Read Ntcham Ezéchiel 34 Bible Online

Ezéchiel 34 - Ntcham bible

Ezéchiel 34

¹Ti-Dindaan bí-mi yii:

²«Nisaaleen, dū m-bɔti tin jáà nì Isirayeel kpootiliibi nee kí nàatī-bi. Dū m-bɔti kí nàatī-bi kí tùkù-bi yii: <Man ni-Dindaan Unimbɔti nín sòon̄ puee sɔ̀. Nimbi bin kpàá Isirayeel yabee, mbusu dɔ̄ ki cí-ni, di sá yii nimbi ni-ba ní ni kpàá! An kaa sá ipii ní upikpaal máaǹ kí kpààa?

³Ama nimbee, ipii biim ní ni nyù, ní ki cēē i-kuti ki lù tiwampeeŋkaal ki pèentí ní ki kù tiwaŋkuti tin cáá ŋkpamee ki ŋmóò, ama ní ipii bɔti kaa ká-ni.

⁴Naa tīī ipii in pɔ̀fèe mpɔn, kaa cáaǹ in būǹee. Naa nyàab̄ ŋŋaabu ki bóob́ un taal gíìyee, kaa gíiǹní un kākatì u-ba ki wāatì kupicaŋkpuŋuee, ní kaa tí nyàab̄ un nìn wáŋkèe. Ama ni dū mpɔn nì nnimbinaakulim ní ki kpōotì-bi.

⁵Niinee ipii túĺ laakin i yaa kée, di sá yii iaa nìn gíti cáá ukpaal, ní ki kpántì tijin ki tīī ipeel.

⁶M-piii kpátìi gbí ajoon kɔkɔ nì ŋgbantamu kɔkɔ pu. I yàl̄ kitiŋ nee kɔkɔ pu ní ubɔ kpá kí nyàab̀-i, ní an kaa ká báà ubɔ mun.

⁷An puee, Isirayeel pikpaaliibi, ní pīlifì tin m cáá kí tùkù-nee:

⁸M bí dimaŋfalin! Man ni-Dindaan Unimbɔti nín sòon̄ puee sɔ̀. M-piii kɔ́ binaayub ŋaan. I nín kaa cáá bikpàaliibee puee, ipeecuncuti cúú-i ki tɔ̄ntì. Di sá yii m-pikpàaliibi kaa cūtìi nyàab̄ m-piii. Ama bipikpaaliibi gbanti kpàá bi-ba ní kaa fātìi tɔ́ m-piii.

⁹Too, Isirayeel pikpaaliibi, pīlifìmaan tin man ni-Dindaan bíi sòon̄ee:

¹⁰Man ni-Dindaan Unimbɔti bíi tùkù-ni yii m làá jáǹ-ni ní kí fōō m-piii ni-ŋaan. Maa làá ti yàntī ní kpàà m-piii. An yaa ŋá mimmee, naa làá ti jī i-pu. M làá dáaĺ m-piii kí nyāntí ni-nyɔmmun, ní iaa làá ti kpántí tijin kí tīī-ni.

¹¹«Man ni-Dindaan Unimbɔti nín sòon̄ puee sɔ̀. Kí yòon̄ kɔŋkɔnnee kí nīn cée, man m-ba di làá cù kí nyàab̀ m-piii ní kí kpàà-i m-ba.

¹²Kii upikpaal piii nín yaa yàl̄, u péetí-i kí kpāfì puee, míǹ ní m làá kpàà m-piii. M làá cù kí nyàabìń m-piii laakin kɔkɔ ní i yàl̄ ki cūtì dipɔ̀ńdi nì dibɔmbɔndi dalee.

¹³M làá nyāntí-i anibul kansikin ní kí kóoǹní-i nnicantimun kí kpāfì ní kí fàtīí gíiǹní-i i-tiŋkin. M làá cáá-i kí cùnnì Isirayeel jooŋŋi pu nì atantakan nì kitiŋ nee jaŋŋi laakin kɔkɔ ní binib kóòyee kí kpàà-i.

¹⁴M làá cáá-i kí cùnnì kunaakpaapɔɔu kumɔntiiun. I làá ká timool Isirayeel jooŋŋi pu kí ŋmɔ́. Niin ní i làá ká timɔmɔntiil taapu kí dòon̄ kí ŋùŋfì, ní kí ká Isirayeel jooŋŋi pu laakin kitiŋ ŋān̄ee timool kí ŋmɔ́.

¹⁵Man m-ba di làá kpàà m-piii ní kí yàntī í ŋùŋfì. Man ni-Dindaan Unimbɔti di sòon̄ míǹ.

¹⁶Upii un wáŋkèe, man m-ba di làá nyàab̀-u. Un búntì ndanee, man di làá fàtīí gíiǹní-u. Un fōō tiweendee, man di làá nyàab̀ ŋŋaabu kí fìn̄-u ní kí tīī un būǹee mpɔn. Ama upii un di bí màlmal ki pɔ̄ɔ̄yee, m làá lēē-u. M làá dū deedee marab ní kí kpòotī m-piii.»

¹⁷«Nimbi m-piii, man ni-Dindaan Unimbɔti nín bíi sòoǹ nì ni puee sèé: <Man di làá sòoǹ kí ŋāŋkì m-waŋkuti kansikin, kí sòoǹ ipijaa nì iŋɔjaa bɔti.

¹⁸An kaa fáatiǹ ni-kansikin bi-ba bí ŋmɔ́ kunaakpaapɔɔu moomɔntiiti. Ba di yì míǹ? Ba pu ní ni tà timool tin kíǹee ní? An kaa bàn̄-ni ní nyɔ̀ nnyim min wāĺ kílkil neeee? Ba pu ní ni cáá ni-taaŋi ki tà ki gbàtī nnyim min kíǹee ní?

¹⁹See m-piii in kíǹee ń ŋmɔ́ timool tin ni tàn̄ tàn̄ee ní kí nyɔ̀ nnyim min ni gbātèe.

²⁰An pu ní man ni-Dindaan Unimbɔti sòon̄ yii man m-ba di làá nīn sá m-piii in gbìfèe nì in bí ŋkaŋkalimuee kansikin ubɔsoonli.

²¹Di sá yii ni dū ni-gbigbipati nì ni-takakalii ki yáŋkì ipii in būǹee, ní ki dū ni-yiŋyi ki sāatì-i ki nyántì kupicaŋkpuŋu kansikin.

²²An puee m làá dāan̄ kí jòoń-bi, án nín làá ŋá pu bí taa dāan̄ kí yɔ̀-iee. Man di làá nīn sá nimbi nì bíǹ kansikin ubɔsoonli.

²³M làá yàntī upikpaabaanti nín kpàà m-piii. Úǹ di sá m-tɔntɔnliu Daafiidi. U làá kpàà m-piii ní kí nīn sá i-pikpaaliu.

²⁴Man ni-Dindaan, man di làá nīn sá bi-Nimbɔtiu ní man tɔntɔnliu Daafiidi ń nīn sá bi-bɔtibil. Man ni-Dindaan di sòon̄.

²⁵«Man nì m-piii làá ŋá ŋgbansɔŋfi pèéŋu ní kí kúntí ipeel kitiŋ nee pu. Niinee m-piii làá ŋmā kí nīn bí ŋgbansɔŋfin kuteeun ní kí dòon̄ kubambaŋŋun kí gèeǹ.

²⁶M làá yàntī bí nīn kóò m-circir jool caŋin. M làá yàntī utaa ń nīn nì ŋyunti ŋun ní an máaǹee, utaa gbanti làá nīn sá dibiindi taau ní.

²⁷Isufi làá lòoǹ abil ní kitiŋ ń lòoǹ tikpaajin ní báà ŋma ń nīn bí ŋgbansɔŋfin kitiŋ nee poon. M làá gbá kí tìl̄ ikusaka in di ŋúb́-bee ní kí nyāntí-bi kuyuŋu kun poon bi bée. Ŋyunti gbantee bi làá béé yii man di sá bi-Dindaan.

²⁸Binicambi kaa ti làá yɔ̀-i ní ipeecuncuti kaa ti làá cúú-i kí ŋmɔ́. Bi làá nīn bí ŋgbansɔŋfin ní ubɔ kaa làá fàaǹ-bi.

²⁹M làá tīī-bi tikpaatan tin di lòoǹ tiŋanee. Ŋkùm kaa làá ti cúú-bi kitiŋ nee poon. Atimbun ŋin kíǹee kaa làá ti kpèè-bi fám.

³⁰Báà ŋma làá dāá béé yii man bi-Dindaan bi-Nimbɔtiu bí bi-cee, ní Isirayeel yab lafun sá man nibul. Man ni-Dindaan Unimbɔti di sòon̄ míǹ.

³¹«Nimbi m-piii, m-piii in ní m kpàáyee, nimbi binib, man di sá ni-Nimbɔtiu. Man ni-Dindaan Unimbɔti di sòon̄.»