Read Ntcham Daniel (hébreu) 12 Bible Online

Daniel (hébreu) 12 - Ntcham bible

Daniel (hébreu) 12

¹«Ní ntuunee gíti bí-mi yii: <Ŋyunti gbantee, Miikayeel un sá ituun kpiliu ki cí a-nibulee làá dāá nyānní. An dāa sá falaakpaŋkpaan yuntiŋu ní. Atimbun nín bí ki dāa sāā díǹ nee, baa láá pée ká an falaau juti. Ŋyunti gbantee, a-nibul kansikin un yindi bi ŋmàn̄ ki ŋá dimaŋfal gbɔŋkunee làá dāá ŋmátí[39].

²Binib tikpil bin kpántì ntam ki dɔ̄ dikaakulin ki gèeǹee làá dāá fìntī, ní bi-kansikin biba ń kɔ́ dimaŋfal din kaa cáá dikúntilee poon, ní bin kíǹee ń dāá kɔ́ icoo nì nnaabu ŋun kaa cáá dikúntilee poon[40].

³Binib bin cáá dinyilee dāa jìl̀ ní pàlpal kii kutagbɔŋuee. Bin yaa dàkā binib tikpil bi kpántì deedeedambee, bi dāa jìl̀ kii iŋmalbijaayee ní ki cá jaanjaan.

⁴«<Sii, Daniyeel, á kpāafì tibɔti nee dibalin kí kpáb́ kugbɔŋu nee kí cáá sāā ŋyuntijoolkaa. Tikpil làá dāá kàaǹ kugbɔŋu gbanti ní bi-nyil ń wíiǹ[41].>»

⁵«Mama Daniyeel, m bíi kpèéyee ní ki ká binib bili biba nyáń ki yú. Ubɔ yú dibuŋgbándi diba pu, ní un kíǹee mun yú dibuŋgbándi din kíǹee pu.

⁶Ní bi-kansikin ubɔ bí uninja un pēē ŋŋaabu ŋun bí fálfalee bɔkutil ki tɔ́kɔ́ mbunee nyim puee yii: <Ŋyunti ŋulɔŋu ní maamaaci tuuŋŋi nee làá nín kúntí dee[42]?>

⁷Ní uninja un pēē ŋŋaabu ŋun bí fálfalee bɔkutil ki bàà tɔ́kɔ́ mbunee nyim puee yōoǹ u-ŋaŋgiil nì u-ŋaŋgan ki túĺ yilpu ní m gbìl̄ u lī yii: <M pūtì Unimbɔti un bí ki cá jaanjaanee yii atuun gbanti làá ŋá abin ata nì dijandi ní kí nín kúntí. Unimbɔti nibul pɔŋŋu yaa láa nāaǹ kɔkɔ múbuee ní tiwan gbanti kɔkɔ làá kúntí[43].>

⁸«M gbìl̄ tin bi sòon̄ee ama ní kaa gbìl̄ ti-taapu. An pu ní m bālifì yii: <M-dindaan, tin bí nee kɔkɔ làá dāá pée kúntí nì mana dee?>

⁹Ní u kíí-mi yii: <Nín̄ cá, Daniyeel, di sá yii tibɔti nee sá bí kpāafì-tì dibalin án nīn kpáb́ ki bīī múlmul kí cáá sāā ŋyunti ŋun ní tikɔkɔ làá kúntée ní.

¹⁰Bi làá dāá fíntí binib tikpil kí ŋá-bi circir bí nīn pīiǹ káŋkaŋ. Binikpitib kaa làá dāá ŋmā kí gbìl̄ taapu ní ki dāa nìkì ki ŋáań ikpiti, ama binyiliibi bíǹ dāa gbìl̀ taapu[44].

¹¹Kí yòon̄ ŋyunti ŋun bi làá dāá yàntī bí gbèen̄ saraa un bi ŋáań baabadal ki tìì Unimbɔtee kí cáá sāā ŋyunti ŋun bi làá dāá dū kuwaŋkpitiu kun cāabìń ntimbiilee kí síiń circir paaŋŋu puee, iwiin làá dāá nyā kutuku ubɔ nì iwiin saalaa kpá alaataa ata ní.

¹²Un yaa láa ŋúń ki kāl̀ ki tin sāā iwiin kutuku ubɔ nì alaataa ata nì iwiin iŋmoo kpá imuŋku ilee dāa bí mmɔnneeee!

¹³Sii Daniyeel, á pɔ́ɔǹ a-ba kí tin kátí-ku. A làá dāá ŋùŋfì ní kí dāá yīkì kí fōō a-paati iyuntijoolkaa dal[45].>»