Read Ntcham Ezéchiel 37 Bible Online

Ezéchiel 37 - Ntcham bible

Ezéchiel 37

¹M nìn gbìl̄ ti-Dindaan pɔŋŋu m-ni ní u-Fam yōoǹ-mi ki cáa yóoǹ ditantakal diba kansikin. Akpab di nìn gbí ditantakalee poon.

²Ti-Dindaan nìn yāntì m māntìi tú akpabee ditantakalee poon. Akpabee nìn wīikí tikpilku ní ki nìn kūń.

³Niinee ní ti-Dindaan bālifì-mi yii: «Nisaaleen, mimmee akpab nee ŋūǹ kí fàtīí ká dimaŋfalaaa?» Ní m kíí yii: «M-Dindaan Unimbɔti, sii baba di nyí.»

⁴Ní u bí-mi yii: «Fōō m-bɔti kí nàatī akpab nee. Tùkù-ŋi yii: <Akpakulim, pīlifìmaan ti-Dindaan nyɔɔbundi!

⁵Ti-Dindaan Unimbɔti nín bíi sòoǹ nì ni puee sɔ̀. M làá cáań dimaŋfal fooku kí ŋá ni-ni, ní ní fàtīí ká dimaŋfal.

⁶M làá dū igiin kí páań ni-pu ní kí yàntī tiwunnan ń nyā ni-pu ní kí dū ŋwuŋgban kí bìin̄. M làá dū dimaŋfal fooku kí ŋá ni-ni, ní ní fàtīí ká dimaŋfal. Niinee ni làá béé yii m sá ni-Dindaan.>»

⁷Ní m dū tibɔtee ki sòon̄ nì akpabee kii ti-Dindaan nín kpáafì-mi puee. Ŋyunti ŋun m bíi sòoǹee ní m gbìl̄ kuwoou kubɔ pu ní akpabee kíĺ ki bíi sútí ki pìl̀ tɔb.

⁸M bíi kpèéyee ní ki ká yii igiin páaǹ ŋi-pu, ní tiwunnan nyáń ki páaǹ ní ŋwuŋgban dūu bīiǹ. Ama dimaŋfal fooku kaa nìn dáá bí ŋi-ni.

⁹Niinee ní ti-Dindaan bí-mi yii: «Nisaaleen, fōō m-nyɔɔbundi kí dūú sòoǹ nì dimaŋfal fooku yii: <Dimaŋfal fooku, ti-Dindaan nín sòon̄ puee sɔ̀. Nyānní kitiŋ jannaatiliŋ pú kí dāan̄ kí fáá anikpil nee pu ŋí ká dimaŋfal.>»

¹⁰Ní m dū ti-Dindaan nyɔɔbundi ki nāatì kii u nín kpáafì-mi ḿ ŋá puee. Dimaŋfal fookuee dɔ́miń ki kɔ́ anikpilee ni ní ŋi fātìi ká dimaŋfal ní ki nìn yíkìi yúl̀. Bi nìn dūu ŋá dijanjakitikpaŋkpaandi ní.

¹¹Míǹ boonee ní ti-Dindaan bí-mi yii: «Nisaaleen, akpab nee sá Isirayeel nibul ní. Bi bí ki lì yii: <Ti bí kii akpakulimee, ti-mákal dóò, an dóò ti-pu dee.>

¹²An puee dū m-nyɔɔbundi kí nàatī-bi kí tùkù-bi tin man ni-Dindaan Unimbɔti bíi sòoǹ nì bee yii: <M làá cúú ni-kaakuliŋ kí pìitī ní kí cúú nimbi, man nibul kí nyāntiń. M làá fàtīí gíiǹ-ni ni-tiŋki pu.

¹³M yaa láa pīitì ni-kaakuliŋ ki nyántìń-nee, ni làá dāá béé yii man di sá ni-Dindaan.

¹⁴M làá dū m-Fam kí ŋá ni-ni, ní ní nīn bí dimaŋfalin. M làá dū-ni kí kàan̄ ni-tiŋkin. Niinee ni làá béé yii man ni-Dindaan di sòon̄, ní tin m yaa lēe, tíǹ ní m ŋáań. Man ni-Dindaan Unimbɔti di sòon̄.»

¹⁵Ti-Dindaan bí-mi yii:

¹⁶«Sii nisaaleen, yòon̄ didɔgindi kí ŋmà di-pu yii: <Juuda nì Isirayeel yab bin bí dibeel nee poonee>. Míǹ boonee, á gíti yòon̄ didɔgindi diba mun kí ŋmà di-pu yii: <Jooseefi àá Eefiraayiim nì Isirayeel yab bin bí dibeel nee poonee.>

¹⁷Dū adɔgin ali gbanti nyɔmmu kí bíĺ kí tūū tɔb án kpántí kii didɔgimbaantiilee a-ŋaan.

¹⁸A-nibul yab làá bàlifì-si á cántí taapu kí tùkù-bi.

¹⁹Á tùkù-bi yii man ni-Dindaan Unimbɔti nín sòon̄ nì bi puee sɔ̀. M làá yòon̄ didɔgindi din di sá Jooseefi nì Isirayeel yabee kí dūú túkuń Juuda dɔgindi pu. Adɔgin alee làá kpántí didɔgimbaantiil ní m-ŋaan.

²⁰«Á nīn ŋúb́ adɔgin ŋin pu ní a ŋmàn̄ee a-ŋaan báà ŋma ń wāl̀.

²¹Míǹ boonee, á dū tin man ni-Dindaan Unimbɔti sòon̄ee kí nàatī-bi yii: <Isirayeel yab, m làá nyāntiń-ni atimbun ŋin cee ni cūtèe ŋaan. M làá kóoǹ-ni kí kpāfì ní kí fàtīí gíiǹní-ni ni-tiŋkin.

²²M làá yàntī ní kpántí ditimbumbaantiil Isirayeel jooŋŋi pu. Ni-kɔkɔ làá nīn cáá ubɔtibaanti ní. Naa ti làá nīn sá atimbun ali ní baa làá ti yàkatī-ni abee ali pu.

²³Naa ti làá tòotī awaa, kaa ti làá ŋá ntimbiil tuuŋŋi àá kí yìntīǹ-mi kí kɔ́ǹ ni-ba tijɔkɔndi. M làá nyāntí-ni laakin kɔkɔ ni cūtì ki yīntiǹ-mee ní kí fíntí-ni kí nyāntí ni-jɔkɔnti kɔkɔn. Ni làá nīn sá m-nibul ní man ń nīn sá ni-Nimbɔtiu.

²⁴M-tɔntɔnliu Daafiidi làá nīn sá ni-bɔtiu. U làá nīn sá upikpaabaanti ní kí tīī ni-kɔkɔ. Ni làá nīn tɔ́ m-marab ní kí nīn tɔ́ m-bɔkpaaŋi ní kí ŋá ŋi nín bí yii ní ŋá puee.

²⁵Ni làá nīn kóò kitiŋ kin ní m tīī m-tɔntɔnliu Jaakɔb ní ni-naanjab kāl̀ ki-poonee. Ni làá nīn kíǹ ki kóò niin ní jaanjaan, ni nì ni-biyaamu nì ni-naantiibi. Man tɔntɔnliu Daafiidi di làá nīn sá ni-bɔtibil kí nīn cá talku.

²⁶M làá pòon̄-ni ŋgbansɔŋfi poondi din làá nīn bí ki cá jaanjaanee. M làá dū-ni kí kàan̄ kitiŋ nee poon ní kí bùtī ni-maaliŋu. M làá dū m-circir kɔŋkooŋŋu kí síiń ni-kansikin ŋú nīn bí ki cá jaanjaan.

²⁷M làá nīn kóò ni-kansikin. M làá nīn sá ni-Nimbɔtiu ní nimbi ń nīn sá m-nibul.

²⁸M yaa láa dū m-kɔŋkooŋŋu ki síiǹ ni-kansikin kí nīn cá jaanjaanee ní atimbun ŋin kíǹee làá béé yii m sá ni-Dindaan ní ki dū Isirayeel ki sú ú nīn bí m-tundin kí nīn cá jaanjaan.»