Read Ntcham Daniel (hébreu) 8 Bible Online

Daniel (hébreu) 8 - Ntcham bible

Daniel (hébreu) 8

¹«An nín nìn lēē ki dàkā-mi mpeepeekaam puee, boonee ní an tí fātìi lēē ki dàkā mama Daniyeel, ubɔti Baltasaar nín jíń dibeel dibintataatiil poonee.

²M bíi kpèé an nín bíi lèekī pu ki dàkà-mee ní an ŋá-mi kii m bí Suusi tiŋkinee. Kitiŋ gbanti nìn bí Eelam tiŋgbaŋkin ní. M gbíntìi bíi kpèé an nín bíi lèekī pu ki dàkà-mee ní m gíti ká yii m yú Ulayii buŋŋu caŋin.

³M yáatì m-yil ki kpēēyee, upìja yú mbunee caŋin. Upìjee cáá iyin ili. Iyinee fɔ̀kɔ̀ ama ŋubɔ fɔ̀kɔǹ ŋun kíǹee ní ŋun fɔ̀kɔ̀ gbantee mun di nyáń ki lúŋkì.

⁴Míǹ boonee, m ká upìjee dū u-yiŋyi ki bìl̄ ki cūtì ŋwìiń jeetilaŋki pú nì ŋgan pú nì ŋgiil pú, ama báà upeel kaa ŋúń ki yúl̀ u-nimbiinaaa, ubɔ mun kaa ŋūǹ kí fōō u-juti u-ŋaan. U yaa là puee, míǹ ní u ŋáań ní ki mɔ̀tīi kāntí mpɔn ki cá.

⁵«Ŋyunti ŋun m pée bíi dàkafī tin m kée puee, kpalaayee uŋɔja ubɔ nyánní ŋwìiń nyalaŋki pú ki bāań. U nìn bíi yìiǹ kitiŋ kɔkɔ pu, ama ní u-taaŋi kaa gbèetī kitiŋ. Uŋɔja gbanti nìn cáá ŋyiŋkpaan ŋubɔ u-nimbiliŋ kansikin.

⁶U nìn nín cá upìja un cáá iyin ili m bàà ká u yú mbun caŋinee cee. U nìn sáǹ mpɔn ní ki nín cá u-cee.

⁷M ká u sáǹ ki tóob́ upìjee nín yú puee ní ki fōō mbum u-pu. U nìn gūū-u ní upìjee yiŋyi ilee cúu gíì. Upìjee kaa nìn ká mpɔn ki yúl̀ u-nimbiin. U nìn yōoǹ upìjee ki yá kitiŋ ki tàn̄ tàn̄. Ubɔ kaa nìn bí kí ŋmā kí fīī upìjee u-ŋaan.

⁸Uŋɔjee nìn mɔ̀tīi kāntí mpɔn ki cá. Ama ŋyunti ŋun u bàà ká mpɔn páaayee ní ŋyiŋkpaanee cúu gíì, ní iyiŋkpaan inaa nyáń ki téeǹ ŋun béeyee yil pu ki túĺ kitiŋ jannaatiliŋ.

⁹«Ní ŋyin ŋubɔ cɔ́tì iyinee kansikin ŋun sá kiwaayee pu ní ki fɔ̄kɔǹ ki túĺ ŋgiil pú nì ŋwìiń nyalaŋki pú nì kitinnyaaŋŋi[26] watil pú.

¹⁰Ní ŋu mɔ̄tìi wíiǹ ní ki yíkìi bíi jáà nì yilpu janjakitil. Ŋu nìn téé dijanjakitilee dijandi nì iŋmalbijaa ki lúkú kitiŋ ní ki tàn̄ tàn̄-bi[27].

¹¹Ŋu nìn yōoǹ ŋu-ba ki dūu ŋmāntiǹ dijanjakitilee kpiliu, ní ki kúntì saraa un bi ŋáań baabadalee ní ki kɔ́ǹ circir kɔŋkooŋŋu tijɔkɔndi[28].

¹²Atuŋkpiti gbanti puee, bi dū dijanjakitilee nì saraa un bi ŋáań baabadalee ki ŋá ŋu-ŋaan. Ŋyinee líì fookiimɔnti, ní tin kɔkɔ u ŋáańee bútí-u.

¹³«Niinee ní m gbìl̄ ntuun ŋubɔ bíi sòoǹ. Ní ntuun ŋubɔ mun bālifì-ŋu yii: <Tibɔti tin ní dileedakal nee sòoǹee làá yúntí kí cáá sāā ŋyunti ŋulɔŋu ní? Kí dāá sāā ŋyunti ŋulɔŋu ní saraabi bin bi ŋáań baabadalee làá gbèen̄ ní? Atuŋkpiti ŋin bíiĺ tikɔkɔee làá nīn bí kí cáá sāā ŋyunti ŋulɔŋu? Bi làá tāā tāā yilpu janjakitil nì circir kɔŋkooŋŋu kí cáá sāā ŋyunti ŋulɔŋu ní?>

¹⁴Ní ntuun mpeepeekaayee kíí-ŋu yii: <Kí cáá sāā iwiin kutukub bili nì alaataa ata kujoou nì kutaafaau. Míǹ boonee ní bí fàtīí ŋāŋkì circir paaŋŋu.>»

¹⁵«Ŋyunti ŋun mama Daniyeel, m bíi kpèé an nín lèekī pu ki dàkà-mi m nyàab̀ kí gbìl̄ taapuee ní ubɔ, u náań nì unil yam, dɔ́miń ki yúl̀ m-nimbiin[29].

¹⁶Ní m gbìl̄ unil ubɔ téeń Ulayii buŋŋu poon yii: <Gabriyeel, tùkù uninja nee dileedakal nee taapu.>

¹⁷Ní u nín dòoń laakin m sée. U tóobiń-mee ní m-pɔbil bíil̀ ní m tātìi dōoǹ kitiŋ dicincibil. Ní u tùkū-mi yii: <Nisaaleen, á béé yii dileedakal nee sá ŋyuntijoolkaa bɔti ní.>

¹⁸Ŋyunti ŋun u bíi sòoǹ nì mee, ní m fìkī ki gbíntìi dɔ̄ dicincibil. Ní u gbēē-mi ní ki yōoǹ-mi kí síiǹ m-taaŋi pu.

¹⁹Míǹ boonee ní u tùkū-mi yii: <M làá yàntī á béé tin làá dāá dāan̄ Unimbɔti ŋuul boonee, di sá yii bi síiǹ ŋyunti ŋun ní tikɔkɔ làá kúntée.

²⁰Upìja un a ká u cáá iyin ilee sá Meedeesi nì Peeriisi yab bɔtiibi ní.

²¹Uŋɔja un bàà cáá tikuti sùuuyee, Greesi bɔtiu dee. Ŋyiŋkpaan ŋun bí u-nimbiliŋ kansikinee, ubɔtipeekaa dee.

²²Ŋyinee nín gíìyee, inaa in nyáń ki téeǹ ŋu-yil puee sá abee anaa ŋin làá dāá nyā ditimbundee poonee ní, ama ŋaa làá dāá ká ŋu-pɔŋŋu juti.

²³Abee gbanti yaa láa kúntì ní binikpitib mun kpitii yaa láa wíiǹee, ubɔti un dāa cáá dilambil ki nyí diŋmatindee làá dāá nyā.

²⁴U-pɔŋŋu làá dāá nīn wīintí ní ki cá, ama mpɔnee kaa dāa nyēeń u-cee. U làá dāá ŋá asaluu tikpil ní tin kɔkɔ u dāa ŋáańee dāa bútí-u. U làá dāá kpɔ̀ kí céetí bipɔndambi nì circir nibul gba.

²⁵U nín dāa ŋūǹ ki yáb̀ puee, u làá dāá ŋmàtiǹ binib tikpil. U-lambil poonee, u làá dāá kpɔ̀ binib bin dàkafī yii bi bí ŋgbansɔŋfinee, ní kí dāá yīkì kí já nì abɔtibil kɔkɔ kpiliu. Ama ubɔ kaa làá dāá gbēē-u ní án nàan̄-u.

²⁶An yaa sá bi nín sòon̄ kujoou nì kutaafaau leedakal poon puee, an sá tiŋman ní. Siiyee, kpāafì dileedakal gbanti dibalin, kun puee dì sòoǹ ŋyunti ŋun dá láá dátèe pu ní.>

²⁷Niinee, mama Daniyeel, m-wunti kpíì ní m búŋkì iwiin kupaau. Míǹ boonee ní m yíkì ki bíi tūǹ ubɔti tundi. Dileedakalee bɔti nìn páb́-mi tikpil, di sá yii maa nìn gbìl̀ di-taapu.»