Read Ntcham Ezéchiel 47 Bible Online

Ezéchiel 47 - Ntcham bible

Ezéchiel 47

¹Uninjee nìn cáá-mi ki cūnnì kunimbɔtidii punyɔkɔpu. Niinee ní m ká nnyim tòoń ŋwìiń nyalaŋki pú punyɔkɔki taapu. Kunimbɔtidii nyɔkɔpu nìn túĺ ŋwìiń nyalaŋki pú ní. Nnyim nìn pùub̀ kunimbɔtidii giiliŋu pú ki jītí nsaraafan giiliŋu pú.

²Uninjee nìn dū-mi ki dī ŋgan pú punyɔkɔki ki nyáń ní ki yāntì m māntì boon pú ki tú ki cáa sāā ŋwìiń jeetilaŋki pú punyɔkɔki. Nnyim nìn pùub̀ kipunyɔkɔ gbanti giiliŋu pú.

³U nìn còom̄ ki cá ŋwìiń nyalaŋki pú ki ŋúb́ u-ŋaan ŋŋmii ki ŋmāntì ní ki ká ndɔŋmantikaayee kutuku pu. Míǹ boonee ní u cáá-mi ki dūtì nnyimee. Nnyimee nìn bāań m-tafati.

⁴U nìn gíti ŋmāntì kii ndɔŋmantikaayee kutuku pu ní ki cáá-mi ki dūtì nnyim. Nnyim nìn bāań m-tabiŋyiliŋ. U gíti ŋmāntì ki ká ndɔŋmantikaayee kutuku pu ní ki cáá-mi ki dūtì nnyim. Min bí nee, nnyim nìn bāań m-caŋ.

⁵Ní u gíti ŋmāntì nluŋkikaam ndɔŋmantikaayee kutuku pu, ama maa nìn gíti ŋūǹ kí dùtī, di sá yii nnyim nìn jɔ́m̀ ní an sá yii unil ń wāŋkì ní kí nín ŋmā kí dùtī. An nìn dūu kpántì mbuŋkpaan ŋun unil kaa ti ŋūǹ kí dùtēe ní.

⁶Niinee ní u bí-mi yii: «Nisaaleen, a kpēē tiŋanaaa?» U cáá-mi ki kākatì ŋyunti ŋubɔ poon laaba ní ki fātìi gíiǹní-mi mbunee caŋin.

⁷M nìn dáań ki ká yii isufi tikpil nìn yú mbunee gbaŋŋi.

⁸Uninjee nìn bí-mi yii: «Mbun nee pùub̀ ki cá kitiŋ nee ŋwìiń nyalaŋki pú ní. Ŋu sìntī Jɔɔdan tantakalin ní kí tin kɔ́ Ŋyaam mɔɔlin. Ŋu yaa bàn̄ dimɔɔlinee ní ŋú pɔ̀ntī di-nyim ní mí fàtīí kpántí nnyimmɔntiim[23].

⁹Laakin kamaa ní mbunee nyim yaa pùub̄ ki bàn̄ee, tin kamaa pée cáá kufoouee làá nīn kóò niin ní kí bùtī. Ijɔm mun làá bùtī tikpilku. Di sá yii nnyim gbanti kpántí dimɔɔl nnyim, ní ki tìì dimaŋfal laakin kamaa mì yaa pùub̄ ki bàn̄ee.

¹⁰Ŋyunti gbantee, kí yòon̄ Eeni-Geedii bùmbiki kí cáá sāā Eeni-Eegilaayiim bùmbikee, bijɔncuuliibi làá nīn kíǹ ki bí ní. Bi làá nīn díntí bi-laanti dimɔɔgbandi ní. Bi làá ká niin ijɔm kɔkɔ nì i-bulifi kii Meediiteeranee tiŋkuu poonee ní.

¹¹Ama tipúti nì anyimbɔbil ŋin bí dimɔɔgbandee kaa làá ŋāŋkì, ŋíǹ nyim làá nīn sá ŋyaam ŋma ní.

¹²Dibuŋgbándi kamaa puee, isufi in lòoǹ abilee làá nyā. I-faati kpá kí yɔ́ĺ jaanjaan ní i làá nīn lòoǹ abil kaa gbèentí. I làá nīn lòoǹ uŋmal kamaa ní, di sá yii nnyim min nyēeń circir kɔŋkooŋŋunee di làá nīn sɔ̀ŋkī-i. I-biliŋ di làá kpántí tijin ní i-faati ń nīn sá nnyɔkɔ ki cāantí iween.»

¹³Ti-Dindaan Unimbɔti nín sòon̄ puee sèé: «M làá tīī-ni kitiŋ kin Isirayeel naakɔti saalaa nì tilee làá yàkatēe kpaanyɔkɔ. Jooseefi naakooku làá fōō mili pu ní[24].

¹⁴Ní yàkatī kitiŋ an nīn ŋmà. Di sá yii m pūtì ki pōoǹ kí dū Isirayeel tiŋki kí tīī ni-naanjab, ní kì kpántì díǹ pu nee ni-fakal.

¹⁵Ŋgiil púee, kitinnyɔkɔ làá kíĺ Meediiteeranee tiŋkuu ní kí nóó didandi din jītí Eeltɔn nì Leeboo-Amaati nì Seedaad timmunee.

¹⁶Míǹ boonee ní kí dūú dī Beeroota nì Siibiraayiim timmu mun bí Damaasi nì Amaati timmu kansikinee. Kí kúntée, kitinnyɔkɔee ń nóó didandi din cá Aseer-Tikɔn tiŋki kin pìlīǹ Ooran tinnyɔkɔkee.

¹⁷Kitinnyɔkɔ gbanti làá kíĺ Meediiteeranee tiŋkuu kí cáá sāā Asaar-Eenam tiŋki ní. Ŋgan púee, kitinnyɔkɔee làá cùú sāā Damaasi nì Amaati timmun ní. Ŋgan pú jandi di làá nīn bí puee dee.

¹⁸Ŋwìiń nyalaŋki púee, kitinnyɔkɔ làá kíĺ dijandi din bí Damaasi nì Ooran timmu kansikinee ní kí dūú dī Jɔɔdan tantakal din bí Galaadi tiŋki nì Isirayeel tiŋki kansikinee ní kí cáá sāā Tamaar tiŋki kin bí Ŋyaam mɔɔl caŋinee. Ŋwìiń nyalaŋki jandi di làá nīn bí puee dee.

¹⁹Ŋgiil púee, kitinnyɔkɔ làá kíĺ Tamaar kí cáá sāā kibùmbiki kin bí Meeriiba Kadeesi tiŋkinee, ní kí dūú kpàkaǹ Eejipiti buŋŋu[25] kí cáá sāā Meediiteeranee tiŋkuu. Ŋgiil jandi di làá nīn bí puee dee.

²⁰Ŋwìiń jeetilaŋkee, Meediiteeranee tiŋkuu di làá nīn sá kitinnyɔkɔ kí yòon̄ ŋgiil pú kí cáá sāā Leeboo Aamaati tiŋki kin bí ŋgan púee. Ŋwìiń jeetilaŋki jandi di làá nīn bí puee dee.

²¹«Ní yàkatī kitiŋ gbanti kí tīī Isirayeel naakɔti.

²²Ní tɔ̄ kasi kí yàkatī-kì kí tīī ni-ba nì binicambi bin kóò ni-kansikin ki màl̄ mbiyaamu kitiŋ nee poonee. An nicambee kpántì kii Isirayeel yabee ní ki kíǹ ki sá m-nibul yab. Bi mun máaǹ kí fōō ditinjandi Isirayeel yab naakɔti kansikin.

²³Unicaan yaa kóò kunaakoou kun poonee, niin ní bi máaǹ kí gíí kitiŋ dijandi kí tīī-u. Man ni-Dindaan Unimbɔti di sòon̄ míǹ.»