Read Ntcham Daniel (hébreu) 2 Bible Online

Daniel (hébreu) 2 - Ntcham bible

Daniel (hébreu) 2

¹Neebukadineesaar nín kāl̀ dibeel dibinliliitiil poonee, ní u dámintì kudamintiiu kubɔ. Kudamintiiuee bɔti nìn páb́-u tikpil áli gba waa nìn gíti ŋūǹ kí gèeǹ.

²Niinee ní u yāntì bi yíiń bikpaŋkpantiibi nì bibɔɔbi nì bikpaŋkpalib nì bin wāĺee bí tùkù-u kudamintiiu kun u dámintèe. Ŋyunti ŋun bi bāań ki yúl̀ ubɔti nimbiinee,

³ní u bí-bi yii: «M dámintì kudamintiiu kubɔ. Kudamintiiuee bɔti páb́-mi tikpil, ní m là yii ní tùkù-mi m nín dámintì puee.»

⁴Ní bi kíí ubɔti Aram yab sooŋyi poon yii: «Ti-baa ubɔti, Unimbɔti ń tīī-si mmaŋfafɔkɔn! Tùkù-ti a nín dámintì puee, ní timbi a-tɔntɔnliibi ń lēē ku-taapu kí tùkù-si.»

⁵Ní ubɔti kíí-bi yii: «M nín lēē puee sɔ̀. Ni yaa kaa tùkū-mi m nín dámintì puee ki lēē taapu ki tùkū-mee, m làá yàntī bí tɔ̀ntī-ni, ní kí yàntī bí kpēelikì ni-diiŋŋi ŋí kpántí adigbuŋkati.

⁶Ama ni yaa ŋúń ki tùkū-mi m nín dámintì puee ki lēē taapu ki tùkū-mee, m làá tīī-ni tiwampɔkaal tikpil nì tinyool. An puee ní tùkù-mi m nín dámintì puee kí lēē taapu kí tùkù-mi.»

⁷Ní bi fātìi kíí ubɔti nliliitiim yii: «Ti-baa, tùkù-ti a nín dámintì puee ní ti mun ń ŋmā kí lēē taapu kí tùkù-si.»

⁸Niinee ní ubɔti téeń yii: «M nyí ni nín pée bíi tàantí kí ŋmā kí ká ŋyuntee, di sá yii ni nyí tiŋan pu tin m lēē ki síiǹ kí ŋée.

⁹Ni yaa kaa pée tùkū-mi m nín dámintì puee, ditafadaaldi dibaantiil di dɔ̄ ki cí ni-kɔkɔ. Ni tí bíi bɔ́ntí tiba dicilpu kí dāá mɔ̄ntì-mi kí kīil̀-mi kí nīn cɔ́tí yii m-landɔkɔŋu làá kpántí dee. An puee ní tùkù-mi m nín dámintì puee. Mimmee m béè yii ni làá ŋmā kí lēē taapu mun kí tùkù-mi dee.»

¹⁰Ní bi tí bí ubɔti yii: «Báà unil kpá kitiŋ pu ki làá ŋmā kí ŋá tin sii ti-baa ubɔti bālifì yii tí ŋá nee. Báà ubɔti ubɔ, u sá ukpaan ki pɔ̄ɔ̄ min min kaa láá pée bālifì bikpaŋkpantiibi nì bibɔɔbi nì bin wāĺee bí ŋá tin ní a bālifì yii tí ŋá nee.

¹¹Tin ní a bàlifēe pɔ̄ɔ̄ tikpil ní ubɔ mun kpá kí ŋmā kí tùkù-si tin a bālifèe, see inimbɔti. Too i mun di kaa kóò timbi binib kansikinee.»

¹²Niinee ubɔti fōō mbum ŋkpitim pu ní ki tīī mara yii bí kpɔ̀ Babiloon nyiliibi kɔkɔ[4].

¹³Ní ubɔti nyīī ŋŋal ní an gbītì an kɔkɔ yii bí kpɔ̀ binyiliibi, ní bi tú binib bí cùú nyàab̀ Daniyeel nì u-bɔɔbi mun kí kpɔ̀.

¹⁴Ŋyunti ŋun Ariyɔɔki un sá ubɔti janjaliibi bin cí-uee kpiliu nyáń kí bàà kíĺ Babiloon nyiliibi dikpɔ̀lee, ní Daniyeel kíntì-u nsanni ní ki dū dinyil nì iciin ki sòon̄ nì u.

¹⁵Daniyeel nìn bālifì-u yii: «Ba pu ní ubɔti yóoǹ ditafadaaldi di baasii pɔ̄ɔ̄ míǹ ní.» Niinee ní Ariyɔɔki nín dū tibɔti ki máafì-u.

¹⁶Daniyeel gbìl̄ mimmee ní ki nín kóò ubɔti cee dicilpu ní ki gbāam̀-u yii ú pée pɔ̄-u ŋyunti fiii ú ŋmā kí tùkù-u u nín dámintì puee nì an taapu.

¹⁷Niinee ní Daniyeel nín gítí u-dumpu ki dū tibɔtee ki máafì u-bɔɔbi Ananiya nì Miisayeel nì Asariya.

¹⁸U nìn bí-bi yii bí nīn mèé yilpu Nimbɔtiu ú sɔ̄ bi-saai kí lēē maamaaci damintiiku gbanti kí dàkà-bi, án nín làá ŋá pu bí taa kpɔ̀ Babiloon nyiliibi kí kpáaǹ bi muee.

¹⁹Kunyeeu gbantee ní Unimbɔti lēē abɔɔn gbanti ki dàkā Daniyeel dileedakal poon. Niinee ní Daniyeel nyɔ́ŋkì yilpu Nimbɔtiu,

²⁰ki lī yii: «Tí nyɔ̄ŋkì Unimbɔti baabadal kí taa gbèen̄, úǹ di yì iciin nì mpɔn.

²¹Iyunti nì tibɔti nín dòoń ki kpántí puee kā u-ŋaan, úǹ di kpákatí bibɔtiibi ní ki tí kàantí-bi dibeel. Úǹ di tìì biciŋfitiibi iciin, ní ki tìì binyiliibi dinyil.

²²Úǹ di bìitī maamaaci bɔɔŋŋi pu. U nyí tin bál̀ dibɔmbɔndinee, ní ŋwalifi māntìi tú-u.

²³«Sii m-naanjab Nimbɔtiu, m jáaḿ-si ki nyɔ́ŋkí-si, di sá yii a tīī-mi iciin nì mpɔn, ní ki yāntì m ká kun ní ti mēē-see. A yāntì ti béè tin di páb́ ubɔtee.»

²⁴Niinee ní Daniyeel yíkìi nín cá Ariyɔɔki cee. Ariyɔɔki gbanti ní ubɔti nìn tīī mara yii ú kpɔ̀ Babiloon nyiliibee. Daniyeel bàn̄ u-ceeyee ní ki bí-u yii: «Taa kpɔ̀ Babiloon nyiliibi! Cáá-mi kí cùnnì ubɔti cee, m làá tùkù-u u-damintiiku taapu.»

²⁵Dicilpu dicilpu niin ní Ariyɔɔki yōoǹ Daniyeel ki cáa cūnnì ubɔti cee ki bí-u yii: «Ti-baa ubɔti, Juuda yab bin ti cúuń kuyuŋuee kansikin ubɔ ŋūǹ kí tùkù-si a-damintiikuee taapu.»

²⁶Ní ubɔti bālifì Daniyeel un bi gíti yíì yii Baltasaaree yii: «A lafun ŋūǹ kí tùkù-mi m nín dámintì puee nì an taapuɔɔɔ?»

²⁷Ní Daniyeel kíí-u yii: «Ubɔti, báà unyil àá ukpaŋkpanti àá ubɔɔ àá un kpèé iŋmalbijaa kí béé tin dòońee ubɔ kpá ki làá ŋmā kí lēē maamaaci bɔti tin pu a bíi sòoǹ nee taapu kí tùkù-si.

²⁸Ama Unimbɔti ubɔ bí yilpu ki bìitī abɔɔn pu. Ubɔti Neebukadineesaar, úǹ di nyántì tin bí ki dòoń fool boonee ki dàkā-si. Too, a nín dɔ̄ a-dooŋu pu ki gèeǹee, kpèè tin ní a dámintì ki kée sɔ̀.

²⁹Ubɔti, ŋyunti ŋun ní a dɔ̄ a-dooŋu puee ní a kíĺ ki bíi dàkafī tin làá dāá dāan̄ fool boonee pu. Niinee ní un bìitī abɔɔn puee lēē tin dòoń fool boonee ki dàkā-si.

³⁰Ama mamee, bi yaa bīitì abɔɔn gbanti pu ki dàkā-mee, an kaa dàkà yii m cáá iciin ki jítiǹ binib kɔkɔ, ama an sá yii ubɔ ń ŋmā kí tùkù-si a-damintiiku taapu, ní kí yàntī á béé kun di páb́ a-pɔbilee.

³¹Ubɔti, a pée bíi kpèéyee ní ki dāa ká unil naŋku kubɔ sí a-nimbiin. Kunaŋuee nìn sá kukpaaŋŋu, ki jìl̀ pàlpal ní ki cáá tifaandi.

³²Kunaŋuee yil nìn sá sindaariyamɔnti, ní ku-bindi nì ku-ŋalii sá animbil kúti, ní ku-pool nì ku-tapaŋŋi sá tasa kúti,

³³ní ku-taaŋi sá tikúti, ní ku-tafati dijandi sá tikúti ní dijandi din kíǹee sá kuyɔkɔu.

³⁴A pée bíi kpèé kunaŋuee ní ditaŋkpal diba nyánní dijool pu, ubɔ mun kaa gbēē-dì, ní dì dɔ́miń ki yá kunaŋuee tafati tin jandi diba sá tikúti, din kíǹee sá kuyɔkɔuee ki nàn̄-dì dúsi dusi.

³⁵Dicilpu niinee ní dì nàn̄ tikúti nì kuyɔkɔu nì tasa kúti nì animbil kúti nì sindaariyee dúsi dusi ní kubuŋu yōoǹ, a lì kii dipeel pu bi nín yaa bíi càatī idi dinaapaal pu kubuŋu yòontí tifeel puee[5], kaa yāntì báà tiba nì tiba. Ama ditaŋkpal din yá kunaŋuee díǹ kpántì dijookpaŋkpaandi ní ki jíń mpaan kitiŋ kɔkɔ pu.

³⁶«Ubɔti, kpèè a nín dámintì puee dee. Too, kɔŋkɔnnee kudamintiiuee taapu sɔ̀.

³⁷Ubɔti, sii di sá bibɔtiibi kɔkɔ kansikin ukpaan. Di sá yii yilpu Nimbɔtiu tīī-si dibeel nì mpɔn nì tinyool.

³⁸U dū binib nì ipeel nì inoon ki ŋá a-ŋaan laakin kamaa ní bi yaa kóòyee. Unimbɔti yāntì sii di cáá bi-kɔkɔ pu mpɔn. Sii di sá diyil din sá sindaariyee.

³⁹Sii boonee, dibeel din kaa cáá mpɔn kii a-yalee làá dāá nyā. Díǹ boonee dibeetataatiil diba mun làá dāá nyā kí nīn cáá kitiŋ kɔkɔ pu mpɔn. Díǹ di sá tasa kútee.

⁴⁰Míǹ boonee, dibeenanaatiil ń dāá nyā kí nīn pɔ̄ɔ̄ kpaŋkpam kii tikútee. Kii tikúti nín wìil̄ ki nà tiwan kɔkɔ dúsi dusi puee, míǹ ní dibeel gbanti làá dāá nà ŋin kɔkɔ péeǹ-dì ki nyáńee dúsi dusi.

⁴¹Kii a nín ká kunaŋuee tafati nì ku-taŋambiyaamu dijandi diba sá kuyɔkɔu din kíǹee sá tikúti puee, míǹ ní dibeelee làá dāá yàkatī. Di làá dāá nīn cáá tikúti pɔŋŋu kii a nín ká tikúti nì kuyɔkɔu ŋmālim̀ tɔbin puee.

⁴²Kii ntaŋambiyaamu dijandi diba di sá tikúti, din kíǹee sá kuyɔkɔu puee, míǹ ní dibeelee dijandi diba dāa pɔ̄ɔ̄ ní din kíǹee dāa pɔ̀fì.

⁴³A ká yii tikúti nì kuyɔkɔu ŋmālim̀ tɔbin. Bibɔtiibi làá dāá ŋá mpèé kí nīn cāab̀ tɔb biyaamu, ama mpèéyee kaa làá dāá nīn pɔ̄ɔ̄, a lì kii tikúti nì kuyɔkɔu nín kaa ŋūǹ kí ŋmàlim̀ kí kɔ́ tɔbin puee.

⁴⁴Bibɔtiibi gbanti yuntiŋuee, yilpu Nimbɔtiu làá dāá yàntī dibeel diba ń nyā. Dibeel gbanti pée kpá kí kúntí ní ditimbundi diba mun kaa dāa ŋūǹ kí já kí pɔ̄ɔkiǹ-dì. Dibeel gbanti di làá dāá nàan̄ ŋin kɔkɔ péeǹ-dì ki nyáńee ní kí kúntí-ŋi. Ama díǹ làá nīn bí ní jaanjaan.

⁴⁵Ditaŋkpal din a ká di nyáń dijool pu di-ba pu ubɔ kaa gbēē-dì, dì dɔ́miń ki nàn̄ tikúti nì tasa kúti nì kuyɔkɔu nì animbil kúti nì sindaariya dúsi dusee taapu dee. Ubɔti, Unimbɔtikpaan di nyántì tin bí nee ki dàkā-si á béé tin dòoń fool boonee. A-damintiiku nee sá tiŋman damintiiku ní, ní a ŋūǹ kí nīn máká m nín lēē ku-taapu miŋyee pu[6].»

⁴⁶Niinee ní ubɔti Neebukadineesaar tātìi gbāaǹ kitiŋ Daniyeel nimbiin ki tīī-u tinyool, ní ki tīī mara yii bí ŋá saraabi kí tūū talaalub bin sɔ́fèe kí tīī Daniyeel.

⁴⁷Ní ubɔti bí Daniyeel yii: «Ibaamɔn, ni-Nimbɔtiu di tɔ́kɔ́ inimbɔti kɔkɔ pu ní ki sá bibɔtiibi Dindaan ní ki bìitī abɔɔn pu, an pu ní a ŋúń ki lēē abɔɔn nee taapu ki tùkū-mi.»

⁴⁸Míǹ boonee ní ubɔti kāaǹ Daniyeel mpaaŋkpaan pu ní ki pú-u tiwan tikpil. U nìn dū-u ki kāaǹ ú nīn sá ukpikpaan Babiloon tiŋki kɔkɔ pu ní kí nīn sá Babiloon ciŋfitiibi kɔkɔ kpiliu.

⁴⁹Daniyeel nìn mēē ubɔti ú yàntī Sadraaki nì Meesaki nì Abeedi Neegoo ń kɔ́ Babiloon gɔminau poon kí nīn kpòotī kitiŋ. Daniyeel úǹ nìn bí dibeecindin ki tūǹ ditundi.