M nín yāntì busubuee lítì kí cùú ŋàl̄ bin bí ditaŋkpiilinee, atimbun nib gbìl̄ ní ki kɔ́ dinyoondin. Ditaŋkpiilin niinee ní an mɔ́ɔkiǹ Eedeen kpaabun sufii nì Leebanɔn sufii in ŋān̄ ki kāntí ntaanyim tiŋanee.

¹⁷Bi mun kútì seediree pu ki sīntì ditaŋkpiilin ki cūtìi ŋàl̄ bin di kpíì kujaaunee. Bíǹ di nìn tíkí-u ní ki nìn kóò bu-booŋŋu taapu atimbun kansikin.>

¹⁸«Eedeen kpaabunee, busubu bubɔ kaa ŋān̄ àá ki wíiǹ ki bàn̄-si. Ama m làá yàntī sii nì bíǹ kɔkɔ ń sìntī kitiŋ taapu. Niinee sii nì bin kaa gíí dikpancandee nì bin kpíì kujaaunee di làá kpāfi kí dòon̄. Kun di làá bàń Eejipiti bɔtiu Faaroo nì u-samaau puee dee. Man ni-Dindaan Unimbɔti di sòon̄.»