Read Ntcham Ezéchiel 45 Bible Online

Ezéchiel 45 - Ntcham bible

Ezéchiel 45

¹«Ni yaa làá yàkatī Isirayeel tiŋki kí tīī tinaakɔtee, ní lēē kitiŋ dijandi diba kí dūú sú ti-Dindaan. Kitiŋ dijandi gbanti púuŋŋu ń nīn sá ndɔŋmantikaayee kutukub mmuŋku nì biŋmoo pu ní ki-waaŋŋu ń nīn sá ndɔŋmantikaayee kutukub mmuŋku. Ditinjandi gbanti làá nīn sá circir tiŋki ní.

²Ditinjandi gbanti poonee, bí lēē kunimbɔtidii paaŋŋu ŋu-jannaatiliŋ ń nīn ŋmà ní dijandi diba ń nīn sá ndɔŋmantikaayee alaataa aŋmoo pu. Mpaan ŋubɔ ń nīn dɔ̄ fám kí màntīí tū, ní mpaanee waaŋŋu ń nīn sá ndɔŋmantikaayee imuŋku ili nì saalaa pu.

³Kunimbɔtidii tinjandi poonee, bí ŋmàntī dijandi diba mpúun nì ŋwaan ń nīn ŋmà. Mpúun ń nīn sá ndɔŋmantikaayee kutukub mmuŋku nì biŋmoo pu ní ŋwaan ń nīn sá kutukub saalaa pu. Niin ní circir kɔŋkooŋŋu, <circir páaa laŋki> làá nīn bí.

⁴Ditinjandi gbanti làá nīn sá circir wanti ní. Bí dū-dì kí tīī bisaraaŋaliibi bin bí ti-Dindaan nimbiin circir kɔŋkooŋŋun ditundee. Bi dāa cáá kí mā bi-diiŋŋi niin ní an dāa sá circir paaŋŋu ki tīī circir kɔŋkooŋŋu.

⁵Bí dāá gíti lēē ditinjandi diba di-púuŋŋu ń nīn sá ndɔŋmantikaayee kutukub mmuŋku nì biŋmoo pu, ŋwaan ń nīn sá kutukub saalaa pu kí tīī Leefii yab bin bí kunimbɔtidii tundinee. Bi làá dāá ká niin ntimu kí nīn kóò.

⁶Kí nóó ditinjandi din bi dūu sú ti-Dindaanee púuŋŋu puee, bí ŋmàntī mpúun ń nīn sá ndɔŋmantikaayee kutukub mmuŋku nì biŋmoo pu, ní ŋwaan ń nīn sá kutukub biŋmoo pu. Bi làá mā kitiŋ kiba niin, ní Isirayeel yab un yaa pée lèe ŋūǹ kí kɔ́ niin.

⁷Bí dāá lēē ditinjandi laakin bi lēē ki sú ti-Dindaanee jandi pú nì kitiŋ jandi pú kí tīī dibɔtibil din kā dibeel puee. Ŋwìiń jeetilaŋki púee, ditinjandi gbanti ń bà Meediiteeranee tiŋkuu, ní ŋwìiń nyalaŋki púee, dí bà Isirayeel tinnyɔkɔ. Di-púuŋŋu nì kunaakoou kamaa kpaatanti púuŋŋu ń nīn ŋmà.

⁸An yaa ŋá mimmee abɔtibil làá nīn cáá kitiŋ Isirayeel tiŋkin. Baa làá ti mùul̀ ti-Dindaan nibul, ní kí dū kitiŋ kin kíǹee kí tīī Isirayeel naakɔti.»

⁹Ti-Dindaan Unimbɔti nín sòon̄ puee sèé: «Nimbi abɔtibil ŋin kā Isirayeel beel puee, ni gíti ŋá an jítì mara pu! Fámaan tipɔmbɔti nì diwɔ́bil, kí nóómaan tin tèen̄ee nì tin bí deedeeyee. Ní taa ti fìkì m-nibul gaajawanti. Man ni-Dindaan Unimbɔti di sòon̄!

¹⁰«Ni-saniyab ń nīn sá deedee saniyab ní ni-waŋŋmantikaati ń nīn sá deedee yab.

¹¹Ni-sambiliŋ ŋin ni cáa ŋmàntī tijimpin ni yíì eefa nì ni-wanti tin ni cáa ŋmàntī inyiŋfi bi yíì baatee ń nīn ŋmà, an dàkà yii bi yaa yākatì oomeer saalaa puee, diba pu. Ni-waŋŋmantikaati ń nīn nóó nì oomeer gbanti.

¹²Bí nīn kpántí animbil kuluku jitɔmbi mmuŋku, ní dinimbikundi ń kpántí jitɔmbi imuŋku ita.

¹³«Ni nín làá nīn lèekī ni-saraabi puee sɔ̀. Ni yaa cáń ni-bileeu àá ni-ɔɔjiuee, ní cúú kí yàkatī imuŋku ita pu

¹⁴ní kí yàkatī ni-kpam dilaataal pu kí dū diba pu kí tīī. Ní dū ni-wanti tin bi yíì bati bi yaa yākatì oomeer saalaa pu an sá diba puee kí ŋmàntī ŋkpam. Oomeer nì kɔɔr ŋmà ní.

¹⁵Isirayeel yab naakpaapɔɔkunee, ní lēē ipii kulaafaau poon àá iŋoobu kulaafaau poonee ubɔ kí ŋá tijimpin saraau àá saraawɔkaa àá mpèé saraau. Ni yaa ŋá mimmee, ni làá ká ni-kpitii pɔ̄tam. Man ni-Dindaan Unimbɔti di sòon̄ míǹ.

¹⁶«Bin kɔkɔ kóò Isirayeel tiŋkinee máaǹ kí cáań bi-jandi kí tīī dibɔtibil din kā Isirayeel beel puee.

¹⁷Di sá yii dibɔtibil nín máaǹ kí tīī tiwan tin bi làá dūú ŋá bisaraawɔkaabee nì tijimpin saraabee nì ndaam min bi féeń jiŋaalib yuntiŋuee, cilinjee uŋmapɔɔn jiŋaaliu nì iwiŋŋuŋfikaa nì iyunti in kíǹ Isirayeel yab kpáfée. Dibɔtibil di làá nīn ŋáań ikpiti pɔ̄tam nì tijimpin saraabi nì bisaraawɔkaabi nì mpèé saraabi. U yaa ŋá mimmee, Isirayeel nibul làá ká bi-kpitii pɔ̄tam.»

¹⁸Ti-Dindaan Unimbɔti gíti sòon̄ yii: «Uŋmapeekaa wimpeekaaŋuee, ní dū unaja un laaba kaa wɔ̀b̄ee kí ŋá saraa kí ŋá circir kɔŋkooŋŋu circir.

¹⁹Usaraaŋakpil ń yòon̄ kuwaŋkuluu kun bi dūu ŋá saraayee fatikuu kí dūú ŋmìtī idɔ in pu kunimbɔtidii punuu sàkēe pu nì nsaraafan kpiŋŋi anaatil pu nì idɔ in pu kunimbɔtidii poon cindi punuubi sàkēe.

²⁰Iwiin iluli dalee, bí fàtīí ŋá tiwambaantiil kí tīī un kaa là àá kaa nyí ki ŋá ikpitee. Bi yaa ŋá mimmee, bi làá ŋá kunimbɔtidii circir.

²¹«Ŋwiin ŋubɔ kpá saalku dalee, ní kíĺ kí jī Dilákatil jiŋaaliu. Jiŋaal gbanti làá fōō iwiin iluli, ní iwiin iluli gbanti poonee, ní taa ŋmɔ́ kpɔnɔb bin cáá ŋkpɔnɔnyɔkɔee.

²²Dilákatil jiŋaaliu wimpeekaaŋuee, dibɔtibil ń dū unaja ubɔ kí ŋá saraa úǹ u-ba nì samaa kɔkɔ kpitii pɔ̄tam pu.

²³Iwiin iluli in bi làá dūú jī jiŋaalee kamaayee, ú dū inajaa iluli nì ipijaa iluli in laaba kaa wɔ̀b̄ee kí dūú ŋá saraawɔkaa. Ŋwiin kamaayee, ú dū uŋɔja ubɔ kí ŋá ikpiti pɔ̄tam saraau.

²⁴Kí kúntée, bi yaa dū unaja ubɔ nì upìja ubɔ ki ŋá saraayee, ú dū bilee kiiloobi mmuŋku nì saalaa nì ŋkpam liitirib biluu kí kūtì.

²⁵«Uŋmaluluúti poon iwiin saalku dal, bi yaa bíi jīǹ tibìń jiŋaaliuee, dibɔtibil ń pée ŋá kii u nín ŋá Dilákatil jiŋaaliu puee. Iwiin iluli in bi làá dūú jī jiŋaal gbanti kɔkɔee, ú ŋá saraabaantiibi kí ká ikpiti pɔ̄tam, nì bisaraawɔkaabi bibaantiibi nì bilee nì ŋkpam saraabi bibaantiibi.»