Read Ntcham Ezéchiel 7 Bible Online

Ezéchiel 7 - Ntcham bible

Ezéchiel 7

¹Ti-Dindaan sòon̄ nì mi yii:

²«Nisaaleen, pīlifì tin man ni-Dindaan Unimbɔti bíi sòoǹ nì Isirayeel yabee: An dóò! Nnaabu kpátì ki bàn̄ kitiŋ jannaatiliŋ.

³Kɔŋkɔnnee an dóò ni-pu: m làá yàntī m-ŋuul ń jēetí ni-pu. Ni-bimbim ní m làá dūú sòoǹ ni-bɔti ní kí pà-ni ni-timbiilituuŋŋi paati.

⁴M làá dàkà-ni nnimbinaakulim kaa làá sɔ̄ ni-saai báà fiii. M làá pà-ni ni-bimbim paati ní kí nyāntí ni-timbiilituuŋŋi kí páań mpaampiin pu. Niinee ni làá béé yii man di sá ni-Dindaan.

⁵«Ti-Dindaan Unimbɔti nín sòon̄ puee sɔ̀: Nnaabu dòoń, nnaabu ŋun baa láá pée kée dòoń!

⁶An dóò, an dóò ní, nnaabu bíi bɔ́ntí kí jēetí ni-pu, ŋu dòoń!

⁷Nimbi bin kóò kitiŋ nee puee, dinàandi dòoń ni-pu! Ŋyunti dòoń, ibɔsoon wiiŋŋu tóobiń. Dipɔɔbiildi làá fōō dipɔɔpindi paaŋŋu ajoon pu.

⁸An kaa ti làá tàan̄, kɔŋkɔnnee m làá kpáatí m-ŋuul kí sìtī ni-pu ní kí yàntī m-bum ń tɔ̄ mi-tundi kí cáá kátí. Ni-bimbim ní m làá dūú sòoǹ ni-bɔti ní kí pà-ni ni-timbiilituuŋŋi paati.

⁹M làá dàkà-ni nnimbinaakulim kaa làá sɔ̄ ni-saai. M làá pà ni-bimbim paati ní kí nyāntí ni-timbiilituuŋŋi kí páań mpaampiin pu. Ni làá dāá béé niinee yii man ni-Dindaan di bíi dátí ni-tafal.

¹⁰«Ibɔsoon wiiŋŋu sèé! Ŋu bāań ki dóò. Ipɔŋkpiti bí an kɔkɔ pu, dilambil yíkì tiŋan pu.

¹¹Tipɔmbɔti bí kii ndɔ ní bi dūu cóoǹ kí ŋá ikpitee. Ni-wanti tiba kaa ti làá kíń ni-cee, ni-gaajati kaa làá kíńaaa, ni-wíiŋŋu kaa làá kíńaaa, ni-nyooti mun kaa làá tí kíń.

¹²Ŋyunti bāań ní nee, ibɔsoon wiiŋŋu tóobiń. Biwandaliibi ń taa nín̄ bíi fàal̀, biwannyafiliibi mun ń taa nín̄ bí kunimbaaun. Di sá yii m gíí samaa kɔkɔ pu diŋuul ní.

¹³Báà uwannyafil yaa ŋmátì kaa kpíìyaaa, waa ti làá ŋmā kí gítí kí yòon̄ u-wanti tin u nyáfée. Di sá yii dileedakal din sòoǹ án nín làá nàan̄ samaa kɔkɔ puee kaa làá gbíntí fám. Báà ŋma bí ikpitin, an pu ní báà ubɔ kaa làá ti ká mpɔn.

¹⁴Bi dāa ŋūǹ kí búń ŋyin kí bɔ́ntí kí cù kujaau, ama báà unibambaanti kaa làá cù. Di sá yii m gíí samaa kɔkɔ pu diŋuul ní.»

¹⁵An làá nīn sá kujaau ní mmɔŋki, ní bìlbil kúm nì ŋkùm bí adiinni ki nà. Bin bí tisatinee làá kpú kujaaun, ní bin bí kitiŋinee, ŋkùm nì iween ń kpɔ̀-bi.

¹⁶Bin làá dāá kíń ki bí dimaŋfalinee làá dāá sāǹ kí cù ajoonni. Kii abeenanjil nín yáliŋkí puee, míǹ ní bi làá dāá yāliŋkì bi-kpitii pu.

¹⁷Bi-ŋalii kaa dāa gíti cáá mpɔn, ní bi-tabiŋyiliŋ ń dāá yɔ̀tī.

¹⁸Bi làá dāá nīn lōō kpɔsatab, ní bi-wunti ń dāá sāǹ yàrrr. Icoo làá dāá cúú-bi ní gbòooo, ní bí dāá kòol̀ ayibaakpan.

¹⁹Bi làá dāá dū bi-nimbiliŋ kí fá adan pu, bi-sindaariyau làá dāá kpántí kii titampummoolee ní kí tīī-bi. Di sá yii ŋwiin ŋun ti-Dindaan làá dāá gíí diŋuulee, bi-nimbiliŋ àá bi-sindaariyau kaa dāa ŋūǹ kí fīī-bi. Baa làá dāá ká tijin kí jī, ní bi-pooŋyi ń dāá dūú fáká. Di sá yii animbil nì sindaariya di sá bi-yìntitam nyeel.

²⁰Bi-gaajati nyaaŋku di nìn yòontí-bi ní bi dūu mɔ́ɔ́ awaa ŋin sá ntimbiil wanti nì titantaŋwanee. An pu ní ti-Dindaan bí yii: «M làá dū bi-gaajati gbanti kí kpántí titampummool.

²¹M làá yàntī binicambi ń fūkul̀-tì, ní bin kaa bí tibanee ń yòon̄-tì kí cáá búntí kii kujaau poon ní bi kée. Bi làá dāá kɔ́ǹ-tì tijɔkɔndi.

²²Bi yaa láa bíi kɔ̄ntí m-Diiku kun sá m-gaajawantee tijɔkɔndee, maa làá pée ŋá tiba. Digaŋgandambi làá dāá dāan̄ kí kɔ́ǹ-ku tijɔkɔndi.

²³Mɔ́ɔ́ ikusaka, di sá yii binikpɔliibi gbí kitiŋin, ní tipɔmbɔti gbí Jeerusaleem tiŋkin.

²⁴M làá cáań anibul ŋin cáá nnimbinaakulimee ŋí dāan̄ kí fōō bi-diiŋŋi. M làá kúntí bi-pɔndambi lambil, ní kí bīil̀ bi-waatootipaaŋyi.

²⁵Dinyoondi bí ki dòoń. Bi làá dāá nyàab̀ ŋgbansɔŋfi kaa làá dāá ká-ŋu.

²⁶Inaabu làá dāá nīn dī tɔb, ní atulim bɔti ń dāá nīn dòoń kaa gbèentí. Binib làá dāá gbàam̀ Unimbɔti bɔnaatiliu yii ú ká dileedakal. Usaraaŋakpil kaa dāa gíti cáá tiba kí dàkà, ní bitindaŋkpilib kaa dāa gíti cáá isaŋki kí tīī.

²⁷Ubɔti làá dāá nīn kā dikpool, dibɔtibil kaa dāa gíti cáá dimákal, ní kitiŋee nib báà ŋma wunti dāa gbáà kpàkpakpa. M làá dāá dū bi-bimbim ní kí sòoǹ bi-bɔti, ní kí sòoǹ bi-bɔti kii an nín máaǹ puee. Niinee bi làá dāá béé yii man di sá bi-Dindaan.»