Read Ntcham Ezéchiel 38 Bible Online

Ezéchiel 38 - Ntcham bible

Ezéchiel 38

¹Ti-Dindaan bí-mi yii:

²«Nisaaleen, fàtī a-nimbiin kí túĺ Gɔɔgi un bí Maagoogi tiŋkin, ki sá Meeseeki nì Tubaal bɔtibilee. Dū m-bɔti kí nàatī-u.

³Dū tin man ni-Dindaan Unimbɔti sòon̄ee kí nàatī-u yii: M làá jáǹ sii Gɔɔgi, Meeseeki nì Tubaal bɔtibil ukpil.

⁴M làá dū tikúti kí kpàl̄ a-nyɔɔkpaween ní kí dáaĺ-si mpɔn kí nyāntí. M làá nyāntí-si mpɔn a-tiŋkin, sii nì a-janjaliibi kɔkɔ nì a-taamui nì a-tanjakaliibi bin pēē tiwannyaandee nì a-janjakitikpaandi din ŋúb́ agbampɔɔ nì ntàataajimuee.

⁵Peersi nì Eetiiyoopii nì Puuti janjaliibi làá nīn tú agbampɔɔ ki cíkí kujaau fuulimmu ní kí táá-si kí búntí.

⁶Goomeer tiŋki janjakitiŋ kɔkɔ nì Beeti-Toogarima tiŋki kin bí ŋgan púee janjakitiŋ kɔkɔ nì atimbun tikpil mun làá táá-si kí búntí.

⁷Bɔ́ntí a-ba an nín máaǹ puee, sii nì samaa un kɔkɔ kóoǹ ki kpáfì a-ceeyee, sii di làá nīn kpòotī-bi.

⁸Abin kupaau boon kpataaayee, m làá dāá tɔ̄-si á cùú jáǹ Isirayeel tiŋki. Ŋyunti gbantee, ki-nib ŋmátì ki nyáń kujaaun, ki nyáń ntimu mun poon bi nìn kóòyee ki kóoǹ ki kpáfì Isirayeel jooŋŋi ŋin kpántì adigbuŋkati an yúntèe pu dee. Bi nín nyáń atimbun ŋin kíǹee kansikinee, bi kíǹ ki bí ŋgbansɔŋfin ní.

⁹Sii nì a-janjakitil nì atimbun kupaau ŋin kútì a-puee làá jáǹ-bi. Ni làá jēetí bi-pu kii kubuŋkpaaŋŋuee, ní ní kpátí kí bìin̄ bi-tiŋki pu kii ditagbandee.

¹⁰«Man ni-Dindaan Unimbɔti di sòon̄ yii, ŋyunti gbanti yaa láa bāańee, ilandɔkɔ tikpil làá dāan̄ a-ni ní á bɔ́ntí kí tɔ̄ dituŋkpitil diba.

¹¹A làá lì yii a làá cùú jáǹ kitiŋ kin di kaa cáá ubɔ ń mɔ̄tì ki-puee. A làá jáǹ binib bin di bí ŋgbansɔŋfin tiba kaa páb́-bee. Binib gbanti kóò ntimu mun baa máń agun ki tú, muaa cáá mpunyɔmuɔɔ kaa cáá tikpàlkaalee.

¹²A làá dāan̄ kí fūkul̀-bi kí kóoǹ bi-gaajawanti. Binib bin fātìi kɔ́ kitiŋ kin nìn kpántì adigbuŋkati ŋmee, a làá jáǹ-bi. Bi nyánní ntincamun ki kóoǹ ki kpáfì. Bi cáá tipicaŋkpun nì tigaajati ní ki kóò duulinya kansikin nì kansikin.

¹³Binib bin kóò Sabaa nì Deedaŋyee nì Taarsiisi nyampoobi nì ntimbilimu mun māntìi tú-nee[19] làá bàlifì-si yii: <Mimmee kí fūkul̀ binib wanti pu ní a dɔ́mińaaa? Kí kóoǹ tigaajawan kí kpúkuńee pu ní a kóoǹ a-janjakitil ki kpáfàaa? A dɔ́miń kí fōō animbil nì sindaariya nì tipicaŋkpun nì tigaajawan kí kpúkuń níii?>

¹⁴«An puee nisaaleen, fōō m-bɔti kí dūú nàatī. Lēē tin man ni-Dindaan Unimbɔti sòon̄ee kí dàkà Gɔɔgi yii: <Ŋwiin ŋun m-nibul Isirayeel yaa láa bí ŋgbansɔŋfinee, a làá dāá kíĺ nsan.

¹⁵A làá nyānní a-tiŋki kin bí ŋgan púee kí dāan̄, sii nì ntimu tikpil janjaliibi. Ni-kɔkɔ làá dāá nīn kāń itaamu pu ki náaǹ, ní kí ŋá dijanjakitikpaandi.

¹⁶A làá dāan̄ kí jáǹ m-nibul Isirayeel yab ní kí gbá kí bìin̄ bi-tiŋki pu kii ditagbandi nín bìintí kitiŋ pu puee. Iyuntijoolkaa poon ní tíǹ làá jītí. M làá tɔ̄ sii Gɔɔgi á cù kí fōō m-tiŋki kí ŋmā kí dàkà anibul ŋin kíǹee yii man di sá Unimbɔti Circirdaan. Kun ní m làá dī a-pu kí dàkà-bee dee.

¹⁷«Man ni-Dindaan Unimbɔti nín sòon̄ puee sɔ̀. Dooooyee, m nìn dūu dī m-tɔntɔnliibi Isirayeel bɔnaatiliibi pu ki sòon̄ a-pu. Bi dū abin kupaau ki sòon̄ yii m làá tɔ̄-si á jáǹ m-nibul.

¹⁸Ama ŋwiin ŋun ní a làá já kí fōō Isirayeel tiŋkee, Gɔɔgi, yaadal ní m làá gíí diŋuul, man ni-Dindaan Unimbɔti di sòon̄ míǹ.

¹⁹M pūtì yii m-ŋuukpaandi gbanti poonee, kitiŋ làá cìŋkì Isirayeel tiŋkin.

²⁰Ijɔm in bí tiŋkunee nì inoon in ŋàaǹ kutaa puee nì ipeel nì ikoobu in fù kitiŋee nì binib bin bí kitiŋ puee kɔkɔ làá nyɔ̀ ŋkpatim m-nimbiin. Ajoon làá wùtī ní ataŋkpee ń lítí kitiŋ ní agun ŋin bi máń ki tú ntimuee ń lítí.

²¹Gɔɔgi, m làá jáǹ-si m-jooŋŋi kɔkɔ pu, man ni-Dindaan Unimbɔti di lī míǹ. A-janjaliibi làá kpɔ̀ tɔb.

²²M làá dū bìlbil kúm weeŋŋu kí tɔ̄ a-pu ní kí yàntī á kpú kí dáaĺ a-tafal. M làá yàntī utaakpaan nì ataanyiŋkumbil nì farwata un fòol̄ lìblibee ń nì sii nì a-janjaliibi nì bin kɔkɔ kútì a-pu ni cūtì kujaauee pu.

²³M làá dàkā atimbun kɔkɔ yii m sá ukpaan ki bí circir. M làá lēē m-ba kí dàkà atimbun kupaau ń béé-mi, ní ŋi làá béé yii man di sá ni-Dindaan.»