Read Ntcham Ezéchiel 46 Bible Online

Ezéchiel 46 - Ntcham bible

Ezéchiel 46

¹Ti-Dindaan Unimbɔti nín sòon̄ puee sèé: «Kunimbɔtidii poon cindi punyɔkɔki kin bí ŋwìiń nyalaŋki púee máaǹ kí nīn pīī iwiin iluu in binib tūǹ ditundee, ama ŋwiŋŋuŋfikaa dal nì uŋmapɔɔn jiŋaalibee, bí pìitī-kì.

²Dibɔtibil làá nyānní kunimbɔtidii boon cindi ní kí dī kudii kun bí ki pìl̄ kipunyɔkɔee kí kɔ́. Ú yūĺ idɔ in pu punuu sàkēe poon ŋyunti ŋun ní bisaraaŋaliibi bíi ŋáań bisaraawɔkaabi nì mpèé saraabee. Kipunyɔkɔpu niinee, ú tàtīí gbàan̄ kí dū u-yigbeel kí tūū kitiŋ ní kí fàtīí nīn gítí. Baa máaǹ kí pìin̄ kipunyɔkɔee kí cáá sāā kujoou.

³Di sá yii iwiŋŋuŋfikaa dal nì uŋmapɔɔn jiŋaalibee, kitiŋ nee pu nib máaǹ kí dāan̄ kipunyɔkɔee caŋin kí jāam̀ man ni-Dindaan.

⁴«Ŋwiŋŋuŋfikaa dalee, dibɔtibil ń dū apibil aluu nì uŋɔja un laaba kaa wɔ̀b̄ee kí ŋá saraawɔkaa.

⁵Ú dū bilee kiiloobi mmuŋku nì saalaa kí ŋá saraa kí kūtì upìja kamaa pu ní kí dū bilee un u yaa lèe kí ŋá saraa kí kūtì ipii pu. Ú dāá dū ŋkpam liitirib biluu kí kūtì bilee kiiloobi mmuŋku nì saalaayee pu.

⁶Uŋmapɔɔn jiŋaaliu wiiŋyi dalee, ú dū unaja un laaba kaa wɔ̀b̄ee nì apibil aluu ŋin laaba kaa wɔ̀b̄ee nì upìja un laaba kaa wɔ̀b̄ee kí ŋá saraa.

⁷Unaja kamaa nì upìja kamaa puee, ú dū bilee kiiloobi mmuŋku nì saalaa kí kūtì kí ŋá saraa nì bilee min nyɔkɔm u lèe kí kūtì apibil pu kí ŋá saraa. Ú dāá dū ŋkpam liitirib biluu kí kūtì bilee kiiloobi mmuŋku nì saalaa kamaa pu.

⁸Nsan ŋun dibɔtibil yaa dī ki kɔ́ee, ú fàtīí dī nsan gbanti kí nyānní kí jītí kuditaakaau kun pìlīǹ kipunyɔkɔee.

⁹Ama kitiŋ nee nib yaa dòoń kí jāam̀ man ni-Dindaan jiŋaakpaambi wiiŋyi poonee, bin dī ŋgan pú punyɔkɔki ki kɔ́nnée ń dī ŋgiil pú punyɔkɔki kí nyā. Bin dī ŋgiil pú punyɔkɔki ki kɔ́nnée ń dī ŋgan pú punyɔkɔki kí nyā. Ubɔ ń taa fàtīí dī kipunyɔkɔ kin u dī ki kɔ́nnée kí nyā, ama báà ŋma ń dī kipunyɔkɔ kin bíitiǹ kin u dī ki kɔ́nnée kí nyā.

¹⁰Dibɔtibil yaa kóòyee, samaa mun ń kɔ́, u yaa nyēēyee, samaa mun ń nyā.»

¹¹«Jiŋaalib nì iwiŋkpaan dalee, bí dū bilee kiiloobi mmuŋku nì saalaa kí kūtì unaja àá upìja kamaa pu kí ŋá saraa, ní kí dū bilee un nyɔkɔm bi yaa lèe kí kūtì apibil pu kí ŋá saraa. Bilee kiiloobi mmuŋku nì saalaa kamaa puee, bí dū ŋkpam liitirib biluu kí kūtì kí ŋá saraa.

¹²«Dibɔtibil yaa là kí ŋá nlammɔntiim saraau kí tīī ti-Dindaan ní an yaa sá saraawɔkaa àá mpèé saraauee, bí pìitī-u ŋwìiń nyalaŋki pú punyɔkɔki ú dī kí kɔ́. Ú ŋá u-saraabi kii bi nín ŋáań ŋwiŋŋuŋfikaa saraabi puee. U yaa nyánnée, bí fàtīí gíiǹ kipunyɔkɔee kí pìin̄.

¹³«Ŋwiin kamaayee, bí dū dibindi diba pibil din laaba kaa wɔ̀b̄ee kí ŋá saraawɔkaa kí tīī ti-Dindaan. Kutaafaau ní bi máaǹ kí ŋá saraa gbanti.

¹⁴Kutaafaau kamaa muee, bí dū ŋkpam liitirib bili kí búuń ŋyim kiiloobi biŋmoo kí ŋá saraa kí tīī ti-Dindaan. Baabadal saraau marab gbanti làá nīn bí ní ki cá jaanjaan.

¹⁵Bi máaǹ kí dū dipibil nì ŋyim nì ŋkpam kí ŋá saraawɔkaa kutaafaau kamaa kí tīī ti-Dindaan, bí nīn ŋáań míǹ ki cá talku.»

¹⁶Ti-Dindaan Unimbɔti nín sòon̄ puee sèé: «Dibɔtibil yaa lēē u-tinjandi poon dijandi ki pú u-jipɔmbi kansikin ubɔee, dijandi gbanti kpántì u-jipɔɔnee fakal dee. U-jipɔɔn gbanti biyaamu di dāa yì kí jī ditinjandi gbanti difakal. An kpántì bi-wanti, kun puee bi fōō-dì difakal ní.

¹⁷Ama dibɔtibil yaa dū u-tinjandi dijandi ki tīī u-tɔntɔnliibi kansikin ubɔee, dijandi gbanti làá nīn sá ki tīī utɔntɔnlee kí cáá sāā dibatɔl bindi[22], ní dibɔtibil ń fàtīí fōō u-wanti. Di sá yii dibɔtibil u-ba biyaamu di yì u-wanti kí jī difakal.

¹⁸Dibɔtibil kaa máaǹ kí fìkì binib bin pu u kā dibeelee ubɔ wanti tiba kí gbākal̀-u kí fōō u-kpaatanti. U yaa làá tīī u-jipɔmbi ubɔ difakalee, ú lēē u-tinjandi poon, án nín làá ŋá pu bí taa jà m-nibul poon ubɔ u-kpaatanti puee.»

¹⁹Míǹ boonee ní uninjee dū-mi ki dī kipunyɔkɔ kin bí ŋgan pú punuu caŋinee ki cáá-mi ki cūnnì bisaraaŋaliibi diiŋŋi ŋin bí circir kɔŋkooŋŋu caŋinee. U dàkā-mi mpaan ŋubɔ, ŋu bí poon niin ŋwìiń jeetilaŋki pú.

²⁰Niinee ní u bí-mi yii: «Bi yaa kūū kuwaŋkuluu ki ŋá ikpiti pɔ̄tam saraauee, niin ní bisaraaŋaliibi làá nīn tɔ̄kɔntí tinan. Niin mun ní bi làá nīn tɔ̄kɔntí saraabi jinti. An yaa ŋá mimmee, tiba kaa làá nyā kunimbɔtidii boon cindin ní samaa kaa nín gbēē tin bí circiree.»

²¹Míǹ boonee ní u cáá-mi ki cūnnì kunimbɔtidii boon cindin ní ki dū-mi ki dī dicindee kpiŋŋi anaatil. Dikpindi kamaa puee, dicindi nìn bí.

²²Acin anaatilee kaa nìn wāā ní ŋi-kɔkɔ nìn ŋmà. Diba púuŋŋu nìn sá ndɔŋmantikaayee imuŋku ili pu, ní ŋwaan sá mmuŋku nì saalaa pu.

²³Bi nìn dū ataŋkpee ki máń digundi ki tú dicindi kamaa ní bi máń ifan digundee taapu.

²⁴Uninjee nìn bí-mi yii: «An sá asamɔndiin ŋin poon bininjab bin tūǹ ditundi kunimbɔtidiinee làá nīn tɔ̄kɔntí tiwaŋkuti tin samaa cāabìń ki ŋáań saraayee nantee ní.»