Read Ntcham Ezéchiel 44 Bible Online

Ezéchiel 44 - Ntcham bible

Ezéchiel 44

¹Uninjee nìn cūnnì-mi kipunyɔkɔ kin bí boon ŋwìiń nyalaŋki púee. Kì nìn pīī.

²Ti-Dindaan nìn bí-mi yii: «Kipunyɔkɔ nee làá nīn pée pīī ní, baa máaǹ kí pìitī-kì. Ubɔ ń taa dī ki-poon kí jītí, di sá yii man ni-Dindaan Isirayeel Nimbɔtiu dī niin ní ki kɔ́nní. Ŋú nīn pée pīī.

³Ama dibɔtibil din kā dibeelee díǹ ŋūǹ kí kàl̄ niin kí jī circir jinti m-nimbiin. Ú dāá dī kipunyɔkɔee kí jītí kuditaakaau kun bí niinee kí kɔ́ ní kí fàtīí dī niin kí nyā.»

⁴Uninjee nìn dū-mi ki dī ŋgan pú punyɔkɔki ki cūtìi nyáń kunimbɔtidii nyɔkɔpu. M nìn ká yii ti-Dindaan nyooti nìn gbí kunimbɔtidii. Niinee ní m tātìi gbāaǹ m-nimbiin tūū kitiŋ.

⁵Ti-Dindaan nìn bí-mi yii: «Nisaaleen, ŋá ŋká. Kpítí a-nimbiliŋ kí ŋátí a-tafaliŋ. Á pīlifì marab nì akoobil ŋin m cáá kí tīī-si m-Diiku puee. Á cúú marab bin sòoǹ bi nín máaǹ kí kɔ́ circir laŋki pu kí fàtīí nyā puee tiŋan.

⁶«Á tùkù Isirayeel yab, pɔɔgaatib nee tin man ni-Dindaan Unimbɔti bíi sòoǹee. Isirayeel yab, m gīī nì ntimbiil tuuŋŋi ŋin ni ŋáańee.

⁷Ŋyunti ŋun ni cáá m-jandi, ni-saraabi kpam nì bi-fatikuu ki tìì-mee, ni cáá binicambi bin kaa gíí dikpancandi kaa tɔ́-mee ki kɔ̄ntí circir laŋki. Ni ŋáań míǹ ní ki kɔ̄ntí m-Diiku tijɔkɔndi. Ni ŋá ntimbiil tuuŋŋi gbanti ki kpītì mpèé ŋun bí man nì nimbi kansikinee.

⁸Nimbi ni-ba kaa túń m-tundi m-circir paaŋŋu pu, ama ní ki yāntì binicambi fōō ni-paaŋŋu ki túń.

⁹Man ni-Dindaan Unimbɔti nín sòon̄ yii báà unicaan yaa kóò Isirayeel yab kansikin, ní kaa gíí dikpancandi kaa tɔ́-mee, ú taa kɔ́ m-circir kɔŋkooŋŋun.»

¹⁰«Ŋyunti ŋun Isirayeel gáatì ki cūtìi nóó awaayee, Leefii yab nìn fātì bi-boon ki tīī-mi ní ki dū-mi ki fá. An puee, m làá dáaĺ bi-tafal bi-kpitii pu.

¹¹Bi làá nīn gbíntìi bí m-tundin circir kɔŋkooŋŋun kí nīn cīití m-Diiku punyɔmmu ki tūǹ atuun nín pée bí pu a-ba a-ba m-Diikunee. Bi ŋūǹ kí làntì tiwaŋkuti tin bi làá dūú ŋá bisaraawɔkaabee nì saraabi bin kíǹee. Bi làá nīn tūǹ ditundi ki tìì m-nibul.

¹²Ŋyunti ŋun m-nibul nìn bí ki tòotī awaayee, bi nìn túń ditundi ki tīī-bi ní ki yāntì Isirayeel yab kɔ́ ikpitin. An puee man ni-Dindaan Unimbɔti nín sòon̄ puee sɔ̀. M làá jáǹ-bi ní bi-kpitii tafadaaldi ń gítí bi-pu.

¹³Baa làá ti ŋmā kí sútí kí pìl̄-mi kí tɔ̄ disaraaŋal tundi, kaa làá ti sútí kí pìl̄ tiwan tin bi dūu sú-mee. Baa máaǹ kí sútí kí pìl̄ circir páaa laŋki. Min ní bi làá túń icoo tuuŋŋi nì ntimbiil tuuŋŋi ŋin bi ŋée tafadaaldee dee.

¹⁴M làá dū kunimbɔtidii poon tundi kí ŋá bi-ŋaan ní bí nīn tūǹ atuun ŋin kɔkɔ bí ku-poon bí tɔ̄ee.»

¹⁵Ŋyunti ŋun Isirayeel yab nìn fātì bi-boon ki tīī man ni-Dindaanee, Leefii yab bisaraaŋaliibi bin sá Saadooki maaliŋunee nìn túń ditundi m-circir paaŋŋu pu an nín máaǹ puee. Bíǹ baba di ŋūǹ kí yūĺ m-nimbiin kí tɔ̄ m-tundi kí dū tiwaŋkuti tin bi dūu ŋá saraabee kpam nì ti-fatikuu kí ŋá-mi saraa. Man ni-Dindaan Unimbɔti di sòon̄ míǹ.

¹⁶Bíǹ baba di làá kɔ́ m-circir kɔŋkooŋŋun ní kí sútí kí pìl̄ m-teebiliu un pu bi tūǹ m-tundee. Bi làá nīn ŋúb́ m-tundi koobiliŋ.

¹⁷Kí wàatī bí kɔ́ kunimbɔtidii poon cindinee, bi máaǹ kí dū bi-wampeeŋkaati tin bi dū iŋaabu in bí fálfal ki jàkēe kí pèen̄. Bí taa dū ipii kuti wampeeŋkaati kí pèen̄ ŋyunti ŋun bi bí kunimbɔtidiin nì ku-cindi poon ki tūǹ ditundee.

¹⁸Bí dū ŋŋaabu ŋun bí fálfalee kí yíĺ ní kí dū fálfal ŋaabuŋu kí cúú kicaŋ. Kutuntuŋu puee, bí taa cúú dambala.

¹⁹Kí wàatī bí nyā kí kɔ́ boon pú cindin, laakin samaa bée, bí pèetī tiwan tin bi pēeǹ ki túń ditundee. Bí dū tiwampeeŋkaal gbanti kí síiń adiin ŋin bí circir laŋkee, ní kí kpántí tiwan, kí taa nín pēē tiwan tin bí circiree kí gbēē samaa.

²⁰«Bisaraaŋaliibi kaa máaǹ kí kòol̀ diyibaakpandi, kaa tí máaǹ kí yàntī bi-yikpiti ń wíiǹ tikpil, ama bí cā bi-yikpiti tiŋan.

²¹Usaraaŋal ubɔ kaa máaǹ kí nyɔ̀ ndaam kí kɔ́ poon cindin.

²²Usaraaŋal kaa máaǹ kí cáab́ ukpiipu àá unimpu un bi jìn̄ee. Ú cáab́ Isirayeel sapɔmbiki kin kaa nyí uninja ki kée kiba àá usaraaŋal ubɔ kpiipuu.

²³«Bisaraaŋaliibi máaǹ kí dàkà m-nibul bí béé kí gàntī tin bí circiree nì tin kaa bí circiree, tin sá tijɔkɔndee nì tin kaa sá tijɔkɔndee.

²⁴Bíǹ di làá nīn sòoǹ binib bɔti ní kí sòoǹ kí nóó nì m-marab. Bí nīn jīǹ jiŋaalib kí nóó nì akoobil nì abɔkpaa ŋin m tīī-bee. Bi máaǹ kí dū m-wiŋŋuŋfikaai kí sú-mi.

²⁵«Usaraaŋal kaa máaǹ kí sútí kí pìl̄ dinikpil kí kɔ́ǹ u-ba tijɔkɔndi. Ama an yaa sá u-baa àá u-na àá u-biyaamu kansikin kiba àá u-naal àá u-maan àá u-niisal un kaa láá mɔ́ǹee, u ŋūǹ kí sútí kí pìl̄.

²⁶Míǹ boonee, ú ŋá u-ba circir ní kí cīití iwiin iluli ní kí nín kíĺ ditundi.

²⁷Ŋwiin ŋun u yaa fātìi gítì kunimbɔtidii poon cindinee, ú ŋá u-kpitii pɔ̄tam saraau. Man ni-Dindaan Unimbɔti di sòon̄ míǹ.

²⁸Bisaraaŋaliibi làá nīn cáá diyimɔɔl kí nīn bí m-tundin. Bí taa tīī-bi tikpaatan Isirayeel tiŋkin. Man di sá bi-fakal.

²⁹Bi làá nīn jīǹ saraabi nì tiwaŋkuti tin bi cáa ŋáań ikpiti pɔ̄tam saraabee. Isirayeel tiŋkin tin kɔkɔ bi dūu sú-mee kpántì bi-wanti ní.

³⁰Bisaraaŋaliibi di tí yì tijincɔ̀fikaal kɔkɔ nì tin kɔkɔ Isirayeel yab lèekī bi-gaajawanti pu ki tìì-mee. Binib yaa púĺ kpɔnɔee, bí lēē un ŋān̄ ki jítiǹ bi-kɔkɔee kí tīī-bi ní ḿ bìin̄ bi-dicaŋŋi pu.

³¹Ama bisaraaŋaliibi kaa máaǹ kí ŋmɔ́ unoon àá kuwaŋkuluu kun kpíì àá upeel ubɔ cúúyee nanti.»