Read Ntcham Daniel (hébreu) 5 Bible Online

Daniel (hébreu) 5 - Ntcham bible

Daniel (hébreu) 5

¹Dalbee, ubɔti Baltasaar ŋá jiŋaakpaan ubɔ ki yíiń u-kàliŋkpaambi binib kutuku, ní u kíĺ ki bíi nyù ndaam bi-nimbiin.

²Ŋyunti ŋun Baltasaar nyùn̄ ndaam an nyāatì-uee ní u tīī mara yii bí cù kí yòon̄ sindaariya nì animbil kúti kɔŋkɔnnyɔkaabi bin u-baa Neebukadineesaar nìn yōoǹní Jeerusaleem kunimbɔtidiinee kí cáań[9]. U nìn là u nì u-kàliŋkpaambi nì u-nimpoobi nì u-bɔmbi ń nīn bàtī ndaam ki ŋáań poon ki nyù.

³Niinee ní bi cūtìi cáań sindaariya kɔŋkɔnnyɔkaabi bin bi nìn yōoǹní kunimbɔtidiin Jeerusaleemee u nì u-kàliŋkpaambi nì u-nimpoobi nì u-bɔmbi bātì ndaam ki ŋá poon ki nyùn̄.

⁴Bi nyùn̄ ndaam míǹ ki dóòyee ní ki nyɔ́ŋkì awaa ŋin sá sindaariya nì animbil kúti nì tasa kúti nì tikúti nì idɔ nì ataŋkpeeyee.

⁵Bi bíi ŋáań míǹ kpalaayee, unil ŋaliŋu ŋubɔ nyáń ki kíĺ ki bíi ŋmà dibeecindi gundi pu laakin fitila nìn tɔ́kɔ́ ki ŋmíntée. Ubɔti nìn ká ŋŋalee nín nìn bíi ŋmà puee.

⁶Niinee ní ubɔti nimbiin cúu kpántì ní u-pɔbil bíil̀ ŋkpitim pu ní u-wunti kɔkɔ fōō dijinjikil ní u-tabiŋyiliŋ kíǹ ki gbáà tɔb kpàkpa.

⁷Ní ubɔti téeń mpɔn yii bí cáań bikpaŋkpantiibi nì bibɔɔbi nì bin kpèé iŋmalbijaa kí béé tin dòońee. Ŋyunti ŋun Babiloon ciŋfitiibi gbanti kɔkɔ kpáfèe ní ubɔti bí-bi yii: «Un yaa ŋúń ki kàan̄ tiŋmaŋmabiti nee ki lēē ti-taapu ki tùkū-mee, m làá yàntī bí dū dibeebɔkutil din máǹ cínciŋee kí pèen̄-u, kí dū sindaariya léeŋkaati kí léeń-u, ní udaan ń kūtì bikàliŋkpaambi pu bí nīn kpòotī dibeel.»

⁸Ubɔti ciŋfitiibi kɔkɔ kɔ́, ama baa ŋúń ki kàan̄ tiŋmaŋmabitee kpaŋkpan ki dāa nín lèekī ti-taapu ki tùkù ubɔti.

⁹An ŋá mimmee ní ubɔti Baltasaar pɔbil mɔ̄tìi bíil̀ ní u-nimbiin gíti cúu kpántì, ní an bākatì u-kàliŋkpilib sèeee, ní bi mun kaa ti nyí tin poon bi bée.

¹⁰Ubɔti na gbìl̄ ubɔti nì u-kàliŋkpilib biilii puee ní u kɔ́ kudii kun poon bi kā ki jīǹ jiŋaalee ki lī yii: «Ubɔti, Unimbɔti ń tīī-si mmaŋfafɔkɔn! Taa yàntī a-landɔkɔi ń bīil̀ a-pɔbil míǹ kí taa yàntī a-nimbiin ń cúú kpántí míǹ.

¹¹A-beel poonee, uninja ubɔ bí inimbɔti in bí circiree fam bí u-ni. A-baa yuntiŋuee, bi nìn dáań ki ká yii u wāĺ ki cáá dinyil nì iciin in náań nì awaa ciiŋyee. An puee ní a-baa, ubɔti Neebukadineesaar nìn dū-u ki kpántì bibɔɔbi nì bikpaŋkpantiibi nì bikpaŋkpalib nì bin kpèé iŋmalbijaa kí béé tin dòońee kɔkɔ kpiliu.

¹²Di sá yii Daniyeel gbanti un ní ubɔti nìn páaǹ diyindi yii Baltasaaree nìn cáá ŋfam min nyáń mi-bee nì dinyil nì iciin ní ki nìn ŋūǹ kí lēē tidamintiil taapu, ki nìn nyí ipɔɔn kɔkɔ taapu kí tùkù unil, ní ki nìn tí ŋūǹ kí lēē tibɔti tin pɔ̄ɔ̄yee taapu. Míǹ puee tɔ̄ bí yíiń Daniyeel gbanti, u làá tùkù-si tiŋmaŋmabiti nee taapu.»

¹³Niinee ní bi cūtìi cáań Daniyeel ubɔti nimbiin ní ubɔti bālifì-u yii: «Sii di lafun sá Daniyeel, Juuda yab yumbui in m-baa ubɔti nìn cáań Juuda tiŋkinee ubɔeeee?

¹⁴Di sá yii m gbìl̄ a-pu yii inimbɔti fam bí a-ni ní a wāĺ ki cáá dinyil nì iciin in nyáń i-bee.

¹⁵Bi dáá pée cáań-mi biciŋfitiibi nì bikpaŋkpantiibi bí bàà kàaǹ tiŋmaŋmabiti nee kí tùkù-mi taapu dee, ama baa ŋúń.

¹⁶Ní m gbìl̄ yii a ŋūǹ kí lēē ipɔɔn nì tibɔti tin pɔ̄ɔ̄yee taapu. Too, kɔŋkɔnnee, a yaa ŋúń ki kàan̄ tiŋmaŋmabiti nee ki lēē taapu ki tùkū-mee, m làá yàntī bí dū dibeebɔkutil din máǹ cínciŋee kí pèen̄-si, ní kí dū sindaariya léeŋkaati kí léeń-si, ní á kūtì bikàliŋkpaambi pu ní nīn kpòotī dibeel.»

¹⁷Niinee ní Daniyeel kíí ubɔti yii: «Ubɔti, yòon̄ a-wampɔkaati kí dū tipaal tin a bàà làá pà-mee kí tīī ubɔ. Nì míǹ kɔkɔee, m làá kàaǹ tiŋmaŋmabitee kí lēē taapu kí tùkù-si.

¹⁸Ti-baa ubɔti, Yilpu Fɔ́ŋŋŋ Nimbɔtiu nìn yāntì a-baa Neebukadineesaar kpántì ubɔtikpaan. U nìn cáá tinyool nì mpɔŋkpaan.

¹⁹Unimbɔti nín nìn yāntì u kpántì ukpaan miŋyee, anibul nì atimbun nì isoon kɔkɔ nib nìn fàŋkí ní yɔ́kɔ́ yɔkɔ u-nimbiin. Ubɔti yaa nìn là kí kpɔ̀ uŋyee u kù ní, ní un u yaa nìn tí là ú nīn bí dimaŋfalinee, ní ú yàntī udaan. U nìn yòontí un u yaa nìn là kí yòon̄ yilpuee, ní ki nìn sìntī un u yaa nìn là kí sìntī taapuee.

²⁰Ama ŋyunti ŋun u yōoǹ u-ba yilpu ki kɔ́ dilambilinee, bi nìn kpákatì-u u-beejal pu ní u fá u-nyooti.

²¹Bi jìn̄-u binib kansikin ní u kpántì kii upeelee. U nìn bí kumooun mammu kansikin, ní ki nìn ŋmóò timool kii unaayee. U nìn fùul̀ dimalindi ki cáa sāā ŋyunti ŋun u béè yii Yilpu Fɔ́ŋŋŋ Nimbɔtiu di cáá binib beeŋi kɔkɔ pu mpɔn, ní un u yaa lèe, u kàantí dibeelee.

²²Ní sii, u-jipɔɔn Baltasaar, min kamaa a nyí tíǹ gbanti kɔkɔee, aa sīntiǹ a-ba taapu,

²³ní ki yíkì kí já nì ti-Dindaan un bí yilpuee. A yāntì bi cūtìi cáań u-diiku poon kɔŋkɔnnyɔkaabi ní sii nì a-kàliŋkpaambi nì a-nimpoobi nì a-bɔmbi bātì ndaam ki ŋá poon ki nyùn̄. Míǹ boonee, a nyɔ́ŋkì awaa ŋin sá animbil kúti nì sindaariya nì tasa kúti nì tikúti nì idɔ nì ataŋkpeeyee, awaa ŋin kaa wāĺaaa, kaa gbìl̀aaa, kaa nyí tiba muee. A ŋá míǹ kaa nyɔ́ŋkì Unimbɔti un ŋaan ní a-maŋfal nì tin kɔkɔ ŋūǹ kí bàń-see kēe.

²⁴An pu ní Unimbɔti túnní ŋŋal nee ŋú dāan̄ kí ŋmà tiŋmaŋmabiti nee.

²⁵Tiŋmaŋmabiti tin bi ŋmàn̄ee sɔ̄: MEENEE, MEENEE, TEEKEEL nì PEEREESI.

²⁶Anyɔɔbun gbanti taapu sɔ̀: MEENEE, taapu di sá yii bi kàan̄ : Unimbɔti kàan̄ a-beel wiiŋyi ní ki kúntì-i.

²⁷TEEKEEL, taapu di sá yii bi ŋmāntì : Bi ŋmāntì-si saniya pu ní ki ká yii aa nyìm̀.

²⁸PEEREESI, taapu di sá yii bi yākatì : Unimbɔti cúú a-beel ki yākatì ki tīī Meedeesi nì Peeriisi yab.»

²⁹Niinee ní Baltasaar tīī mara yii bí dū dibeebɔkutil din máǹ cínciŋee kí pèen̄ Daniyeel, kí dū sindaariya léeŋkaati kí léeń-u ní kí bāakì yii Daniyeel làá kūtì bikàliŋkpaambi pu bí nīn kpòotī dibeel.

³⁰Kunyeeu gbanti ní bi kūū Baltasaar, Babiloon bɔtiu.