Read Ntcham Ezéchiel 32 Bible Online

Ezéchiel 32 - Ntcham bible

Ezéchiel 32

¹Bi nín cúú Isirayeel yab ki cūnnì kuyuŋu abin saalaa nì ali boon, uŋmal saalaa nì uliliiti wimpeekaaŋu dalee ní ti-Dindaan sòon̄ nì mi yii:

²«Nisaaleen, gāā Eejipiti bɔtiu Faaroo ŋkpiisilan nee yii: <A bí atimbun kansikin kii digbikintipɔmbilee ní. Ama a nìn bí kii upɔɔnyaanee ní ki bí tiŋkun. A nìn yíkí ki dèentí nnyim pu. A nìn cáá a-taaŋi ki gbàtī nnyim. A nìn kùtī ibun nyim ki gbàtī-mì.

³Ti-Dindaan Unimbɔti sòon̄ yii binib tikpil yaa láa kpáfèe, m làá dāá tɔ̄ m-laaŋku a-pu ní an cúú-si ní bí dáaĺ kí nyāntí dimɔɔgbandi.

⁴M làá dāá dū-si kí lúkú kitiŋ ní kí dū-si kí tɔ̄ tisatin inoon kɔkɔ ń gbáb́ kí bìin̄ a-pu ní ipeel ń dāan̄ kí ŋmɔ́ a-wunti.

⁵M làá dāá dū a-wunti laakin kíǹee kí yàaǹ ajoon pu ní kí yàntī án gbí atantaka.

⁶M làá dāá dū a-fatikuu kí yàaǹ kitiŋ pu. An làá dāá bìin̄ ajoon pu kí gbí mbùmbiyaamu.

⁷A yaa kaa láa gíti bí dimaŋfalinee, m làá dāá dū tiba kí bìin̄ kutagbɔŋu pu ní iŋmalbijaa ń kpántí dibɔmbɔndi. M làá dū atagban kí bìin̄ ŋwìiń pu ní uŋmal kaa ti làá nīn ŋmíntí.

⁸A-puee, m làá yàntī iwalfi in kɔkɔ bí yilpuee ń kpántí dibɔmbɔndi ní kí yàntī kunyeeu ń mɔ́ a-tiŋki pu. Man ni-Dindaan Unimbɔti di sòon̄ míǹ.

⁹Anibul tikpil ki kpáaǹ ntimu mun ní a nyée nib yaa láa gbìl̄ m nín yāntì nnaabu ŋun jítì a-pueeyee, bi-pɔbiliŋ làá dāá bīil̀.

¹⁰Sii puee, anibul tikpil làá dāá kɔ́ kunimbaaun. M yaa láa tāntì m-tàataajiki bi-bɔtiibi nimbiinee, bi làá dāá kɔ́ dinyoondin. Ŋwiin ŋun a làá dāá lítée, bi-wunti làá dāá nīn jìkì di sá yii báà ŋma dāa kíǹ ki sūǹ u-ba pu ní.

¹¹«<Ti-Dindaan Unimbɔti nín sòon̄ puee sɔ̀. Babiloon bɔtiu janjaliibi làá cíliń a-pu.

¹²M làá tɔ̄ń bijanjaliibi bin néeń tipɔmbɔti ki jítiǹ báà ŋmee bí kpɔ̀ a-nib cutimaanyi nee. Bi làá nàan̄ Eejipiti ulambidaan ní kí kpɔ̀ kí céetí ki-nib kɔkɔ múb.

¹³M làá yàntī tiwaŋkuti tin a cáá Niil mɔɔgbandee kɔkɔ ń kpú. Binib àá tiwaŋkuti taaŋi kaa làá ti tāā kí gbàtī nnyim.

¹⁴M làá yàntī mí ŋùŋfì. Mì làá nīn dɔ̄ ki ŋùŋfī soooo kii ŋkpamee ní. Man ni-Dindaan Unimbɔti di sòon̄ míǹ.

¹⁵M làá yàntī Eejipiti tiŋki ń kpántí kii kuteeuee ní. M làá nyāntí tin kɔkɔ bí ki-poonee ní kí kpɔ̀ kí céetí ki-nib. Niinee bi làá béé yii man di sá ni-Dindaan.>

¹⁶«Atimbun kɔkɔ nimpoobi nín làá dāá gāā Eejipiti tiŋki nì ki-nib kuwaawiiu pu ŋkpiisilan ŋuŋyee dee. Man ni-Dindaan Unimbɔti di sòon̄.»

¹⁷Bi nín cúú Isirayeel yab ki cūnnì kuyuŋu abin saalaa nì ali boon, uŋmal saalaa nì uliliiti iwiin saalku dalee ní ti-Dindaan sòon̄ nì mi yii:

¹⁸«Nisaaleen, yāliŋkì Eejipiti yab kɔkɔ pu. A-yaliŋkii ń kpáaǹ bi nì atimbuŋkpaan ŋin kíǹee kí sìntī ditaŋkpiilin, laakin bin kpíìyee sìntēe.

¹⁹Tùkù-bi yii: A dàkafī yii a sɔ́ǹ bin kíǹee níii? Nín̄ sìntī ditaŋkpiilin kí cùú dòon̄ kí ŋàl̄ bin kaa gíí dikpancandee pu.

²⁰Di sá yii bi làá kpɔ̀ Eejipiti yab dikɔ̀ndin ní. Ntàataajimu bɔ́ntì kí kpɔ̀ binib. Mú kpɔ̀ Eejipiti yab nì bi-janjakitil kɔkɔ.

²¹Ditaŋkpiilinee, bibaatandambi nì bin nìn kútì Eejipiti yab pu bi jáńee làá dāá téeń yii: <Bin ní bi kūū kujaaunee, bi nín sìntī kí cùú dòon̄ kí ŋàl̄ bin kaa gíí dikpancandee pu.>

²²«Asuur bɔtiu nì u-janjakitil bí niin. U-janjaliibi kaakuliŋ māntìi tú-u. Bi kūū bi-kɔkɔ kujaaun ní.

²³Bi-kaakuliŋ bí ditaŋkpiilin taapu taapu ki māntìi tú ubɔti kaakul. Bíǹ bin di nìn yàntī binifoobi kóò dinyoondinee, bi kūū bi-kɔkɔ kujaaun.

²⁴«Eelam bɔtiu nì u-janjakitil bí niin. U-janjaliibi kaakuliŋ māntìi tú-u. Bi kūū bi-kɔkɔ kujaaun ní. Bíǹ bin kaa gíí dikpancandi ki nìn fàantí binifoobee sīntìń kitiŋ taapu. Kɔŋkɔnnee, bi kútì bin kɔkɔ sīntì ditaŋkpiilinee pu ki tú icoo gbòooo.

²⁵Eelam bɔtiu nì u-janjakitil dɔ̄ bin bi kūū kujaaunee kansikin. U-janjaliibi kaakuliŋ māntìi tú-u. Bin baa gíí dikpancandi nee kɔkɔee, kujaaun ní bi kūū-bi. Bíǹ puee, binib wunti nìn gbáà ní kpàkpakpa binifoobi tiŋkin. Kɔŋkɔnnee, bi kútì bin kɔkɔ bi kūū kujaaunee pu ki tú icoo gbòooo.

²⁶«Meeseeki nì Tuubaal bɔtiibi mun bí niin, bi nì bi-janjakitil. Bi-janjaliibi kaakuliŋ māntìi tú-bi. Bin baa gíí dikpancandi nee kɔkɔee, kujaaun ní bi kūū-bi. Bíǹ puee, binib wunti nìn gbáà ní kpàkpakpa binifoobi tiŋkin.

²⁷Baa síb́-bi cannaaku baatandambi bin nìn fàantí binib binifoobi tiŋkinee cee. Bi nín sìntī ditaŋkpiilin ki ŋúb́ bi-janjawanti. Bi dū bi-tàataajimmu ki kūĺ bi-yiliŋ ní ki dū bi-gbampɔɔŋi ki páaǹ bi-pu.

²⁸Eejipiti yab, ni mun yuntiŋu bāań dee, ni làá kpú ní bí síb́-ni bin kaa gíí dikpancandi ki kpíì kujaaunee kansikin.

²⁹«Eedoom yab nì bi-bɔtiibi nì bi-bɔtibiliŋ mun bí niin. Nì min kamaa bi cáá dipɔbilee, bi dū-bi ki kútì bin bi kūū kujaaunee pu. Bi síb́-bi ki kútì bin kaa gíí dikpancandi ki sīntì ditaŋkpiilinee pu.

³⁰«Ŋgan pú nibuliŋ kpootiliibi mun bí niin, ki kpáaǹ Siidɔn yab bin sīntì ditaŋkpiilinee. Bi nìn sá bibaatandambi ní binib nìn fàŋkí-bi yɔ́kɔ́ yɔkɔ. Ama kɔŋkɔnnee, binib bin baa gíí dikpancandi gbantee kpíì ki cūtìi ŋàl̄ bin bi kūū kujaaunee pu. Bi tú icoo ní gbòooo, bi nì bin kɔkɔ bí ditaŋkpiilinee.

³¹«Faaroo yaa láa ká bijanjaliibi gbanti kɔkɔ niinee, án làá dāá ŋméeǹ-u tin bāań u-janjaliibee pu. Di sá yii bi làá kpɔ̀ u nì u-janjaliibi kujaaun. Man ti-Dindaan Unimbɔti di sòon̄.

³²M yāntì Faaroo kɔ́ǹ binib dinyoondi binifoobi tiŋkin. Ama kɔŋkɔnnee, bi làá síb́ úǹ u-ba nì u-janjaliibi binib bin kaa gíí dikpancandi ki kpíì kujaaunee kansikin. Man ni-Dindaan Unimbɔti di sòon̄.»