Read Ntcham Ezéchiel 39 Bible Online

Ezéchiel 39 - Ntcham bible

Ezéchiel 39

¹«Sii nisaaleen, dū m-nyɔɔbundi kí nàatī Gɔɔgi kí tùkù-u man ni-Dindaan Unimbɔti nín sòon̄ puee yii: <Sii Gɔɔgi, Meeseeki nì Tuubaal bɔtibikpiliu, m làá jáǹ-si.

²M làá nyāntí-si a-tiŋkin. M làá ŋá-si mpɔn á nyā a-tiŋki kin bí ŋgan púee kí jáǹ Isirayeel jooŋŋi.

³Míǹ boonee ní ḿ fáá-si ní butɔbu ń ŋmátí kí nyā a-ŋaŋgan poon kí lítí, ní ipiin ń ŋmátí kí nyā a-ŋaŋgiil poon kí lítí.

⁴Niinee, sii nì a-janjakitil nì a-bɔɔbi bin kútì a-puee ń kpú Isirayeel jooŋŋi pu. M làá yàntī kaajiikub nì ipeel ń ŋmɔ́ ni-nanti.

⁵A làá lítí kitiŋ kí kpú, di sá yii man di sòon̄, man ni-Dindaan Unimbɔti di lī míǹ.

⁶M làá sēē Maagoogi tiŋki ŋŋmi nì bin kóòń ntimu mun nnyim māntìi tú bi bí ŋgbansɔŋfinee. Niinee báà ŋma làá béé yii man di sá ni-Dindaan.

⁷M làá yàntī m-nibul Isirayeel ń béé m nín bí circir puee. Maa làá ti yàntī bí kpèè m-circir yindi fám ní atimbun ŋin kíǹee ń béé yii man di sá ni-Dindaan, Isirayeel circir Nimbɔtiu.

⁸Tiŋman, tíǹ gbanti kɔkɔ làá ŋá míǹ, ní an kíĺ ki bíi ŋáań míǹ gba. Ibɔsoon wiiŋŋu ŋun bɔti m nìn sòon̄ ki síiǹee dee. Man ni-Dindaan Unimbɔti di lī míǹ.

⁹Isirayeel yab làá dāá nyā bi-timmun. Bi làá dāá kpāā ŋŋmi ní kí dū bi-nannanliibi janjawanti kí ŋá poon án wà. Agbampɔɔ, akpaan nì ŋwaamu nì itɔfi nì ipiin nì ŋkpamu nì ntàataajimu làá nīn bí ŋŋmee poon ki wù áli abin aluli.

¹⁰Binib kaa dāa gíti cá kusaau idɔpu àá kí cù kupɔɔun kí gāā isufi, di sá yii tijanjawan gbanti ní bi làá nīn cáa kpà ŋŋmi. Bin nìn fúkúl̀-bee, bi làá dāá fūkul̀-bi kí téeǹ. Bin nìn kóoǹ ni-wantee, ni làá dāá kóoǹ bi-wanti kí téeǹ. Man ni-Dindaan Unimbɔti di lī míǹ.

¹¹«Ŋwiin gbantee, m làá dāá tīī Gɔɔgi ntaŋkpiifal ŋun poon bi làá síb́-uee Isirayeel tiŋkin. Bisanjitiliibi tantakalin, Ŋyaam mɔɔl ŋwìiń nyalaŋki pú ní án làá nīn sá, ní ntaŋkpiifal gbanti làá pìin̄ bisanjitiliibi nsan. Niin ní bi làá síb́ Gɔɔgi nì u-janjakitil kɔkɔ. Bi làá nīn yíì mpaan gbanti yii <Gɔɔgi Nipaaku Tantakal>.

¹²Isirayeel yab làá dāá dū iŋmal iluli ní kí síb́-bi, ní kí fíntí kitiŋ kí nyāntí tijɔkɔndin.

¹³Kitiŋ nee nib kɔkɔ làá dāá síb́-bi, ní kí dāá nīn bí dipɔɔpindin daliŋkin m làá lēē m-nyooti kí dàkèe. Man ni-Dindaan Unimbɔti di sòon̄ míǹ.

¹⁴Iŋmal iluli gbanti boonee, bi làá dāá lēē bininjab biba. Bíǹ tundi di làá nīn sá bí nīn yìiǹ kitiŋ kɔkɔ pu, kí nyàab̀ anikpil ŋin dáá gbíntìi dɔ̄ kitiŋee kí síb́, kí ŋá kitiŋ circir.

¹⁵Bi làá dāá yìiǹ kitiŋ nee kɔkɔ pu. Bi-kansikin ubɔ yaa ká anikpabee ní ú tòò ataŋkpee kí kpúkuń ŋi-caŋin. An di làá nīn sá kudaaŋŋu. Niinee ní bin gbì itaŋkpiifalee ń dāan̄ kí yòon̄ akpabee kí cáá síb́ Gɔɔgi Nipaaku Tantakalin.

¹⁶Kitiŋ kiba gba làá dāá nīn bí niin bí nīn yíì-kì yii Amoona, taapu di sá yii: <Kunipaau>. Án nín làá ŋá pu kitiŋ nee ń nyā tijɔkɔndinee dee.»

¹⁷Ti-Dindaan Unimbɔti gíti bí-mi yii: «Nisaaleen, tùkù inoon kɔkɔ nì i-buluku nì ipeel kɔkɔ yii í nyānní an kɔkɔ pu kí dāá kpāfì kí jī saraa un m làá ŋá kí tīī-bee jinti. Án làá nīn sá saraakpaan ní m làá ŋá Isirayeel jooŋŋi pu. Ni ŋūǹ kí ŋmɔ́ tinan kí nyɔ̀ fatiku.

¹⁸Ni làá ŋmɔ́ bibaatandambi nanti kí nyɔ̀ abɔtibil fatikuu, bibaatandambi nì abɔtibil ŋin bi dūu ŋá saraa ipijaa nì apibil nì iŋɔjaa nì Baasan nabiliŋ ŋin cáá ŋkpamee yil puee.

¹⁹Saraa gbanti pu ní m yíì-ni, ni làá ŋmɔ́ ŋkpam kí díkí ní kí nyɔ̀ fatiku kí gbí.

²⁰Jiŋaakpaan gbanti poonee, ni làá ŋmɔ́ itaamu nì bitanjakaliibi nì bijanjaliibi nì bijanjaliibi bin kíǹee kɔkɔ nì bi-bulifi kii ni nín là puee. Man ni-Dindaan Unimbɔti di sòon̄ míǹ.

²¹«M làá dàkà atimbun ŋin kíǹee nib m-nyooti. Bi-kɔkɔ làá ká m nín cáá m-pɔŋŋu ki tūǹ ditundi ki sòoǹ binib bɔti puee.

²²Kí yòon̄ ŋwiin gbantee, Isirayeel yab làá béé yii man di sá bi-Dindaan, bi-Nimbɔtiu.»

²³«Atimbun ŋin kíǹee nib làá béé yii bi cúú Isirayeel yab ki cūnnì kuyuŋu bi-yìntitam pu ní, di sá yii baa yúl̀ man bi-Dindaan deedee. An pu ní m fātì m-boon ki tīī-bi. M dū-bi ki ŋá bi-nannanliibi ŋaan ní ki yāntì bi kūū-bi kujaaun.

²⁴M nín fātì m-boon ki tīī-bee, m dàkā-bi bi-jɔkɔntuuŋŋi nì bi-yìntitam nín máaǹ kuŋyee ní.

²⁵«Ama man ni-Dindaan Unimbɔti nín sòon̄ puee sɔ̀. Kɔŋkɔnnee, m làá sɔ̄ Isirayeel yab, Jaakɔb naantiibi saai. M làá nyāntí-bi kuyuŋun kí fàtīí gíiǹní-bi ní kí yàntī bi-kɔkɔ ń nīn kíǹ ki tɔ́ m-circir yindi kii an nín máaǹ puee.

²⁶Niinee bi làá súntí bi-cooi nì bi nín yīntiǹ-mi puee. Bi làá kàl̄ bi-tiŋkin ŋgbansɔŋfi ní ubɔ kaa làá ti fàaǹ-bi.

²⁷M làá nyāntí-bi bi-nannanliibi tiŋkin ní kí kóoǹ-bi kí kpāfì ní kí gíiǹní-bi bi-dumpu. M làá dī bi-pu ní kí dàkà atimbun tikpil yii man di sá Unimbɔti circirdaan.

²⁸M yaa láa kóoǹ Isirayeel yab ki kpáfì bi-tiŋkin kaa yāntì ubɔbɔ gbíntì kinicantiŋin kuyuŋunee, bi làá béé yii man di sá bi-Dindaan bi-Nimbɔtiu.

²⁹Maa làá ti fàtī m-boon kí tīī Isirayeel yab, kun puee m làá tīī-bi m-Fam. Man ni-Dindaan Unimbɔti di sòon̄ míǹ.»