Read Ntcham Daniel (hébreu) 4 Bible Online

Daniel (hébreu) 4 - Ntcham bible

Daniel (hébreu) 4

¹«Mama, Neebukadineesaar[8], m nìn bí m-beecindin nì mmɔn ní tiba nì tiba kaa nìn páb́-mi.

²Kunyeeu kubɔ, m dɔ̄ m-dooŋu pu ní ki dámintì kudamintiiu kubɔ. M nìn fāŋkì tikpil. Di sá yii tin m nìn kée nìn kɔ́ǹ-mi dinyoondi.

³M nìn yāntì bi cáań Babiloon ciŋfitiibi kɔkɔ m-nimbiin bí lēē kudamintiiuee taapu kí tùkù-mi.

⁴Ŋyunti ŋun ní bikpaŋkpantiibi nì bibɔɔbi nì bikpaŋkpalib nì bin kpèé iŋmalbijaa kí béé tin dòońee bāańee ní m dū m nín dámintì puee ki tùkū-bi, ama bi-kansikin ubɔ kaa ŋúń ki tùkū-mi kudamintiiuee taapu.

⁵Míǹ boon kpalaayee ní Daniyeel un bi nìn dū m-waal yindi ki pú bi kíǹ ki yíì-u Baltasaaree mun dɔ́miń. Uninja gbantee, inimbɔti in bí circiree fam nìn bí u-pu. Ní m kàan̄ m nín dámintì puee ki tùkū-u yii:

⁶<Baltasaar, bikpaŋkpantiibi kpiliu, m nyí yii inimbɔti in bí circiree fam bí a-pu ní tibɔbalkaal tiba kaa pɔ̄ɔ̄ a-cee. Tùkù-mi m nín dámintì ki ká tiŋyee taapu.

⁷M nín dɔ̄ m-dooŋu puee, m nín dámintì puee sɔ̀. M pée dɔ̄ m-dooŋu puee, m dāa bí yii ḿ kpèèyee, busukpaŋkpaambu bubɔ nyáń ki yúl̀ kitiŋ kansikin.

⁸Busubuee nìn mɔ̄tìi wíiǹ ki ŋá busukpaŋkpaambu ní bu-yilpu tūū kutagbɔŋu. Unil yaa nìn pée bí kitiŋ jandi diŋyee, u nìn ŋūǹ kí wāl̀ busubu gbanti.

⁹Bu-faati nìn cáá kunyaaŋŋu. Bu nìn lòoǹ abil tikpil, ki nìn ŋūǹ kí kpíiǹ binib kɔkɔ. Ipeel nìn dòoń ki dɔ̀ bu-booŋŋu taapu, ní inoon mun pāantí i-diti bu-paŋŋi pu. Tin kɔkɔ pée cáá kufoouee nìn kāntí bu-pu ti-jinti.

¹⁰«M dáá gbíntìi dɔ̄ m-dooŋu pu ki dàkafī tin m kée puee, m bí yii ḿ kpèèyee circir tuuŋŋu ŋubɔ dee. Ŋu nyánní yilpu ki kpákatìń

¹¹ní ki téeń mpɔn yii: <Gāāmaan busubuee kí lúkú, kpākal̀maan bu-paŋŋi, lòol̀maan bu-faati kí kàfì bu-biliŋ kí yàaǹ. Ipeel ń nyā bu-taapu kí sāǹ, ní inoon ń yīkì bu-paŋŋi.

¹²Ama ní yàntī busubuee nyeel nì bu-nyaaŋyi ń nīn gbíntìi síb́ kitiŋ. Ní nyàab̀ tikúti nì tasa kusakai kí tɔ̄ dinyeelee ní kí yàntī-dì kusaaun timool kansikin. Dimalindi ń sɔ̀ŋkì-dì ní dí nīn ŋmóò timool kii ipeelee.

¹³Di-pɔbil làá kpántí dí taa ti nín̄ cáá nnibimbim, ní dí nīn kíǹ ki cáá mpeebimbim! Míǹ boonee, dí nīn bí míǹ áli abin aluli.

¹⁴«Unimbɔti tuuŋyi in cí duulinyee di bíi lèekī tibɔti nee ki dàkà. Mimmee binib kɔkɔ làá béé yii Yilpu Fɔ́ŋŋŋ Nimbɔtiu di cáá binib beeŋi kɔkɔ pu mpɔn. Úǹ di kàantí un u yaa lèe dibeel ní ki yòontí unil un sīntiǹ u-ba taapuee yilpu.»

¹⁵Too kudamintiiu kun man, ubɔti Neebukadineesaar dámintèe dee. Kɔŋkɔnnee sii, Baltasaar, tùkù-mi ku-taapu. Di sá yii m-beel poon ciŋfitiibi báà ubɔ kaa ŋúń ki tùkū-mi ku-taapu. Ama siiyee, m nyí yii a ŋūǹ, kun puee inimbɔti in bí circiree fam bí a-pu.

¹⁶Niinee tifaandi cúú Daniyeel un bi páaǹ diyindi yii Baltasaaree u-wunti kpíì ŋyunti ŋubɔ poon ní u-landɔkɔi gátì. Ní ubɔti bí-u yii: «Baltasaar, taa yàntī kudamintiiuee nì ku-taapu ń fàaǹ-si.» Ní Baltasaar kíí-u yii: «Ubɔti, m bàà là yii kudamintiiu nee nì ku-taapu ń nīn sá ki tīī a-nannanliibi ní.

¹⁷A ká busubu bubɔ, ní bu wíiǹ ki ŋá busukpaambu ní bu-yilpu tūū kutagbɔŋu, ní binib ŋūǹ kí nīn wāĺ-bu ilaan kɔkɔ kitiŋ jaaŋŋi kɔkɔ pu.

¹⁸Busubu gbanti faati nìn cáá kunyaaŋŋu ki lòoǹ abil tikpil, ki nìn cáá tijin kí kpíiǹ binib kɔkɔ, ní ipeel nìn dòoń ki dɔ̀ bu-booŋŋu taapu, ní inoon mun nìn pāantí i-diti bu-paŋŋi pu.

¹⁹Busubu gbantee, ubɔti, an sá sii. Di sá yii a kpántì ukpaan nì mpɔndaan. A-yindi yíkì yilpu áli ki tin tūū kutagbɔŋu, ní a-bɔtiiti tālim̀ ki bàn̄ ilaan kɔkɔ.

²⁰Ubɔti, a gíti ká mun yii ituun in cí duulinyee kansikin ŋubɔ nyánní yilpu ki kpákatìń ki lī yii: <Gāāmaan busubuee kí bīil̀-bu! Ama ní yàntī bu-nyeel nì bu-nyaaŋyi ń nīn gbíntìi síb́ kitiŋ kusaaun timool kansikin. Ní dū tikúti nì tasa kusakai kí gbìn̄ dinyeelee. Dimalindi ń nīn sɔ̀ŋkī-dì ní dí nīn ŋmóò timool kii ipeelee áli abin aluli.>

²¹«Ubɔti, kpèè kudamintiiuee taapu sɔ̀. Yilpu fɔ́ŋŋŋ Nimbɔtiu di lēē tin làá bàń sii ubɔti maŋfal wiiŋyi puee ki dàkā-si.

²²Bi làá jà-si binib kansikin ní á nīn kóò ipeel kansikin. A làá dāá nīn ŋmóò timool kii unaayee ní ki nīn fùul̀ dimalindi. Án làá jītí a-pu míǹ áli abin aluli kí dāá sāā ŋyunti ŋun ní a làá dāá béé yii Yilpu Fɔ́ŋŋŋ Nimbɔtiu di cáá binib beeŋi kɔkɔ pu mpɔn ní un u yaa lèe ní u kàantí dibeelee.

²³Bi gíti tīī mara yii bí yàntī disunyeelee nì di-nyaaŋyi. An dàkà yii bi làá dāá fàtīí gíiǹ a-beel kí tīī-si ŋyunti ŋun ní a yaa láa béè yii Unimbɔti un bí yilpuee di sá tiwan kɔkɔ kpiliuee.

²⁴Míǹ puee, ubɔti, m pée gbàam̄-si ní, á pīlifì m-saŋkii. Fá a-kpitii nì a-yìntitam. Nín̄ ŋáań tin bí deedeeyee, kí nīn ŋáań biwɔfib tiŋan. An yaa yíì a làá nīn gbíntìi bí mmɔnni ki cá.»

²⁵Bi nín sòon̄ tin kɔkɔ làá bàń ubɔti Neebukadineesaar puee, míǹ ní an lafun jítì.

²⁶Iŋmal saalaa nì ili boonee, ubɔti nìn tɔ́kɔ́ ki còom̄ bi nín bɔ̀b̄ dibeecindi din bí Babiloon tiŋkinee yilpu.

²⁷U nìn téeń yii: «Babiloon kitiŋkpaaŋŋi kin m dū m-pɔŋkpaaŋŋu ki máń án nīn sá mama ubɔti beecindi kí dàkà m-kpaanti nyootee kaa nín sɔ̀ɔɔ?»

²⁸Ubɔti nyɔkɔ kaa láá ŋmíl̀ ní nneel ŋubɔ sòon̄ní yilpu ki lī yii: «Ubɔti Neebukadineesaar, pīlifì tibɔti nee: bi fōō dibeel a-ŋaan.

²⁹Bi làá jà-si binib kansikin ní a nì ipeel ń nīn kíǹ ki kóò, ní á nīn ŋmóò timool kii unaayee. Án làá jītí a-pu míǹ áli abin aluli kí cáá sāā ŋyunti ŋun ní a làá béé yii Yilpu Fɔ́ŋŋŋ Nimbɔtiu di cáá binib beeŋi kɔkɔ pu mpɔn ní un u yaa lèe, u kàantí dibeelee.»

³⁰Ataa pu niin ní tin bi sòon̄ yii án làá bàń Neebukadineesaar puee bāań-u. Bi jìn̄-u binib kansikin ní u kíĺ ki bíi ŋmóò timool kii unaayee. Dimalindi sɔ̄ŋkì u-wunti, ní u-yikpiti fɔ̄kɔǹ kii ikaabu kutee ní u-ŋaŋŋati mun fɔ̄kɔǹ kii inoon ŋaŋŋatee.

³¹Abin aluli gbanti boonee ní mama Neebukadineesaar, m wáaǹ ki kpēē yilpu ní ki fātìi ká nnilandɔkɔ. M nìn jáam̀ Yilpu Fɔ́ŋŋŋ Nimbɔtiu, ki nyɔ́ŋkì un bí talkuee ki tīī-u tinyool. U-bɔtiiti kaa cáá dikúntil ní u-beel bí kí nīn cá abin abin.

³²Kitiŋ pu nib kɔkɔ kaa sá tiba u-cee. U yaa là puee ní u ŋáań ki tìì bin bí yilpuee nì bin bí kitiŋ puee. Ubɔ kaa ŋūǹ kí cúú u-ŋal kí bàlifì-u yii: «Ba ní a ŋáańee?»

³³Ŋyunti gbantee ní m fātìi ká m-nilandɔkɔŋu. Bi nìn fātìi gíiǹ m-beel nyooti nì m-bɔtiiti jilmau nì m-pɔŋŋu ki tīī-mi. M-kpambaliŋ nì m-kàliŋkpaambi nìn nyàab̄-mi ní ki fātìi gíiǹ m-beel ki tīī-mi ní m gíti fōō tinyool ki jítiǹ mpeepeekaamin.

³⁴Kɔŋkɔnnee, mama Neebukadineesaar, m nyɔ́ŋkí ki dàntī ní ki pàkà yilpu bɔtiu! Tin kɔkɔ u ŋáańee kítì, ní u-tuuŋŋi kɔkɔ sá deedee tuuŋŋi. Úǹ di cáá mpɔn kí sìntī un yòontí u-ba yilpuee taapu.