Read Ntcham Ezéchiel 9 Bible Online

Ezéchiel 9 - Ntcham bible

Ezéchiel 9

¹Míǹ boonee, m gbìl̄ ti-Dindaan yíiń mpɔn yii: «Nimbi bin di làá jáǹ Jeerusaleem tiŋkee, ní dāam̄maan! Báà ŋma ń nīn ŋúb́ u-janjawanti u-ŋaan kí dāá nàan̄-kì.»

²Niinee m ká bininjab biluu nyánní kunimbɔtidii punyɔkɔki yilpu pú yaka ki ŋúb́ bi-janjawanti. Uninja ubɔ nìn yú bi-kansikin ki pēē ŋŋaapiin bɔkutil ki gbìn̄ kun pu u làá ŋmèe u-caŋ. Bi táá dicilpu ki dɔ́miń ní ki yúl̀ ki kɔ́ĺ tasa kúti saraafaŋŋu.

³Ní Isirayeel Nimbɔtiu nyooti yíkìi dāntì keerubimbi bin pu tì nìn bée ki nín cá kunimbɔtidii punyɔkɔpu. Ní ti-Dindaan yíiń uninja un pēē ŋŋaapiin bɔkutil, ki gbìn̄ tipilindi tin pu u làá ŋmèe u-caŋ,

⁴ní ki bí-u yii: «Yìiǹ Jeerusaleem tiŋki kɔkɔn. Un kamaa bíi yáliŋkí an páb́-u bi nín bíi tūǹ ntimbiil tuuŋŋee puee, á dáań udaan yigbeel.»

⁵Míǹ boonee, m gbìl̄ u tùkū bin kíǹee yii: «Ní páań uninja nee boon kí kpɔ̀ bin kóò kitiŋ nee puee. Ní ŋá nnimbinaakulim, kí taa kíń báà ubɔ.

⁶Ní kpɔ̀ kí céetí bitikpilib kí kpáaǹ nnaacimpɔmbiyaamu nì nsapɔmbiyaamu nì mbiyaamu nì binimpoobi. Ama ní taa gbēē bin cáá kudaaŋŋu bi-yigbeel puee[5]. Ní kíĺ m-Diikun doo.» Niinee ní bi kíĺ ki bíi kù bitindaŋkpilib bin nìn bí kunimbɔtidii nyɔkɔpuee.

⁷Ti-Dindaan nìn bí-bi yii: «Dūmaan anikpil kí gbéeǹ kunimbɔtidii cindi kí kɔ́ǹ-ku tijɔkɔndi. Nín̄ cámaan!» Ní bi nyáń kunimbɔtidiin ki cūtìi pɔ̄fì binib kitiŋin.

⁸Bi nín bíi kù binib mimmee, m kíǹ m-baba niin ní m tātìi gbāaǹ kitiŋ m-yigbeel tūū kitiŋ ki téeń yii: «Abàa, ti-Dindaan Unimbɔti, a nín kpáatì a-ŋuul ki sītì Jeerusaleem pu minee, a làá kpɔ̀ kí céetí Isirayeel yab bin kíǹee níii?»

⁹Ní u kíí-mi yii: «Isirayeel yab nì Juuda yab nín ŋá ikpiti iŋyee wīikí tikpil. Bi yāntì nnikpaakoon gbí kitiŋ kɔkɔ pu ní Jeerusaleem tiŋki gbí ikpiti. Binib bí ki lì yii: <Ti-Dindaan dū kitiŋ nee ki fá ní kaa wāĺ-ti.>

¹⁰An puee m làá dàkà-bi nnimbinaakulim kaa làá sɔ̄ bi-saai. M làá yàntī kun bi ŋée ń fàtīí lítí bi-yil pu.»

¹¹Ŋyunti gbantee, uninja un bàà pēē ŋŋaapiin bɔkutil ki gbìn̄ tipilindi tin pu bi ŋmèe dɔ́miń ki sòon̄ u nín túń ditundi an cōom̀ puee, yii: «A nín bí yii ḿ ŋá puee, m ŋá míǹ.»