Read Ntcham Daniel (hébreu) 3 Bible Online

Daniel (hébreu) 3 - Ntcham bible

Daniel (hébreu) 3

¹Ubɔti Neebukadineesaar nìn yāntì bi máń sindaariya kumpool diba, di-fɔkɔŋŋu yilpu sá meetab mmuŋku nì saalaa ní di-waaŋŋu sá meetab bita. Babiloon tiŋgbaŋkin, Dura tantakalin ní u nìn yāntì bi máń-dì.

²Míǹ boonee ní u tú bí cù kí yíiń ntiŋgbamu kpilib nì Kɔmandambi nì ntiŋgbamu gɔminab nì akpambal nì binimbiŋubiliibi nì bibɔsoonliibi nì bimaramɔtiliibi nì ntiŋgbamu kàliŋkpilib bin kíǹee kɔkɔ bí dāan̄ kí jī dikumpoolee jiŋaaliu.

³Niinee ní ntiŋgbamu kpilib nì Kɔmandambi nì ntiŋgbamu gɔminab nì akpambal nì binimbiŋubiliibi nì bibɔsoonliibi nì bimaramɔtiliibi nì ntiŋgbamu kàliŋkpilib bin kíǹee kɔkɔ kóoǹ ki kpáfì ki yú dikumpool din ubɔti Neebukadineesaar yāntì bi máńee nimbiin kí jī di-jiŋaaliu.

⁴Ní un kpòotī jiŋaal tuuŋŋee téeń mpɔn yii: «Nimbi, anibul nì atimbun nì isoon kɔkɔ nib, bi nín síiǹ-ni mara uŋyee sɔ̀:

⁵<Ŋyunti ŋun ni yaa pée gbìl̄ ŋyin nì diwul nì kubeeu nì saŋgu nì túmba nì dikantándi nì tibɔɔkaal tin pée kíǹee kɔkɔ puee, ní gbàan̄ kitiŋ kí jāam̀ sindaariya kumpool din ubɔti Neebukadineesaar yāntì bi máńee.

⁶Un yaa yíì kaa gbāaǹ dikumpoolee nimbiin ki jáam̀-dèe, bi làá dū-u kí tɔ̄ niin niin kipaai kin poon ŋŋmi fòol̄ lìblib ki pɔ̄ɔ̄yee ni.>»

⁷Míǹ puee, ŋyunti ŋun anibul nì atimbun nì isoon nib kɔkɔ tin pée lì yii bi gbìl̀ bi bíi búǹ ŋyin nì diwul ki bɔ̀ɔ́ kubeeu nì saŋgu nì túmba nì tibɔɔkaal tin pée kíǹeeyee, bi tātìi gbāaǹ kitiŋ léelee ki bíi jáaḿ sindaariya kumpool din ubɔti Neebukadineesaar yāntì bi máń ki síiǹee.

⁸Míǹ boon kpalaayee ní Babiloon yab biba cūtìi nyáfì Juuda yab ubɔti cee.

⁹Bi tùkū ubɔti Neebukadineesaar yii: «Ubɔti, Unimbɔti ń tīī-si mmaŋfafɔkɔn!

¹⁰Ubɔti, sii di kaa síiǹ mara yii bi yaa bíi búǹ ŋyin nì diwul, ki bɔ̀ɔ́ kubeeu nì saŋgu nì túmba nì dikantándi nì tibɔɔkaal tin pée kíǹeeyee, unil kamaa ń gbàan̄ kí jāam̀ sindaariya kumpool neeee?

¹¹Ní ki gíti lī yii un yaa yíì kaa gbāaǹ ki jáam̀ dikumpoolee, bí dū udaan kí tɔ̄ kipaai ŋmiŋu ŋun poon ŋŋmi fòol̄ lìblib ki pɔ̄ɔ̄yee neeee?>

¹²Too ubɔti, Sadraaki nì Meesaki nì Abeedi Neegoo bin sá Juuda yab a dū-bi ki kɔ́ǹ Babiloon tiŋgbaŋki gɔminau poon bí nīn kpòotēe kaa fātìi tɔ́ gba yii a síiǹ mara. Kpèè, bíǹ kaa tòotī a-waaŋaaa, kaa jáaḿ sindaariya kumpool din a yāntì bi máń ki síiǹee mun.»

¹³Niinee ní Neebukadineesaar gíí diŋuul ŋkpitim pu. U nìn tīī mara yii bí cáań Sadraaki nì Meesaki nì Abeedi Neegoo u-nimbiin. Dicilpu niinee ní bi cūtìi cáań-bi ubɔti nimbiin.

¹⁴Ní ubɔti bālifì-bi yii: «Sadraaki nì Meesaki nì Abeedi Neegoo, mimmee an lafun sá tiŋman yii naa tòotī m-waaŋi, kaa jáaḿ sindaariya kumpool din m yāntì bi máń ki síiǹeeee?

¹⁵Ní bɔ́ntímaan ni-ba kɔŋkɔnnee, ŋyunti ŋun ni yaa gbìl̄ ŋyin nì diwul nì kubeeu nì saŋgu nì túmba nì dikantándi nì tibɔɔkaal tin pée kíǹee puee, ní gbàan̄ kí jāam̀ dikumpool din m máń nee. Ama ni yaa yíì kaa jáam̀-dèe, ataa pu doo ní bi làá dū-ni kí tɔ̄ kipaai kin poon ŋŋmi fòol̄ lìblib ki pɔ̄ɔ̄ nee poon. Ní m kpèé unimbɔti un di làá fōō-ni kí nyāntí m-ŋaanee?»

¹⁶Ní Sadraaki nì Meesaki nì Abeedi Neegoo kíí ubɔti Neebukadineesaar yii: «Ubɔti, an kaa bàlifī yii timbi ń kíí-si tibɔti nee poon tiba kí mɔ̄tì ti-ba pu.

¹⁷Ubɔti, bi yaa dū-ti ki tɔ́ kipaai kin poon ŋŋmi fòol̄ lìblib nee poonee, ti-Nimbɔtiu un ti jáaḿee làá fīī-ti ŋŋmee poon, ní kí fīī-ti kí nyāntí a-ŋaan.

¹⁸Báà u yaa kaa làá fīī-ti, ubɔti, á béé yii timbi kaa làá tòotī a-waaŋaaa, kaa làá gbàan̄ kí jāam̀ sindaariya kumpool din a yāntì bi máń ki síiǹ nee mun.»

¹⁹Niinee ní ubɔti Neebukadineesaar fōō Sadraaki nì Meesaki nì Abeedi Neegoo pu mbum ní u-nimbiin cúu kpántì. Ní u tīī mara bí mɔ̀tīí kpāā kipaayee poon ŋŋmi an píĺ ŋfunyɔm miluli pu kí jītíǹ an nìn kpààa píl̀ puee.

²⁰Ní u tīī u-janjaliibi bin cáá dikpabilee mara yii bí bóob́ Sadraaki nì Meesaki nì Abeedi Neegoo kí cáá tɔ̄ kipaayee poon.

²¹Niinee ní bi bóob́ bininjabee nì bi nín pée lōō bi-cukutib puee nì bi nín pēē bi-bɔkutiŋ nì bi-bɔkutipaaŋkaaŋi puee nì bi nín cíkí ŋfuulimu puee ki yōoǹ-bi ki cáa tɔ́ kipaai ŋmiŋu ŋun fòol̄ lìblibee poon.

²²Ubɔti marauee nín nìn pɔ̄ɔ̄ tikpil puee, bi nìn mɔ̄tìi kpāā ŋŋmi kipaayee poon ní an píĺ kpaŋkpam. Míǹ puee ŋyunti ŋun ní bijanjaliibee yōoǹ Sadraaki nì Meesaki nì Abeedi Neegoo kí cáá tɔ̄ kipaayee poonee, ní ŋŋmifaam wùn̄ ki kūū-bi.

²³Ama bi nín pée bóob́ Sadraaki nì Meesaki nì Abeedi Neegoo puee, míǹ ní bi bí ki cūtìi jéetì kipaai ŋmiŋu ŋun fòol̄ lìblibee poon.

²⁴Niinee ní tifaandi cúú ubɔti Neebukadineesaar ní u nyīī yíkì malaa ki bālifì u-kpambaliŋ yii: «An kaa sá binib bita ní ti yāntì bi bóob́ ki dūu tɔ́ ŋŋmi poonaaa?» Ní akpambalee kíí-u yii: «An sá míǹ, ti-baa ubɔti.»

²⁵Ní ubɔti fātìi bālifì yii: «Kin ba pu ní m wāĺ binib binaa còom̄ ŋŋmi poon tiba kaa bóob́-bi? Tiweendi tiba kaa bí bi-wunti pu, ní uninanaatee náań nì Unimbɔti biki.»

²⁶Niinee ní Neebukadineesaar sútìi pìl̄ kipaayee punyɔkɔ ní ki téeń yii: «Sadraaki nì Meesaki nì Abeedi Neegoo, Yilpu Fɔ́ŋŋŋ Nimbɔtiu tɔntɔnliibi, nyānnímaan kí dāan̄ doo.» Niinee ní Sadraaki nì Meesaki nì Abeedi Neegoo nyáń ŋŋmee poon.

²⁷Ní ntiŋgbamu kpilib nì Kɔmandambi nì ntiŋgbamu gɔminab nì ubɔti kpambaliŋ cīī ki kpèé-bi, ní ki dáań ki ká yii ŋŋmi kaa wùn̄ bi-wuntaaa, kaa wùn̄ bi-yikpitaaa, kaa wùn̄ bi-wampeeŋkaati mun, ní baa kpáàa gbìl̀ bi-pu ŋŋminyiim nunuŋu.

²⁸Niinee ní ubɔti Neebukadineesaar téeń yii: «Bí nyɔ̄ŋkì Sadraaki nì Meesaki nì Abeedi Neegoo Nimbɔtiu! Úǹ di túnní u-tuuŋŋu ní ŋu dɔ́miń ki fīī u-tɔntɔnliibi bin dū bi-mákal ki páaǹ u-pu kaa fātìi tɔ́ man ubɔti marabee. Bi kíí bí kpɔ̀-bi ki jítiǹ bí gbàan̄ kí jāam̀ diwaal diba, an yaa kaa sá bi-Nimbɔtiu baba.

²⁹Míǹ puee m síiǹ mara yii dinibul àá ditimbundi àá isoon in kamaa niliu di yaa sòon̄ ki bíil̀ Sadraaki nì Meesaki nì Abeedi Neegoo Nimbɔtiuee, m làá yàntī bí tɔ̀ntī udaan, ní kí kúntí u-dicaŋku kú kpántí adigbuŋkati. Di sá yii unimbɔti ubɔ gíti kpá ki ŋūǹ kí tīī difiil din bí nee juti.»

³⁰Míǹ boonee ní ubɔti mɔ̄tìi kāaǹ Sadraaki nì Meesaki nì Abeedi Neegoo ipaan in sá ikpaanee pu Babiloon tiŋgbaŋkin.

³¹Man ubɔti[7] Neebukadineesaar di cáá dinyɔɔbundi nee ki tùkù anibul nì atimbun nì isoon kɔkɔ nib bin bí kitiŋ kɔkɔ puee: «Ŋgbansɔŋfi ń nīn bí ni-cee!

³²«M ká yii an kítì ḿ yàntī ní béé atuŋkpaan nì maamaaci tuuŋŋi ŋin ní Yilpu Fɔ́ŋŋŋ Nimbɔtiu ŋá ki tīī-mee.

³³U-tuuŋŋi sá akpaaneeee! U-maamaacib cáá mpɔn ní! U-beel sá talku beel, ní u-bɔtiiti sá kí nīn cá jaanjaan!