Read Ntcham Ezéchiel 33 Bible Online

Ezéchiel 33 - Ntcham bible

Ezéchiel 33

¹Ti-Dindaan bí-mi yii:

²«Nisaaleen, sòoǹ nì Isirayeel yab kí tùkù-bi yii: M yaa dū kujaau ki tɔ́ kitiŋ kiba puee, kitiŋ gbanti yab lèekī bi-kansikin ubɔ ní ú nīn sá bi-ciitiliu.

³Uciitilee yaa wál̀ bijanjaliibi dòoń kí jáǹ-bee, u búǹ ŋyin ní kí kpāafì samaa.

⁴Ubɔ yaa gbìl̄ ŋyin pu ní kaa fātìi tɔ́ ní bi yaa dɔ́miń ki kūū-uee, udaan kúm kpuulool làá lítí úǹ u-ba pu ní.

⁵U gbìl̄ bi nín búń ŋyinee ní kaa fātìi tɔ́. U-kúm kpuulool làá fàtīí gítí úǹ u-ba pu ní. U yaa bàà dūu túń ditundee, u bàà fìil̄ u-ba ní.

⁶Ama uciitilee yaa wál̀ bijanjaliibi dòoń kí jáǹ-bi ní waa búń ŋyinee, samaa kaa làá béé yii tiba bí ki dòoń. Unannanli yaa dūu túuǹ ubɔ ki kūū-uee, uciitilee bɔti dee. M làá dāá bàlifì uciitil un bi kūūyee fatikuu pu.

⁷«Nisaaleen, sii ní m dūu síiǹ á nīn sá Isirayeel nibul pu uciitil. Á pīlifì m-nyɔɔbuŋŋi kí dūú nàatī Isirayeel yab kí kpāafì-bi.

⁸M yaa tùkū unikpiti yii: <Unikpiti, a làá pée kpú ní>, ama ní sii kaa kpáafì-u ú kpántí u-bimbimee, unikpiti gbanti làá kpú u-kpitii pu, ama sii ní m làá dāá bàlifì u-fatikuu pu.

⁹Ama a yaa kpáafì unikpiti ú bàà kpántí u-bimbim ní waa kpántèe, u làá kpú u-kpitii pu ní sii ń fīī a-ba.»

¹⁰«Sii nisaaleen, tùkù Isirayeel yab bi nín bí ki lì yii: <Ti-yìntitam nì ti-kpitii nyìm̀ ti-pu. I-puee, taa ti cáá mpɔn báà fiii. Ti làá ŋá mana ní kí ŋmátí nan?>

¹¹Tùkù-bi yii m bí dimaŋfalin! Man ni-Dindaan Unimbɔti nín sòon̄ yii, unikpiti kúm bɔti kaa mɔ̄ǹ-mi. Kun m pée nyàab̀ee di sá ú kpántí u-bimbim kí nīn bí dimaŋfalin. Isirayeel yab, m gbàam̄-ni ní, fámaan ni-bimbikpitim. Ba pu ní ni là kí kpú ní?

¹²«Sii nisaaleen, tùkù a-nibul yab yii: <Deedeedaan yaa kíĺ ki bíi ŋáań tin kaa ŋān̄ee, deedee tuuŋŋi ŋin u ŋá an jítèe kaa làá fīī-u. Ama unikpiti yaa fá u-bimbikpitim, ikpiti in u ŋá an jítèe kaa làá yàntī ú wāŋkì. An puee deedeedaan yaa kíĺ ki bíi ŋáań ikpitee, deedee tuuŋŋi ŋin u nìn ŋá dooooyee kaa làá ŋmā kí fīī-u.

¹³M yaa pōoǹ kí tīī deedeedaan dimaŋfal ní u dākafì yii deedee tuuŋŋi ŋin u ŋá an jítèe wíiǹ ní u kíĺ ki bíi ŋáań ikpitee, bi làá súntí u-deedee tuuŋŋee kɔkɔ pu ní ú kpú ikpiti in ní u ŋée pu.

¹⁴Ama m yaa kpáafì unikpiti yii u máaǹ ŋkúm ní u fá u-bimbikpitim ki kíĺ ki kíǹ ki bíi ŋáań tin kítèe nì tin bí deedeeyee, waa làá kpú.

¹⁵U yaa gíiǹ toolima un ubɔ cáań ki yóoǹ u-ceeyee ki tīī-u, àá u gíiǹ tin u yùn̄ee ki tīī uwandaan ki kíĺ ki kíǹ ki tɔ́ marab bin tìì dimaŋfalee, ní kaa ti bíi ŋáań ikpitee, udaan làá pée ŋmátí ní, waa làá kpú.

¹⁶Bi làá súntí u-tuŋkpitiŋ ŋin ní u ŋée kɔkɔ pu ní ú ŋmátí, di sá yii u kíĺ ki bíi ŋáań tin kítèe nì tin bí deedeeyee.

¹⁷«A-tiŋkin nib lì yii man ni-Dindaan nín ŋáań puee kaa kítì. Ama an sá bíǹ nín ŋáań puee di kaa kítì!

¹⁸Deedeedaan yaa gbēeǹ kaa ti bíi ŋáań deedee tuuŋŋi ní ki bíi ŋáań tikpitilee, see ú kpú.

¹⁹Ama unikpiti yaa fá u-bimbikpitim ní ki kíĺ ki bíi ŋáań deedee tuuŋŋi nì tin kítèe, u làá ŋmátí an pu.

²⁰«Ama ní nimbi Isirayeel yab lì yii man nín ŋáań puee kaa kítì! Too, ní béé yii m làá sòoǹ báà ŋma bɔti kí nóó nì tin u ŋée ní!>»

²¹Bi nín cúú Isirayeel yab ki cūnnì kuyuŋu abin saalaa nì ali boon, uŋmal usaalaati wiŋŋmooŋmootiŋu dalee, uninja ubɔ nìn sáǹ ki nyáń bin jáń ki fōō Jeerusaleem tiŋkee ŋaan ní u bí-mi yii: «Bi jáń ki fōō Jeerusaleem tiŋki!»

²²Kí wàatī ú bàń m-cee kujoouee ní ti-Dindaan yāntì m gbìl̄ u-pɔŋŋu m-ni ní m kíǹ ki ŋūǹ kí sòoǹ. Kutaa wúntì ŋyunti ŋun un sáǹ ki ŋmátèe bāań m-ceeyee, maa nìn gíti sá umuun, m nìn kíǹ ki ŋūǹ kí sòoǹ.

²³Ní ti-Dindaan bí-mi yii:

²⁴«Nisaaleen, binib bin kíǹ ki kóò Isirayeel timmu mun kpántì adigbuŋkatee lì yii: <Abraam nìn bí u-baba ní, ama ní ki nìn yì kitiŋ nee kɔkɔ. Kin ataa aŋa pu ní baa làá dū kitiŋ nee kí tīī timbi bin wīikí nee tí nīn yì.>

²⁵Too, tùkù-bi tin man ni-Dindaan Unimbɔti cáá kí sòoǹ nì bee yii: <Ni ŋmóò tinan tin poon ní fatiku kēe, ki tòotī awaa, ki kù binib, kin mana ní ni ŋūǹ kí lì yii nimbi di yì kitiŋ nee>.

²⁶Ni-janjawanti ŋmaniŋma pu ní ni máká. Ni ŋáań ntimbiil tuuŋŋi, ki fòol̄ ni-jutiibi nimpoobi, kin mana ní ni ŋūǹ kí lì yii nimbi di yì kitiŋ nee?

²⁷«Tùkù-bi yii man bi-Dindaan Unimbɔti nín sòon̄ puee sèé: <M bí dimaŋfalin! M bíi tùkù-ni yii bin kíǹ ki bí ntimu mun kpántì adigbuŋkatee poonee, bi làá dū ntàataajimu kí kpɔ̀-bi, ní ipeecuncuti ń tɔ̀ntī bin bí tisatinee ní bìlbil kúm ń kpɔ̀ bin sáǹ ki bál̀ ajoon pu nì itaŋkpalɔkɔnee.

²⁸M làá nàan̄ kitiŋ nee ní kí yàntī kí kpántí kuteeu. Mpɔn ŋun di nìn yàntī bin kóò kinee cáá dilambilee làá kúntí. Isirayeel jooŋŋi làá kpántí kii kuteeuee ní, ubɔ kaa làá ti dī niin kí cù laaba.>

²⁹M làá yàntī kitiŋ nee ń kpántí kii kuteeuee ntimbiil tuuŋŋi ŋin Isirayeel yab ŋáaǹee pu. Ŋyunti gbantee, bi làá béé yii man di sá bi-Dindaan.

³⁰«Nisaaleen, pīlifì, a-tiŋkin nib kpáfí digundi din bi máń ki tú kitiŋee caŋin àá bi-diiŋŋi nyɔkɔpu ki sòoǹ a-bɔti. Bi sòoǹ nì tɔb yii: <Tí cùú pīlifì tin ti-Dindaan cáá kí tùkù-tee>.

³¹Niinee ní a-tiŋkin yab ń kóoǹ kí kpāfì ki kā a-nimbiin kí pīlifì tin a cáá kí sòoǹee, ama baa tɔ́ tin a sòoǹee. Bi nín là puee ní bi ŋáań ní ki nyàab̀ bíǹ bi-ba paatii.

³²Tiŋmanee, a bí kii ulaŋgaanyaan un neen mɔ̄ bi bɔ̀ɔ́ tibɔɔkaal ki kìntēe ní. Bi pílifí a-bɔti, ama ní kaa cáa tūǹ nì ditundi.

³³Tin a sòon̄ nee kɔkɔ yaa láa bāań, ní an lafun dòoń mun, bi làá dāá béé yii ubɔnaatil ubɔ nìn kāl̀ bi-kansikin.»