Read Ntcham Ezéchiel 36 Bible Online

Ezéchiel 36 - Ntcham bible

Ezéchiel 36

¹«Nisaaleen, fōō m-cee Isirayeel jooŋŋi bɔti kí dūú nàatī. Tùkù-ŋi ŋí pīlifì man ni-Dindaan nyɔɔbundi.

²Man ni-Dindaan Unimbɔti nín sòon̄ puee sɔ̀. Ni-nannanliibi nín bēel̀-mi ki lī yii: <Àa! Àa! Kɔŋkɔnnee Isirayeel cannaaku jooŋŋi nee kpántì ti-yaŋ dee!>

³Too, dū m-bɔti kí nàatī kí tùkù-bi yii man ni-Dindaan Unimbɔti nín sòon̄ puee sèé: <Ijaan kɔkɔ puee, bi nāaǹ-ni ki kā ni-pu ki bàà là yii ní kpántí atimbun ŋin kíǹee wanti. Bi bēel̀-ni ki sīī-ni.>

⁴An puee Isirayeel jooŋŋi, pīlifìmaan m-nyɔɔbuŋŋi! Man ni-Dindaan Unimbɔti, m bíi sòoǹ nì ajoon nì ŋgbantamu nì mbùmbiyaamu nì atantaka nì adigbuŋkati nì ntimu mun ni yíkì ki dūu fá anibul ŋin māntìi tú-nee fúkúl̀ ki sīīyee.

⁵Man ni-Dindaan Unimbɔti sòon̄ m-ŋuul poon kí jáǹ atimbun ŋin kɔkɔ kíǹee nì Eedoom tiŋki kɔkɔ. Di sá yii nì dipɔɔpiŋkpaandi nì kpeefam ní bi fōō m-tiŋki nì ki-naakpaapɔɔku ki gāā bi-bindi.

⁶An puee á fōō m-bɔti tin sòoǹ Isirayeel tiŋki puee kí nàatī. Nàatī ajoon nì ŋgbantamu nì mbùmbiyaamu nì atantaka tin man ni-Dindaan Unimbɔti sòon̄ee yii: M làá yàntī m-ŋuul ń tɔ̄ di-tundi. Atimbun ŋin kíǹee sīī-ni ki kpēē ki sīŋkiǹ-ni.

⁷Too, man ni-Dindaan Unimbɔti nín sòon̄ yii bi làá kpèè kí sìŋkīǹ atimbun ŋin māntìi tú-ni nee.

⁸Ŋyunti gbantee, isufi in bí Isirayeel jooŋŋi puee làá tɔ̄ apan kí lòoǹ abil kí tīī nimbi m-nibul Isirayeel yab. Di sá yii ni làá fàtīí gítí ni-tiŋkin án kaa làá yúntí.

⁹M bí ni-cee, m làá fàtī m-ba kí túĺ-ni, ni làá kpɔ̀ ni-sati kí bɔ̄l̀.

¹⁰Isirayeel tiŋki kɔkɔnee, m làá yàntī ní bùtī. Binib làá fàtīí kɔ́ ni-timmun, di sá yii bi làá fàtīí mā adiin ŋin nìn lítèe.

¹¹Binib nì tiwaŋkuti làá bùtī. Ni làá nīn wīikí ní kí màal̀ mbiyaamu tikpil. Kitiŋ nee làá fàtīí ká ki-nib kii an nín nìn bí pu dooooyee, ní kí yàntī án bútí-ni kí jītíǹ dooooyee. Niinee ni làá béé yii man di sá ni-Dindaan.

¹²Isirayeel yab, m-nibul, m làá yàntī ní còom̀ kitiŋ nee kɔkɔ poon. Ni làá fōō-kì ní kí nīn kíǹ ki sá ni-yaka. Kàa ti làá kpɔ̀ ni-biyaamu.

¹³Man ni-Dindaan Unimbɔti nín sòon̄ puee sɔ̀. Binib lì yii Isirayeel tiŋki tɔ̀ntī ki-nib ní ki kù bi-biyaamu.

¹⁴Too, kitiŋ nee kaa làá ti tɔ̀ntī ki-nib kaa làá ti kpɔ̀ bi-biyaamu. Man ni-Dindaan Unimbɔti di sòon̄ míǹ.

¹⁵Naa làá ti gbìl̄ atimbun ŋin kíǹee beelii àá ŋi-siibiliŋ pu. Di sá yii ni-tiŋki kaa ti làá nīn kù ki-biyaamu. Man ni-Dindaan Unimbɔti di sòon̄ míǹ.»

¹⁶Ti-Dindaan bí-mi yii:

¹⁷«Nisaaleen, pīlifì! Isirayeel yab nín nìn dáá kóò bi-tiŋkinee, bi nìn dū bi-bimbikpitim nì bi-tuŋkpitiŋ ki kɔ́ǹ bi-tiŋki tijɔkɔndi. Bi-bimbim nìn bí m-cee kii unimpu nín yaa ká u-ba u bí tijɔkɔndin puee ní.

¹⁸Bi dū nnikpaakoon nì iwaatooti ki kɔ́ǹ kitiŋ tijɔkɔndi. An pu ní m kpáatì m-ŋuul ki sītì bi-pu.

¹⁹M jìn̄-bi ki kɔ́ǹ atimbun aban nì nnicantimun. Bi-bimbim nì bi-tuuŋŋi nín cáań-bi m-tafadaaldi diŋyee dee.

²⁰Atimbun ŋin kɔkɔn bi cūtèe, binib kpēē m-circir yindi fám bi-pu. Di sá yii bi nìn lì yii: <Ti-Dindaan nibul nìn yá, bi yíkì u-tiŋki pu.>

²¹An nìn páb́-mi ḿ ká yii atimbun aba bí ki kpèé m-circir yindi fám Isirayeel yab bin nìn dòoń bi-ceeyee kpitii pu.

²²An puee, á nàatī-bi tin man ni-Dindaan Unimbɔti sòon̄ee yii: <Isirayeel yab, kun m làá ŋée, an kaa sá ni-pu ní m làá ŋá, ama an sá m-circir yindi din ní ni bíil̀ atimbun ŋin poon ni cūtèe pu ní m làá ŋá míǹ.

²³Ni-puee, atimbun ŋin kíǹee nib kpēē m-yindi fám. An puee, m làá dàkà-bi yii man di sá Unimbɔtikpaan nì circirdaan. Ni-pu ní m làá dī kí dàkà-bi tíǹ gbanti kɔkɔ. Niinee bi làá béé yii man di sá ni-Dindaan, man ni-Dindaan Unimbɔti di sòon̄ míǹ.>

²⁴«M làá nyāntí-ni atimbun kansikin, m làá kóoǹní-ni ntimu mun kɔkɔ poon ní ni bée ní kí fàtīí gíiǹní-ni ni-tiŋkin.

²⁵M làá kpáatí nnyim min bí circiree kí sìtī ni-pu, ní kí ŋá-ni circir. M làá fíntí-ni kí nyāntí ni-jɔkɔntuuŋŋi kɔkɔ poon nì ni-waatootii poon.

²⁶M làá tīī-ni dipɔɔpɔndi ní kí dū ŋfampɔm kí ŋá ni-ni. M làá lēē ni-pɔbil din pɔ̄ɔ̄ kii ditaŋkpalee ni-ni, ní kí tīī-ni dipɔbil din pɔ̀fì ki gbìl̀ tibɔti taapuee.

²⁷M làá dū m-Fam kí ŋá ni-ni. M làá yàntī ní ŋmā kí nīn tɔ́ m-marab ní kí ŋúb́ m-bɔkpaaŋi kí ŋá ŋi nín bí yii ní ŋá puee.

²⁸Niinee ni làá ŋmā kí kɔ́ kitiŋ kin ní m tīī ni-naanjabee poon. Ni làá nīn sá m-nibul ní man ń nīn sá ni-Nimbɔtiu.

²⁹M làá nyāntí-ni ni-jɔkɔnti kɔkɔn. Maa làá ti dū ŋkùm kí tɔ̄ ni-pu, ama m làá yàntī ni-bileeu ń nyā ní kí lòoǹ tikpil.

³⁰M làá yàntī ni-sufii ń lòoǹ abil tikpil tikpil ní ni-kpaajinti mun ń lòoǹ tiŋan tiŋan. An yaa ŋá mimmee, ŋkùm kaa làá ti cúú-ni ní kɔ́ icoon atimbun ŋin kíǹee kansikin.

³¹Niinee ni làá téetí ni-bimbikpitim nì ni-tuŋkpitiŋ pu. Ni-naŋki làá nyā nì ni-ba ni-kpitii nì ntimbiil tuuŋŋi ŋin ni ŋée pu.

³²Ní béé yii an kaa sá ni-pu ní m làá ŋá míǹ, man ni-Dindaan Unimbɔti di sòon̄ míǹ. Isirayeel yab, ní yàntī ni-bimbim ń kɔ́ǹ-ni icoo ní yāliŋkì i-pu!

³³«Man ni-Dindaan Unimbɔti nín sòon̄ puee sɔ̀. M yaa láa fíntì-ni ki nyántì ni-kpitii kɔkɔ poon ni nyáń dándanee, m làá yàntī binib ń fàtīí kɔ́ ni-timmun ní bí fàtīí mā adiin ŋin nìn lítèe.

³⁴Ni làá fàtīí kpɔ̀ tikpaatan tin ni nìn dūu fée, bisanjitiliibi kaa làá ti ká yii bi dū tikpaatan ki fá.

³⁵Bi làá lì yii: <Kitiŋ kin bi nìn dūu fée fātìi kpántì kii Eedeen kpaabuee. Ntimu mun poon bi nìn gbáń ki wīil̀ adiin an kpántì adigbuŋkati ŋmee, bi fātìi máń adiin binib kíǹ ki kóò mu-ni.

³⁶Niinee atimbun ŋin dáá gbíntìi bí ki māntìi tú-nee làá béé yii man di sá ni-Dindaan, un di fàtīi māā ntimu mun poon bi gbáń ki wīil̀ adiinee, ní ki fàtīi cōontí tin bi fùkū ki fée. Man ni-Dindaan di sòon̄ ní tin m yaa sòon̄ee, tíǹ ní m ŋáań.

³⁷«Man ni-Dindaan Unimbɔti nín sòon̄ puee sɔ̀. M làá yàntī Isirayeel yab ń mèè-mi ní ḿ kíí-bi ní kí yàntī bí bùtī kii ipiiyee.

³⁸Dooooyee, binib yaa nìn kpáfì kí jī jiŋaalibee, ipii in bi nìn cáa ŋáań saraabee nìn gbéè Jeerusaleem tiŋkin ní. Bi nìn cāabìń-i tipicaŋkpun tipicaŋkpun ní. Míǹ ní binib bin làá dāan̄ kí kɔ́ ni-timmu mun kpántì adigbuŋkati nee làá nīn wīikí. Niinee, báà ŋma làá béé yii man di sá ni-Dindaan.»