Read Ntcham Ezéchiel 48 Bible Online

Ezéchiel 48 - Ntcham bible

Ezéchiel 48

¹«Tinaakɔti yiŋŋi nì ti-jaŋŋi sɔ̀. Daani naakooku jandi làá nīn bí ŋgan pú fɔ́ŋŋŋ, kí nóó didandi din jītí Eeltɔn nì Aamaati nì Asaar-Eenam timmu mun pìlīǹ Damaasi nì Amaati timmuee. Dì làá nìkī kí yòon̄ ŋwìiń nyalaŋki pú kpaanyɔkɔki kí cáá sāā Meediiteeranee tiŋkuu ŋwìiń jeetilaŋki pú.

²Kí yòon̄ Daani naakooku jandi nín bí pu ŋwìiń nyalaŋki pú kí cáá sāā ŋwìiń jeetilaŋki púee, Aseer naakooku jandi di làá nīn bí.

³Aseer naakooku jandi púuŋŋu nín bí puee, Neefitalii naakooku jandi di dī.

⁴Neefitalii naakooku jandi púuŋŋu nín bí puee, Manasee naakooku jandi di dī.

⁵Manasee naakooku jandi púuŋŋu nín bí puee, Eefiraayiim naakooku jandi di dī.

⁶Eefiraayiim naakooku jandi púuŋŋu nín bí puee, Rubeen naakooku jandi di dī.

⁷Rubeen naakooku jandi púuŋŋu nín bí pu kí yòon̄ ŋwìiń nyalaŋki kí cáá sāā ŋwìiń jeetilaŋki púee, Juuda naakooku jandi di dī.»

⁸«Juuda naakooku jandi púuŋŋu nín bí pu kí yòon̄ ŋwìiń nyalaŋki kí cáá sāā ŋwìiń jeetilaŋki púee, bí kíń dijandi diba, di-púuŋŋu nì kunaakoou kamaa jandi ń nīn ŋmà ní ŋwaan ń nīn sá ndɔŋmantikaayee kutukub mmuŋku nì biŋmoo pu. Kansikin ní bi làá mā circir kɔŋkooŋŋu.

⁹Dijandi din ni làá lēē kí tīī ti-Dindaanee púuŋŋu ń nīn sá ndɔŋmantikaayee kutukub mmuŋku nì biŋmoo pu ní ŋwaan ń nīn sá kutukub mmuŋku pu.

¹⁰Ní gíí kitiŋ gbanti dijandi kí tīī bisaraaŋaliibi. Dijandi gbanti púuŋŋu kí yòon̄ ŋwìiń nyalaŋki pú kí cáá sāā ŋwìiń jeetilaŋki pú ń nīn sá ndɔŋmantikaayee kutukub mmuŋku nì biŋmoo pu, ní kí yòon̄ ŋgiil pú kí cáá sāā ŋgan pú ń nīn sá kutukub saalaa pu. Kansikinee ní bí mā ti-Dindaan circir kɔŋkooŋŋu.

¹¹Dijandi gbantee, bisaraaŋaliibi Sadooki naantiibi di yì. Bi túń ti-Dindaan tundi deedee. Isirayeel yab di nìn fātì bi-boon ki tīī Unimbɔtee, bíǹ kaa nìn dū-u ki fá kii Leefii yab nín ŋá puee.

¹²An pu ní bi làá fōō ditinjandi din bi dūu sú ti-Dindaanee poon dijandi. Bi-jandi làá nīn nákáǹ Leefii yab yal ní.

¹³Leefii yab jandi làá nīn bí kii bisaraaŋaliibi jandee ní. Bi-liitil jandi púuŋŋu ń nīn sá ndɔŋmantikaayee kutukub mmuŋku nì biŋmoo pu, ní ŋwaan ń nīn sá kutukub saalaa pu.

¹⁴Ditinjandi gbanti bɔti di páb́ ki jítiǹ kitiŋ jaaŋŋi ŋin kɔkɔ kíǹee. An puee ubɔ kaa cáá nsan kí kpántí ditinjandi gbanti àá kí nyāfì-dì àá kí dū-dì kí tīī ubɔ. Di sá yii bi dū-dì ki sú ti-Dindaan ní.»

¹⁵«Ditinjandi din bi lēē ki bíl̀ gbanti poonee, an làá kíń kijaŋ kin làá nīn cáá ŋwaan kii ndɔŋmantikaayee kutukub biŋmoo pu, ní mpúun ń nīn sá kutukub mmuŋku nì biŋmoo puee. Kijaŋ gbanti kaa sá circir tiŋki. Bi ŋūǹ kí mā adiin kí nīn kóò, ní kí nīn kpàá tiwaŋkuti kitiŋ ń nīn bí kansikin.

¹⁶Kitiŋ gbanti jannaatiliŋ làá nīn ŋmà, ní dijandi diba púuŋŋu ń nīn sá ndɔŋmantikaayee kutukub binaa nì alaataa aŋmoo pu.

¹⁷Kitiŋee jannaatiliŋ puee, mpaan ŋubɔ ń nīn dɔ̄ fám ŋwaan ń nīn sá ndɔŋmantikaayee alaataa ali nì imuŋku ili nì saalaa pu.

¹⁸Ditinjandi din bi dūu sú ti-Dindaanee púuŋŋu puee, mpaan ŋubɔ làá kíń kitiŋ ŋwìiń nyalaŋki pú kii ndɔŋmantikaayee kutukub saalaa pu, ní kí kíń ŋwìiń jeetilaŋki pú míǹ mbaantiim. Bí dū tijin tin bi làá cā niinee kí kpíiǹ binib bin tūǹ kitiŋee poon ditundee.

¹⁹Kitiŋee poon tɔntɔnliibi bin làá kpɔ̀ kitiŋ gbanti puee làá nyānní Isirayeel naakɔti kɔkɔn ní.

²⁰Atinjan ŋin bi dūu sú ti-Dindaanee jannaatiliŋ làá nīn ŋmà ní, ní dijandi diba púuŋŋu ń nīn sá ndɔŋmantikaayee kutukub mmuŋku nì biŋmoo pu. Bí cúú kí yàkatī minaa pu ní kí dū dijandi diba kí yóoń an kpántí kitiŋ wanti.

²¹Dijandi din kíǹee, dibɔtibil di yì. U-tinjandi ń nīn bí kitiŋ kin bi dūu sú ti-Dindaanee jandi púɔɔ, kí nīn bí kitiŋ mun tinjandi pú. Dí nóó atinjan ŋin kíǹee púuŋŋu kí cáá sāā kii ndɔŋmantikaayee kutukub mmuŋku nì biŋmoo pu, kí yòon̄ ŋwìiń nyalaŋki pú kí cáá sāā kitiŋ kpaanyɔkɔ, ní kí yòon̄ ŋwìiń jeetilaŋki pú kí cáá sāā Meediiteeranee tiŋkuu. Kitiŋ kin bi dūu sú ti-Dindaanee nì circir kɔŋkooŋŋu ń nīn bí ditinjandi gbanti kansikin.

²²Leefii yab timmu nì kitiŋ tinjandi ń nīn bí dibɔtibil tinjandi kansikin. Dibɔtibil tiŋki ń nīn bí Juuda naakooku jandi ŋgiil pú nì Beenjameen naakooku jandi ŋgan pú kansikin.»

²³«Tinaakɔti tin kíǹee tinjaŋŋi sɔ̀. Beenjameen naakooku jandi ń kíĺ ŋwìiń nyalaŋki pú kpaanyɔkɔki kí cáá sāā Meediiteeranee tiŋkuu ŋwìiń jeetilaŋki pú.

²⁴Kí yòon̄ Beenjameen naakooku jandi púuŋŋu nín bí pu ŋwìiń nyalaŋki pú kí cáá sāā ŋwìiń jeetilaŋki púee, Simeeyɔn naakooku jandi di làá nīn bí niin.

²⁵Simeeyɔn naakooku jandi púuŋŋu nín bí puee, Isakaar naakooku jandi di làá nīn dī.

²⁶Isakaar naakooku jandi púuŋŋu nín bí puee, Sabulɔn naakooku jandi di dī.

²⁷Sabulɔn naakooku jandi púuŋŋu nín bí pu kí yòon̄ ŋwìiń nyalaŋki kí cáá sāā ŋwìiń jeetilaŋki púee, Gaadi naakooku jandi di dī.

²⁸Gaadi naakooku ŋgan pú kpaanyɔkɔ di làá nīn sá kitiŋ kpaanyɔkɔ. Kì làá kíĺ Tamaar tiŋki ŋwìiń nyalaŋki pú kí cáá sāā kibùmbiki kin bí Meeriiba, Kadeesi tiŋkinee, ní kí nìkī kí kpàkaǹ Eejipiti buŋŋu[26] kí cáá sāā Meediiteeranee tiŋkuu.

²⁹Kitiŋ kin ni làá tɔ̄ kasi kí yàkatī kí tīī Isirayeel yab naakɔti án kpántí bi-fakalee dee. Man ni-Dindaan Unimbɔti di sòon̄ míǹ.»

³⁰«Jeerusaleem tiŋki punyɔmmu saalaa nì mulee sɔ̀. Bi làá pɔ̄ kipunyɔkɔ kamaa Isirayeel yab naakɔti saalaa nì tilee kubɔ yindi ní. Ŋgan púee, digundi púuŋŋu làá nīn sá ndɔŋmantikaayee kutukub binaa nì alaataa aŋmoo pu. Digundi gbanti puee, mpunyɔmu muta di làá nīn bí: Rubeen punyɔkɔki nì Juuda punyɔkɔki nì Leefii punyɔkɔki[27].

³²Ŋwìiń nyalaŋki púee, digundi púuŋŋu làá nīn sá ndɔŋmantikaayee kutukub binaa nì alaataa aŋmoo pu. Digundi gbanti puee, Jooseefi punyɔkɔki nì Beenjameen punyɔkɔki nì Daani punyɔkɔki di làá nīn bí.

³³Ŋgiil púee, digundi púuŋŋu làá nīn sá ndɔŋmantikaayee kutukub binaa nì alaataa aŋmoo pu. Digundi gbanti puee, mpunyɔmu muta di làá nīn bí: Simeeyɔn punyɔkɔki nì Isakaar punyɔkɔki nì Sabulɔn punyɔkɔki.

³⁴Ŋwìiń jeetilaŋki púee, digundi púuŋŋu làá nīn sá ndɔŋmantikaayee kutukub binaa nì alaataa aŋmoo pu. Digundi gbanti puee, mpunyɔmu muta mun di làá nīn tí bí: Gaadi punyɔkɔki nì Aseer punyɔkɔki nì Neefitalii punyɔkɔki.

³⁵Digundi din māntìi tú Jeerusaleem tiŋkee púuŋŋu kɔkɔ làá nyā ndɔŋmantikaayee kutukub saalku nì bita pu ní. «Kí yòon̄ ŋwìiń gbanti kí nīn cée, bi làá nīn kíǹ ki yíì kitiŋ gbanti yii: <Ti-Dindaan bí>».