Read Ntcham Daniel (hébreu) 7 Bible Online

Daniel (hébreu) 7 - Ntcham bible

Daniel (hébreu) 7

¹Babiloon bɔtiu Baltasaar nín kāl̀ dibeel dibimpeepeekaal poonee, Daniyeel dɔ̄ u-dooŋu puee, ki dámintì ní an lēē ki dàkā-u. Míǹ boonee ní u ŋmàn̄ u nín dámintì puee.

²Daniyeel nín lī puee sèé: «Kunyeeuee, ní an lēē ki dàkā-mi. M kpēēyee, ní ki ká kubuŋu nyánní yilpu jannaatiliŋ pu ki jītí tiŋkukpaan pu mpɔn.

³Ní tipeebilindi tinaa tiba nyánní tiŋkun. Tì nìn nyáń ti-ba ti-ba[12].

⁴Upeepeekaa náań nì gbikinti, ní ki cáá ukaabu feeŋyi. M bíi kpèé-uee ní bi cúú u-feeŋyi ki lēē ní ki yōoǹ-u kitiŋ ki síiǹ u-boon taaŋi alee pu kii unilee, ní bi tīī-u dinipɔbil ní u kíǹ ki cáá nnibimbim.

⁵M tí bí yii ḿ kpèèyee, upeeliliiti dee. Úǹ náań nì digbiŋgbil. Úǹ kaa nìn yáatì ki yúl̀. U nìn bàb̄ u-nyɔkɔn atakakalkpab ata u-nyiŋŋi kansikin. Ní bi tùkū-u yii: <Yīkìí yūĺ, ŋmɔ́ tinan tikpil.>

⁶Míǹ boon, m gbíntìi bíi kpèéyee ní ki ká upeel ubɔ mun. Upeel gbanti úǹ náań nì uguloobu ní u-boon cáá unoon feeŋyi inaa. Upeelee nìn gíti cáá ayil anaa ní bi dū mpɔn ki tīī-u[13].

⁷Míǹ boon m gbíntìi bíi kpèé an nín bí ki lèekī ki dàkà-mi kunyeeu puee. M bí yii ḿ kpèèyee, upeenanaati dee. Kupeebiliŋŋu dee ku-baba, ki cáá tifaandi ní ki pɔ̄ɔ̄ an kaa cáá bí lì. Upeelee cáá tinyiŋkpaandi tin sá tikútee ní ki ŋmóò ki tɔ̀ntī tin u yaa pée ká u-saŋŋu puee, ní ki tà ki ŋmàlintí tin kīntí waa ŋmɔ́ee. Upeel gbanti úǹ nìn pée nyáń u-ba nì ipeepeekaa itee ní, ní ki nìn cáá iyin saalaa[14].

⁸Ní m kíĺ ki bíi kpèé iyinee, m tí bí yii ḿ kpèèyee ŋyin kiwaai kiba cɔ́tìń in béeyee kansikin ní ki cúú ipeepeekaa gbantee kansikin ita ki fùkū. Ŋyin ŋun nyáń ki lúŋkì gbanti nìn cáá animbil kii unilee, ní ki cáá kinyɔkɔ kin sòoǹ tilambibɔti ŋmee[15].»

⁹«M bíi kpèé ŋyunti ŋun bi bíi sīintí abeejalee ní utikpil ubɔ dɔ́miń ki kāl̀ abeejalee diba pu. U-wampeeŋkaati nìn pīiǹ káŋkaŋ ní u-yikpiti mun pīiǹ kii ipii kuti[16] tin bi fíntèe. U-beejal nìn sá aŋmilimbil ŋma ní, ní ki nìn cáá ataa. Ataa gbanti mun nìn sá ŋŋmi ŋma ní.

¹⁰Mbun ŋun poon ŋŋmi pùub̀ee nìn jītí u-nimbiin. Binib kutukub kutukub nìn bí ki tūǹ ditundi ki tìì-u ní binib kutukub cutimaanyi nìn yú u-nimbiin. Niinee bibɔsoonliibi kāl̀ ní bi cúú tigbɔn ki kpátì[17].

¹¹«M nìn gbíntìi bíi kpèé, kun puee ŋyinee nìn bíi sòoǹ tilambibɔti ki ŋáań kuwoou. Ŋyunti ŋun m bíi kpèéyee ní ki ká bi kūū upeelee. Bi nìn dū u-wunti ki tɔ́ ŋŋmin án wà kí nàan̄.

¹²Ní bi cúú ipeel in kíǹee pɔŋyi ki fōō i-cee, ama ní ki yāntì i dáá bí dimaŋfalin kí cáá sāā ŋyunti ŋubɔ poon.

¹³«M gbíntìi bíi kpèé an nín bí ki lèekī pu ki dàkà-mi kunyeeuee. Kpalaayee tiwan tiba di páaǹní atagbanni ki dòoń ki náań nì unilee. U còom̄ ki cá utikpilee cee ní bi cáá-u ki cūnnì u-nimbiin[18].

¹⁴Ní bi dū dibeel nì tinyool nì mpɔn ki tīī-u. Niinee anibul kɔkɔ nì atimbun kɔkɔ nì isoon kɔkɔ nib gbāaǹ ki jáam̀-u. U-pɔŋŋu làá nīn bí ní ki cá jaanjaan, ŋu kpá kí kúntí. U-beel kpá kí nàan̄[19].»

¹⁵«Mama Daniyeel, kunimbaau nìn kɔ́-mi tikpil, ní an nín lēē ki dàkā-mi puee fàantí-mi.

¹⁶Ní m sútì ki pìl̄ bin sí niinee kansikin ubɔ ní ki gbāam̀-u ú tùkù-mi tin kɔkɔ m ká gbantee taapu nín baasii sá puee. Niinee ní u tùkū ki cántì-mi taapu yii:

¹⁷<Tipeebilindi tinaa gbanti sá bibɔtiibi binaa bin làá dāá nyā kí kàl̄ kitiŋ puee ní.

¹⁸Ama bi làá dāá dū dibeel kí tīī Yilpu Fɔ́ŋŋŋ Nimbɔtiu circir nib, ní bí dāá fōō-dì kí nīn cáa cá jaanjaan jaanjaan[20].>

¹⁹Míǹ boonee ní m nyàab̄ kí béé upeenanaatee nín baasii sá uŋyee. Upeel gbanti di nyáń u-ba nì bin kɔkɔ kíǹee. U cáá tifaandi tikpil, ki cáá anyin ŋin sá tikútee nì tiŋaŋŋati tin sá tasee, ní ki ŋmóò ki tɔ̀ntī tin u yaa pée kée ní ki tà tin kíǹee ki ŋmàlintí.

²⁰M gíti bālifì kí béé iyin saalaa in u tú u-yil puee nì ŋun mun gíti nyáń ki cúú iyin ita ki fùkū in béeyee kansikinee taapu. Ŋyin gbanti di cáá animbil, ki cáá kinyɔkɔ kin sòoǹ tilambibɔti, ki wíiǹ ki jítiǹ in kɔkɔ kíǹee.

²¹M bíi kpèéyee ní ki ká yii ŋyin gbanti bíi jáà nì circirdambi áli gba ŋu jáń ki pɔ́ɔkiǹ-bi[21].

²²Ama utikpilee nìn dɔ́miń ki pɔ̀n̄ Yilpu Fɔ́ŋŋŋ Nimbɔtiu circir nibul, ní ŋyunti bàn̄ ní circirdambi fōō dibeel[22].

²³«Niinee ní un m bàà bālifèe kíí-mi yii: <Upeenanaatee sá dibeenanaatiil din làá dāá nyā kitiŋ puee ní. Dibeel gbanti làá dāá nyā di-ba nì ŋin kɔkɔ kíǹee. Dì làá dāá ŋmɔ́ tin kɔkɔ bí kitiŋ puee, kí tāā tikɔkɔ kí ŋmàliŋkì ní kí tɔ̀ntī kɔkɔ.

²⁴Iyin saalaayee sá bibɔtiibi saalaa mun ní. Bi làá dāá kàl̄ dibeel gbanti ní ki fòol̄ tɔb. Bíǹ boonee, ubɔti ubɔ mun làá dāá kàl̄. Úǹ làá dāá nyā u-ba nì bipeepeekaabee ní kí dāá jà bibɔtiibi bita dibeejal pu[23].

²⁵U làá dāá sòoǹ Yilpu Fɔ́ŋŋŋ Nimbɔtiu tibɔfan, ní kí dāá wɔ́b́ Yilpu Fɔ́ŋŋŋ Nimbɔtiu circir nibul. U dāa màkantí gba kí kpántí jiŋaalib wiiŋyi nì marab, ní bí dāá dū circirdambi kí ŋá u-ŋaan abin ata nì dijandi[24].

²⁶Míǹ boonee ní ibɔsoon ń dāá kíĺ ní bí cúú u-beelee kí fōō u-ŋaan. Míǹ ní dibeel gbanti làá dāá nàan̄ kí céetí múb.

²⁷Ní bí dū abee ŋin kɔkɔ bí kitiŋ puee bɔtiiti nì ŋi-pɔŋyi nì ŋi-kpaanti kí tīī yilpu fɔ́ŋŋŋ Nimbɔtiu circir nibul. Bi-beel dāa sá talku beel ní, ní duulinya pɔŋyi kɔkɔ dāa kpántí bi-tɔntɔnliibi ní ki tɔ́-bi[25].>

²⁸«Tibɔtee nín kúntì laakiŋyee sɔ̀. Mama Daniyeel, m dākafì tibɔtee pu, ní an cúú-mi tifaandi tikpil, ní m-nimbiin cúu kpántì ní m dū tibɔtee ki kpáafì m-pɔbilin.»