Read Ntcham Ezéchiel 42 Bible Online

Ezéchiel 42 - Ntcham bible

Ezéchiel 42

¹Uninjee nìn nyántì-mi kunimbɔtidii boon cindin ŋgan pú ní ki yāntì m kɔ́ adiin ŋin bí ki túĺ mpaan ŋun dɔ̄ famee nì kudii kun bí kunimbɔtidii boonee.

²Adiin ŋin nìn bí niin gbantee kɔkɔ púuŋŋu nìn sá kukaluuee fɔkɔŋŋu dilaataal pu ní ŋi-waaŋŋu sá imuŋku ili nì saalaa pu.

³Dijandi diba púee, adiinee túĺ mpaan ŋun dɔ̄ fám ki māntìi tú kunimbɔtidiiyee ki yōoǹ kukaluuee fɔkɔŋŋu mmuŋku pu. Dijandi din kíǹee púee, ŋi nìn bíitiǹ bi nín bɔ̀b̄ kunimbɔtidii puee boon pú ní. Bi nìn bɔ́ntì adiin gbanti ní ŋi tɔ́kɔ́ tɔb pu mita pu.

⁴Adiinee nyɔkɔpu, poon cindi watil púee, nsan ŋubɔ nìn dɔ̄ ŋwaan sá kukaluuee fɔkɔŋŋu saalaa pu, ní mpúun sá dilaataal pu. Bi nìn dì ŋgan pú ní kí kɔ́ kudii gbantin.

⁵Adiin ŋin nìn tɔ́kɔ́ yilpuee kaa nìn wāā ki bàn̄ ŋin bí taapuee, di sá yii isan nìn fōō mpaan yilpu diiŋŋi pu ki jítiǹ kansikin nì taapu yaŋ pu.

⁶Adiin gbanti nìn tɔ́kɔ́ tɔb pu mita pu ní kaa nìn cáá jaantalkub kii kunimbɔtidii cindin diiŋŋi ŋin kíǹee nín cáá puee. An pu ní adiin ŋin nìn tɔ́kɔ́ yilpuee nìn sá ŋwaamu ki jítiǹ ŋin bí taapuee nì ŋin bí kansikinee.

⁷Boon pú cindi jandi púee, digundi din nìn bí adiinee púuŋŋu puee nìn sá kukaluuee fɔkɔŋŋu imuŋku ili nì saalaa pu.

⁸Di sá yii adiinee ŋi-ba púuŋŋu nìn sá kukaluuee fɔkɔŋŋu imuŋku ili nì saalaa pu ní. Ama adiin ŋin nìn bíitiǹ kunimbɔtidiiyee púuŋŋu nìn sá kukaluuee fɔkɔŋŋu dilaataal pu.

⁹Adiinee taapu púee, kipunyɔkɔ kin bi dì kí kɔ́ kí nyānní boon pú cindinee nìn bí.

¹⁰Kipunyɔkɔ gbanti nìn bí laakin dicindi gundi kífée ní. Ŋgiil púee, adiin aba nìn bí ki túĺ dicindi nì kudii kun bí kunimbɔtidii boonee.

¹¹Adiin gbanti nyɔkɔpuee, nsan ŋubɔ nìn bí. Adiin gbanti púuŋŋu nì ŋi-waaŋŋu nì ŋin bí ŋgan púee yaŋ nìn ŋmà ní. Ŋi-punyɔmmu nì bi nín máń-ŋi puee nì bi-punuubi sá tiwambaantiil ní.

¹²Adiin ŋin bí ŋgiil gbantee punuubi sá bibaantiibi nì ŋin bí ŋgan púee yab ní. Nsanee nín kífí puee, kipunyɔkɔ kiba nìn bí ki túĺ digundi din bi máń ki tú circir paaŋŋuee. Bi nìn dì ŋwìiń nyalaŋki pú ní kí kɔ́ niin.

¹³Uninjee nìn bí-mi yii: «Adiin ŋin bí ŋgan pú nì ŋgiil pú ki túĺ dicindee, bi dū-ŋi ki sú Unimbɔti ní. Niin ní bisaraaŋaliibi bin nìn ŋūǹ kí kɔ́ circir páaa laŋkee nìn jīǹ saraabi bin bí circir páaayee jinti. Niin ní bi máaǹ kí dū tiwan tin bí circir páaayee nì saraabi nì ikpiti pɔ̄tam saraabi nì dibɔkpil saraabi kí bíĺ, di sá yii mpaan gbanti bí circir ní.

¹⁴Bisaraaŋaliibi bin yaa kɔ́ circir kɔŋkooŋŋunee kaa ŋūǹ kí nyānní boon pú cindin dicilpu. Bi máaǹ kí dū bi-circir wampeeŋkaati tin bi pēeǹ ki túń ti-Dindaan tundee kí bíĺ adiin gbantin, ní kí dū abɔkuti aba kí pèen̄ ní kí nín nyā laakin samaa kpáfèe.»

¹⁵Uninjee nín ŋmāntì adiin ŋin bí kunimbɔtidiinee ki dóòyee ní u dū-mi ki dī ŋwìiń nyalaŋki punyɔkɔ pú ki nyántì. Niinee ní u kíĺ ki bíi ŋmàntī mpaan ŋun māntìi tú kunimbɔtidiiyee.

¹⁶U nìn dū kukaluu kun u cáa ŋmàntēe ki ŋmāntì ní ki ká yii ŋwìiń nyalaŋki púee, mpúun sá kukaluuee fɔkɔŋŋu alaataa aŋmoo pu.

¹⁷U nìn dū kukaluuee ki ŋmāntì ŋgan pú jandi ní ki ká alaataa aŋmoo pu.

¹⁸U nìn dū kukaŋmantikaauee ki ŋmāntì ŋgiil pú jandi ní ki ká alaataa aŋmoo pu.

¹⁹Ní u fātì u-ba ki túĺ ŋwìiń jeetilaŋki pú ki dū kukaluuee ki ŋmāntì ŋgan pú jandi ní ki ká alaataa aŋmoo pu.

²⁰Míǹ ní u nìn ŋmāntì digundi din māntìi tú kunimbɔtidiiyee jannaatiliŋ. Digundee jannaatiliŋ nìn ŋmà ní ki nìn pītì mpaan ŋun bí circiree nì ŋfantanti kansikin.