Read Ntcham Ezéchiel 40 Bible Online

Ezéchiel 40 - Ntcham bible

Ezéchiel 40

¹Bi nín cúú-ti ki cūnnì kuyuŋu abin mmuŋku nì aŋmoo poon, dibindi nín kíĺ puee iwiin saalaa dal, an dàkà yii bi nín jáń ki fōō Jeerusaleem tiŋki dibindi diba kpá saalku deedeeyee ní ti-Dindaan pɔŋŋu kpákatìń m-pu ní ki cáá-mi ki cūnnì niin.

²Dileedakal diba poonee ní Unimbɔti yōoǹ-mi ki cáa cūnnì Isirayeel tiŋkin. U nìn dū-mi ki tɔ́kɔ́ǹ dijoofɔŋfɔkɔl diba yilpu kúntí kunti. Dijoolee jandi ŋgiil púee, adiin aba bí ki náań nì kitiŋ kiba.

³U cáá-mi ki cūnnì niinee ní m ká uninja ubɔ. Uninjee nìn náań nì tasa kúti ní ki yú ki kɔ́ĺ kipunyɔkɔ kiba[20]. U nìn ŋúb́ u-ŋaan ŋŋaabu ŋun bí fálfalee ŋmiiŋu nì kukaluu kun bi cáa ŋmàntēe.

⁴U bí-mi yii: «Nisaaleen, kpítí a-nimbiliŋ kí ŋátí a-tafaliŋ. Á kpèè tin kɔkɔ m làá dàkà-si nee tiŋan, di sá yii an sá á kpèè-tèe pu ní bi cáań-si doo. Míǹ boonee, a làá dū tin kɔkɔ a ká dooyee kí māafì Isirayeel yab ní.»

⁵Kun m kée sɔ̀. Digundi diba nìn bí ki māntìi tú kunimbɔtidii. Kukaluu kun uninjee nìn ŋúb́ee fɔkɔŋŋu nìn sá santimeetab imuŋku ili nì saalaa ní. U nìn dū kukaluuee ki ŋmāntì digundee gbifiŋŋu nì di-fɔkɔŋŋu ní ki ká kukaluuee fɔkɔŋŋu diba pu ajanliitil pu.

⁶U nín cá kipunyɔkɔ kin bí kunimbɔtidii ŋwìiń nyalaŋki púee ní ki dàb̄ akɔl. U nìn ŋmāntì kipunyɔkɔee nyɔkɔpu ní ki ká kukaluuee fɔkɔŋŋu diba pu.

⁷Biciitiliibi diiŋŋi kamaa púuŋŋu pú nìn sá kukaluuee fɔkɔŋŋu diba pu ní ku-waaŋŋu sá kukaluuee fɔkɔŋŋu diba pu. Agun ŋin nìn pītì adiinee kansikinee gbifiŋŋu nìn sá kukaluuee fɔkɔŋŋu miŋmoo pu. Kipunyɔkɔee nì kudii kun bi tà kí kɔ́ kunimbɔtidiin ku bíitiǹ-kuee kansikin nìn nyáń kukaluuee fɔkɔŋŋu diba pu.

⁸Bi nìn ŋmāntì kudii gbanti.

⁹Ku-nyooŋŋu nìn sá kukaluuee fɔkɔŋŋu minii pu, ní ku-jaantalkub nìn sá kukaluuee fɔkɔŋŋu mili pu. Kudii kun bi tà kí kɔ́ gbantee nìn bí poon pú ní.

¹⁰Bipunyɔɔciitiliibi diiŋŋi ŋin nìn bí kunimbɔtidii ŋwìiń nyalaŋki púee nìn ŋmà ní. Adiin ata nìn bí nsanjaati ŋgan pú, ní ata mun bí ŋgiil pú. Agun ŋin nìn pītì ŋi-kansikinee kɔkɔ gbifiŋŋu nìn ŋmà ní.

¹¹Uninjee nìn ŋmāntì kipunyɔkɔee punuu nín pìitī puee waaŋŋu ní ki ká kukaluuee fɔkɔŋŋu saalaa pu. Nsanjaatee waaŋŋu nìn nyáń kukaluuee fɔkɔŋŋu saalaa nì mita pu.

¹²Bipunyɔɔciitiliibi diiŋŋi ŋin jannaatiliŋ nìn ŋmà ki bí nsanjaati jaŋŋi kɔkɔ puee nyɔkɔpuee, bi nìn máń kiguŋŋi ní ki-fɔkɔŋŋu nìn sá kukaluuee fɔkɔŋŋu diba pu.

¹³Uninjee nìn ŋmāntì kí yòon̄ kudii kubɔ poon gundi kí cáá sāā kun bíitiǹ-kuee poon gundi ní ki ká kukaluuee fɔkɔŋŋu mmuŋku nì miŋmoo pu.

¹⁴U nìn ŋmāntì kudii kun ní bi tà kí kɔ́ kunimbɔtidiinee ní ki ká kukaluuee fɔkɔŋŋu mmuŋku pu. Kunimbɔtidii cindi nìn māntìi tú-ku an kɔkɔ pu.

¹⁵Kipunyɔkɔ kin bi dì kí kɔ́ kì bí boon pú gundi pu nì poon pú cindi punyɔkɔki kansikinee nìn nyáń kukaluuee fɔkɔŋŋu imuŋku ili nì saalaa.

¹⁶Bi nìn kpáá tilaandi ki nákáǹ tɔkɔlab ki māntìi tú bipunyɔɔciitiliibi diiŋŋi nì ŋi-jaantalkub nì kipunyɔkɔ poon pú nì agun ŋin pītì adiinee. Tɔkɔlab bin bi kpáá tilaandi ki nákáǹee mun nìn bí kudii kun bi tà kí kɔ́ee guŋŋi pu. Bi nìn lēē ibafi ki nyɔ̄kɔntì agun gbanti pu.

¹⁷Uninjee cáá-mi ki cūnnì kunimbɔtidii boon cindi. Bi nìn bɔ̀b̄ dicindi gbanti yilpu ní ki máń adiin mmuŋku nì saalaa ki māntìi tú.

¹⁸Bi nìn ŋàl̄ ki māntìi tú mpunyɔmu kɔkɔ. Adiinee nìn gíti bí taapu ki jítiǹ poon pú cindi.

¹⁹Uninjee nìn ŋmāntì digundi din bi máń ki tú kunimbɔtidii boon cindi kipunyɔkɔ bí bi dì ki kóò kunimbɔtidiinee nì digundi din bi máń ki tú kunimbɔtidii poon cindee ní ki ká kukaluuee fɔkɔŋŋu dilaataal pu. Ŋwìiń nyalaŋki pú dee. Ŋgan púee,

²⁰u ŋmāntì kipunyɔkɔ kin bí ŋgan pú bi dì ki kóò kunimbɔtidii boon cindinee.

²¹A yaa dī kipunyɔkɔ ki kóò kunimbɔtidiinee, bipunyɔɔciitiliibi diiŋŋi ata bí ŋgan pú ní ata bí ŋgiil pú. Agun nì kudii kun bi tà kí kɔ́ee púuŋŋu pú nì ku-waaŋŋu ŋwiin nyalaŋki pú punyɔkɔkee púuŋŋu pú nì ki-waaŋŋu ŋmà ní. Ŋgan pú punyɔkɔki púuŋŋu pú nìn sá kukaluuee fɔkɔŋŋu imuŋku ili nì saalaa pu ní ki-waaŋŋu sá mmuŋku nì miŋmoo pu.

²²Kudii kun bi tà kí kɔ́ee nì tɔkɔlab nì ibafi in bi nìn dūu nyɔ̄kɔntèe nì kipunyɔkɔ kin béeyee nìn ŋmà mpúun pú nì ŋwaan pu ní. Bi nìn dàb̀ akɔl aluli pu ní kí nín bà ŋgan pú punyɔkɔki, ní nyɔkɔpuee, kudii kun bi tà kí kɔ́ kunimbɔtidii poonee bí.

²³Ŋgan pú punyɔkɔki nyɔkɔpuee, kipunyɔkɔ kiba gíti bí. Kíǹ ní bi dì kí kɔ́ kunimbɔtidii poon cindi. An pée bí kii ŋgan pú nín bí puee ní. Uninjee ŋmāntì mpunyɔmu mulee kansikin ní ki ká kukaluuee fɔkɔŋŋu dilaataal pu.

²⁴Míǹ boonee ní u cáá-mi ki cūnnì ŋgiil pú ní m ká kipunyɔkɔ kiba mun niin. U nìn ŋmāntì bipunyɔɔciitiliibi diiŋŋi nì agun nì kudii kun bi tà kí kɔ́ee ní ki ká yii an nì mpunyɔmu mun kíǹee ŋmà mpúun pú nì ŋwaan pu.

²⁵Niin muee, tɔkɔlab bí ki māntìi tú kipunyɔkɔ nì kudii kun bi tà ki kóòyee. Tɔkɔlab gbanti pée bí kii ŋwìiń nyalaŋki pú nì ŋgan pú yab nín bí puee ní. Ŋgiil pú punyɔkɔki gbantee púuŋŋu kɔkɔ nìn kpáfì kukaluuee imuŋku ili nì saalaa pu ní ŋwaan nyáń kukaluuee mmuŋku nì miŋmoo pu.

²⁶Bi nìn dàb̀ akɔl aluli pu ní kí nín bà ŋgiil pú punyɔkɔki, ní nyɔkɔpuee, kudii kun bi tà kí kɔ́ kunimbɔtidii poonee bí. Bi nìn dū ibafi ki nyɔ̄kɔntì poon pú guŋŋi gbanti ŋgan nì ŋgiil kɔkɔ pú.

²⁷Kipunyɔkɔ gbanti nyɔkɔpuee, kiba mun nìn gíti bí. Kíǹ ní bi nìn dì kí kɔ́ kunimbɔtidii poon cindi. Uninjee nìn ŋmāntì mpunyɔmu gbanti kansikin ní ki ká kukaluuee fɔkɔŋŋu dilaataal pu.

²⁸Uninjee nìn dū-mi ki dī ŋgan pú punyɔkɔki ní ti kɔ́ kunimbɔtidii poon cindi. U nìn ŋmāntì kipunyɔkɔ gbanti ní ki ká yii kì nì mpunyɔmu mun bí boon pú gundi puee ŋmà.

²⁹Bipunyɔɔciitiliibi diiŋŋi nì agun ŋin bi dūu pītèe nì kudii kun bi tà kí kɔ́ee nì mpunyɔmu mun kíǹee púuŋŋu nì ku-waaŋŋu nìn ŋmà. Kudii kun bi tà kí kɔ́ee nìn cáá tɔkɔlab ní ki māntìi tú. Kipunyɔkɔee púuŋŋu kɔkɔ nyáń kukaluuee fɔkɔŋŋu imuŋku ili nì saalaa pu ní ki-waaŋŋu nyáń kukaluuee fɔkɔŋŋu mmuŋku nì miŋmoo pu.

³⁰Adiin nìn māntìi tú kipunyɔkɔ gbanti. Kudii kubɔ púuŋŋu nìn sá kukaluuee fɔkɔŋŋu mmuŋku nì miŋmoo pu, ní ki-waaŋŋu sá kukaluuee miŋmoo pu.

³¹Kipunyɔkɔ gbanti diiku kun bi tà kí kɔ́ee nìn bíitiǹ kunimbɔtidii boon cindi ní. Bi nìn lēē ibafi ki nyɔ̄kɔntì ki-jaantalkub. Bi nìn tà akɔl anii pu ní kí kɔ́ ku-ni.

³²Uninjee nìn dū-mi ki dī ŋwìiń nyalaŋki pú punyɔkɔki ki kɔ́ kunimbɔtidii poon cindi. U nìn ŋmāntì kipunyɔkɔ gbanti ní ki ká yii ki nì mun kíǹee ŋmà.

³³Bipunyɔɔciitiliibi diiŋŋi nì agun ŋin pītèe nì kudii kun bi tà kí kɔ́ kunimbɔtidiinee nì mpunyɔmu mun kíǹee púuŋŋu nì ŋwaan nìn pée ŋmà ní. Tɔkɔlab nìn bí ki māntìi tú kipunyɔkɔee nì kudii kun bi tà kí kɔ́ee. Kipunyɔkɔ gbanti kɔkɔ fɔkɔŋŋu nìn sá kukaluuee fɔkɔŋŋu imuŋku ili nì saalaa pu, ní ki-waaŋŋu sá kukaluee mmuŋku nì miŋmoo pu.

³⁴Kipunyɔkɔ gbanti diiku kun bi tà kí kɔ́ee nìn bíitiǹ kunimbɔtidii boon cindi ní. Bi nìn lēē ibafi ki nyɔ̄kɔntì ki-jaantalkub. Bi nìn dàb̀ akɔl anii pu ní kí kɔ́.

³⁵Uninjee nìn dū-mi ki dī ŋgan pú punyɔkɔki ní ki ŋmāntì-kì. Kipunyɔkɔ gbanti nì mun kíǹee ŋmà ní.

³⁶Ki mun cáá bipunyɔɔciitiliibi diiŋŋi nì agun ŋin pītèe nì kudii kun bi tà kí kɔ́ kunimbɔtidiinee ní tɔkɔlab māntìi tú-kì. Kipunyɔkɔ gbanti kɔkɔ fɔkɔŋŋu nìn sá kukaluuee fɔkɔŋŋu imuŋku ili nì saalaa pu, ní ki-waaŋŋu sá kukaluuee fɔkɔŋŋu mmuŋku nì miŋmoo pu.

³⁷Kipunyɔkɔ gbanti diiku kun bi tà kí kɔ́ee nìn bíitiǹ kunimbɔtidii boon cindi ní. Bi nìn lēē ibafi ki nyɔ̄kɔntì ki-jaantalkub. Bi nìn dàb̀ akɔl anii pu ní kí kɔ́.

³⁸Ŋgan pú punyɔkɔki jaantalkub kansikinee, kudii kubɔ nìn bí niin. Niin ní bi nìn fíntí tiwaŋkuti tin bi kù ki ŋáań bisaraawɔkaabee.

³⁹Kipunyɔkɔ gbanti diiku kun bi tà kí kɔ́ee poonee, teebilib bili nìn sí dijandi diba pú ní bili mun sí dijandi din kíǹee. Teebilib gbanti pu ní bi nìn làntī bisaraawɔkaabi nì ikpiti pɔ̄tam nì dibɔkpil saraabi waŋkuti.

⁴⁰Kudii gbanti boonee, teebilib binaa nìn bí. A yaa jɔ́ḿ ŋgan pú punyɔkɔki watil púee, bili bí ŋgan pú ní bili bí ŋgiil pú.

⁴¹Teebilib nìn kpáfì binii ní bi làntī saraabi waŋkuti bi-pu, binaa bí kipunyɔkɔee dijandi diba pú ní binaa mun bí dijandi din kíǹee pú.

⁴²Bi nìn kpítì ataŋkpee ní ki dūu ŋá teebilib binaa bin pu bi kù saraawɔkaa waŋkutee. Teebilibee jannaatiliŋ nìn ŋmà ní. Dijandi diba nìn sá kukaluuee fɔkɔŋŋu diba pu nì dijandi ní ŋfɔkɔn sá diba pu. Teebilib gbanti pu ní bi nìn pāantí tiwan tin bi cáa bɔ́ntí saraabee.

⁴³Bi nìn cátì inyinsan ki māntìi tú teebilibee, ní inyinsanee waaŋŋu nìn sá kii kuŋaŋfaau waaŋŋuee. Teebilib gbanti pu ní bi nìn cáá saraabi nanti ki pāantí.

⁴⁴Uninjee nìn cáá-mi ki kɔ́ǹ kunimbɔtidii poon cindi. Niin ní bilaŋgaaliibi diiŋŋi nìn bí. Kubɔ nìn bí ŋgan pú punyɔkɔki caŋin ní bi pìitī-ku ŋgiil watil pú, ní kun kíǹee bí ŋgiil watil pú punyɔkɔki caŋin ní bi pìitī-ku ŋgan pú.

⁴⁵Uninjee nìn bí-mi yii: «Kudii kun nimbiin túĺ ŋgiil pú nee, bisaraaŋaliibi bin tūǹ ditundi kunimbɔtidiinee diiku dee.

⁴⁶Kudii kun nimbiin túĺ ŋgan pú nee, bisaraaŋaliibi bin tūǹ ditundi nsaraafan puee diiku dee. Leefii naakookun yab kansikinee, Sadooki naantiibi baba di ŋūǹ kí sútí kí pìl̄ ti-Dindaan kí tɔ̄ ditundi kí tīī-u.»

⁴⁷Uninjee nìn ŋmāntì kunimbɔtidii poon pú cindi: di-jannaatiliŋ nìn ŋmà ní. Dijandi diba nìn nyáń kukaluuee fɔkɔŋŋu dilaataal pu. Nsaraafan nìn bí kunimbɔtidii nyɔkɔpu ní.

⁴⁸U nìn cáá-mi kí kɔ́ǹ kudii kun bi tà kí kɔ́ kunimbɔtidiinee. U nìn ŋmāntì ki-jaantalkub ní ki ká kukaluuee fɔkɔŋŋu miŋmoo pu dijandi kamaa pú, ní kipunyɔkɔ ki-ba waaŋŋu sá kukaluuee fɔkɔŋŋu diba kpá saalku pu. Agun ŋin bi nìn máń ki pūntèe gbifiŋŋu nìn sá kukaluuee fɔkɔŋŋu mita pu.

⁴⁹Kudii kun bi tà kí kɔ́ee fɔkɔŋŋu nìn sá kukaluuee fɔkɔŋŋu mmuŋku pu, ní ku-waaŋŋu sá saalaa nì mili pu. Bi nìn dàb̀ akɔl saalaa pu ní kí kɔ́ ku-poon. Kipunyɔkɔee janliitiliŋ puee, jaantalkub nìn bí ní.