Read Ntcham Daniel (hébreu) 6 Bible Online

Daniel (hébreu) 6 - Ntcham bible

Daniel (hébreu) 6

¹Daariyusi un sá umeedijee[10] di nìn fōō dibeel. U nìn cáá abin imuŋku ita nì ali ní ki fōō dibeel.

²Daariyusi nìn ká yii an kítì ú kàan̄ ntiŋgbamu kpilib binib dilaataal nì mmuŋku bí nīn kpòotī kitiŋ kɔkɔ.

³U nìn gíti lēē bikàliŋkpilib bita bí nīn kpèé ntiŋgbamu kpilib nín kpòotī kitiŋ puee, án nín làá ŋá pu ubɔti tuuŋŋi ń nīn còom̄ tiŋanee. Daniyeel nìn sá bikàliŋkpilib bita gbanti kansikin ubɔ.

⁴Ama Daniyeel gbantee nìn jítiǹ bikàliŋkpilib bili bin kíǹee nì ntiŋgbamu kpilib kɔkɔ. Di sá yii ŋfam min nìn bí u-nee nyáń mi-ba, an pu ní ubɔti nìn bíi màkafī kí dū-u kí kàan̄ u-beel kɔkɔ pu ukpil.

⁵Niinee ní bikàliŋkpilibee nì ntiŋgbamu kpilib kíĺ ki bíi kpèé Daniyeel nín kpòotī kitiŋ puee, bi yaa bàà kāntí tikpitil tiba u-pu kí sòoǹ. Ama baa nìn ŋúń ki ká tikpitil tiba u-puɔɔɔ, kaa ti ká diyìntil diba mun u-pu kí sòoǹ. Di sá yii Daniyeel nìn bí deedee ní, an puee baa nìn pée ká báà tiba nì tiba u-pu kí kɔ̄kɔl̀-u.

⁶Niinee ní binibee dāa lī yii: «Tí dāá ká Daniyeel nee pu tiba kí sòoǹee, án làá nīn pɔ̄ɔ̄. Ti yaa pée là kí ká tiba u-pu kí sòoǹee, see tí dūú dī u-Nimbɔtiu marau pu.»

⁷Niinee ní bikàliŋkpilibee nì ntiŋgbamu kpilibee yíkì malaa ki nín cá ubɔti cee ki bí-u yii: «Ubɔti Daariyusi, Unimbɔti ń tīī-si mmaŋfafɔkɔn.

⁸Kitiŋ kàliŋkpilib kɔkɔ nì Kɔmandambi nì ntiŋgbamu kpilib nì akpambal nì gɔminab kpáfì ki ká yii ubɔti ń yóoń mara kí nyīī ŋŋal mara gbanti pu yii: <Kí yòon̄ díǹ kí cáá sāā iwiin mmuŋku nì saalaayee, ubɔ yaa gbāaǹ ki mēē diwaal àá unil ubɔ tiba ŋwimmeem poon ní an kaa sá sii ubɔtee, bí cáá udaan kí tɔ̄ mbòó ŋun poon bi kpàá gbikintibee.

⁹Míǹ puee, ubɔti, á ŋmà tibɔti nee kí nyīī ŋŋal bí taa ŋmā kí kpántí tiba nì tiba tibɔti gbanti poon, kii Meedeesi yab nì Peeriisi yab marab nín kaa ŋūǹ kí kpántí puee.»

¹⁰Niinee ní ubɔti Daariyusi nyīī maree pu ŋŋal.

¹¹Ŋyunti ŋun Daniyeel béè yii bi nyīī maree pu ŋŋalee ní u nín kóò u-diikun. U-diiku gbanti nìn sá aditɔntɔkɔ ní ki tɔ́kɔ́ yilpu, ki nìn cáá tɔkɔlab bin wāā ki bíitì Jeerusaleemee. Niin ní u nìn gbàantí u-tabiŋyiliŋ pu ki mèé ki nyɔ́ŋkí u-Nimbɔtiu ŋwiin kamaa ŋfunyɔm mita, kii u nín nìn pée kpààa ŋáań puee.

¹²Niinee ní binibee nóó dikitil ki bìl̄ ki kɔ́ Daniyeel pu ní ki ká-u u gbāā ki mèé ki gbàam̄ u-Nimbɔtiu.

¹³Bi ká mimmee ní ki nín cá ubɔti cee ki bí-u yii: «Ubɔti, an kaa sá sii di nyīī mara nee pu ŋŋal yii kí yòon̄ kí cáá sāā iwiin mmuŋku nì saalaayee, un yaa mēē diwaal àá unil ubɔ tiba ŋwimmeem poon ní an kaa sá siiyee, bí cáá udaan kí tɔ̄ mbòó ŋun poon bi kpàá gbikintibeeee?» Ní ubɔti kíí yii: «Míǹ deedee ní an sá, kii Meedeesi yab nì Peeriisi yab marau nín kaa kpántí puee.»

¹⁴Ní binibee fātìi bí ubɔti yii: «Toooo! Daniyeel un sá bin ti cáań Juuda tiŋkin kuyuŋuee kansikin ubɔee kaa fātìi tɔ́-si, ki dāa nín kàaǹ mara un pu a nyīī ŋŋalee. Kpèè, u pée mèé ní ŋfunyɔm mita ŋwiin.»

¹⁵Ubɔti nín gbìl̄ tibɔti gbantee ní an kɔ́ǹ-u kunimbaau ní u lēē u-pɔbilin kí fīī Daniyeel. U pée mɔ̀n̄ míǹ ní áli ŋwìiń dāa jéetì ki pée bíi nyàab̀ nsan ŋun pu u làá dī kí fīī-uee.

¹⁶Ama ní binibee fātìi gítìń malaa ubɔti cee ki bí-u yii: «Ubɔti, a pée nyí yii Meedeesi yab nì Peeriisi yab marau poonee, ubɔti yaa ŋmàn̄ mara ki nyīī ŋŋalee, baa ti ŋūǹ kí kpántí-u.»

¹⁷Niinee ní ubɔti tīī mara yii bí cáań Daniyeel kí dū-u kí tɔ̄ mbòó ŋun poon bi kpàá gbikintibee. Ní ubɔti bí Daniyeel yii: «See a-Nimbɔtiu un a jáaḿ kaa gbèentée baba di ŋūǹ kí fīī-si.»

¹⁸Bi nìn cáań ditaŋkpakpaandi diba ki pīiǹ mbòóyee nyɔkɔ pu ní ubɔti yōoǹ úǹ u-ba jaliiki nì u-kàliŋkpilib jaliiki ki nyīī ditaŋkpalee pu, án nín làá ŋá pu ubɔ ń taa ŋmā kí kpántí Daniyeel pu tibee.

¹⁹Ubɔti ŋá míǹ ki dóòyee ní ki nín kóò u-beecindin. Kunyeeu gbantee waa gèeǹaaa, kaa jíń tibaaa, kaa yāntì u-bɔmbi báà ubɔ mun kɔ́nní u-cee.

²⁰Ntaafaabɔmbɔminee ní ubɔti yíkì malaa ki nín cá mbòó ŋun poon bi kpàá gbikintibee.

²¹Ŋyunti ŋun u tóob́ kí bà mbòó laŋkee ní u yíiń Daniyeel nì kunimbaau poon yii: «Daniyeel, Unimbɔti un bí dimaŋfalinee tɔntɔnliu, a-Nimbɔtiu un ní a jáaḿ kaa gbèentée ŋúń ki fīī-si gbikintib ŋaanaaa?»

²²Ní Daniyeel kíí-u yii: «Ubɔti, Unimbɔti ń tīī-si mmaŋfafɔkɔn!

²³M-Nimbɔtiu túnní u-tuuŋŋu ní ŋu dɔ́miń ki pīiǹ gbikintib nyɔmmu ní baa ŋá-mi tiba. Di sá Unimbɔti ká yii m síl̀ nì u deedee kaa yīntiǹ-u tiba, ní kaa yīntiǹ sii, ubɔti mun tiba.»

²⁴Niinee ní an mɔ́ɔkiǹ ubɔti ní u tīī mara yii bí nyāntí Daniyeel mbòóyee poon. Ní bi nyántì Daniyeel mbòó poon, ama baa nìn ká u-pu báà tiweendi, di sá yii u nìn máká u-Nimbɔtiu pu.

²⁵Ní ubɔti yāntì bi cáań bin nìn kúŋfì Daniyeel boonee ki tɔ́ mbòó ŋun poon bi kpàá gbikintibee, ki kpáaǹ bi-biyaamu nì bi-nimpoobi. Bi tin pée lì yii bi dù-bi kí tɔ̄ee, baa bàn̄ kitiŋ ní gbikintib kíntì-bi ki tɔ̄ntì ki wīil̀ bi-kpabiŋ kɔkɔ.

²⁶Míǹ boonee ní ubɔti Daariyusi ŋmàn̄ kugbɔŋu ki tīī anibul nì atimbun nì isoon kɔkɔ nib bin kóò u-tiŋki kɔkɔ puee yii: «Ŋgbansɔŋfi ń nīn bí ni-cee.

²⁷«M tīī mara m-beel kɔkɔ poon yii báà ŋma ń nīn fàŋkí Daniyeel Nimbɔtiu ki nīn tɔ́-u. Di sá yii úǹ di sá Unimbɔti un bí dimaŋfalinee, ní ki bí talku. U-beel kaa bí kí bīil̀ dalba dalba, ní u-pɔŋŋu mun kpá kí kúntí jaanjaan.

²⁸Úǹ di jòoń unil ki fìil̄-u, u ŋáań maamaaci tuŋkpaaŋŋi yilpu nì kitiŋ pu. Úǹ di fīī Daniyeel ki nyántì gbikintib ŋaan.»

²⁹Míǹ boonee ní bi kāaǹ Daniyeel mpaaŋkpaan pu ŋyunti ŋun Daariyusi nìn kā dibeelee, ki kpáaǹ ŋyunti ŋun Peeriisi yab bɔtiu Siirusi mun dāa kāl̀ dibeelee[11].