Read Ntcham Daniel (hébreu) 9 Bible Online

Daniel (hébreu) 9 - Ntcham bible

Daniel (hébreu) 9

¹Asuweerusi jipɔɔn Daariyusi, Umeedeesja un bi dūu kāaǹ Babiloon tiŋki pu dibeelee bimpeekaalee,

²mama Daniyeel, m nyàab̄ tigbɔn poon kí béé abin ŋin nyɔkɔm Jeerusaleem làá nīn gbíntìi sá adigbuŋkati, kii ti-Dindaan nín nìn sòon̄ nì u-bɔnaatiliu Yeereemii puee. An nìn nyáń abin imuŋku ita nì saalaa ní[30].

³Niinee ní m fātì m-nimbiin ki túĺ m-Dindaan Unimbɔti kí mèè-u. M nìn gbāam̀-u, ki bóob́ kinyɔkɔ, ki dū kutuku ki pēeǹ ní ki dū ŋfantam[31] ki pùkū m-yil.

⁴M nìn mēē ti-Dindaan m-Nimbɔtiu ní ki nìn bīitì ti-kpitii pu ki lī yii: «Áù, ti-Dindaan, Unimbɔti un sá ukpaan ki sá kuwambiiuee, a ŋúb̀ a-poondi din a pōoǹ bin ŋúb́ a-marabee, ki néeń bin néeń-see.

⁵Ti ŋá ikpiti, ti yīntì, ti ŋá tin kaa kítèe ki jáń nì si. Ti fātì ti-boon ki tīī a-marab nì a-bɔkpaaŋi.

⁶Taa pílifiǹ a-tɔntɔnliibi, a-bɔnaatiliibi. Bi sòon̄ ti-bɔtiibi nì ti-kpilib nì ti-baabi nì ti-tiŋki pu nib kɔkɔ a-yindi pu.

⁷Sii, ti-Dindaanee, a sá deedeedaan ní, ama timbee, icoo jíń-ti. Tiŋman, díǹ pu nee, icoo jíń Jeerusaleem yab nì Juuda tiŋkin yab, ki kpáaǹ Isirayeel yab bin pìl̄ee nì bin bí ndandatee kɔkɔ. Di sá yii ti-yab bí ntimu mun a jìn̄-bi bi yàl̄ ki cūtìi kɔ́ee tikpil poon, kun puee baa nìn yúl̀ nì si deedee.

⁸Ti-Dindaan, icoo jíń ti nì ti-bɔtiibi nì ti-kpilib nì ti-baabi, kun puee ti yīntiǹ-si.

⁹Ama sii ti-Dindaan ti-Nimbɔtiu poon mɔ̄ ní a pūǹ ti-kpitii, min kamaa ti yíkì ki jáń nì see.

¹⁰Taa pílifiǹ sii ti-Dindaan ti-Nimbɔtiu nyɔkɔ kí nóó a nín dī a-tɔntɔnliibi bibɔnaatiliibi pu ki tīī-ti marab biŋyee.

¹¹Isirayeel nibul kɔkɔ yīntì a-marau. Bi fātì bi-boon ki tīī-si kaa pílifiǹ-si. Ti yīntiǹ sii ti-Nimbɔtiu. Niinee mbusub bin kɔkɔ bi nìn ŋmàn̄ ki ŋá a-tɔntɔnliu Mooyiisi marabinee jéetì ti-pu[32].

¹²Unimbɔti, a yāntì tin a nìn pée sòon̄ yii án làá bàń ti nì ti-kpilib bin kpòotī-tee bāań. A yāntì nnaabukpaan jéetì ti-pu Jeerusaleem tiŋkin. Ubɔ kaa láá pée ká nnaabu gbanti juti kitiŋ pu doo laaba.

¹³Kii an nín pée ŋmàn̄ Mooyiisi marab poon puee, míǹ ní nnaabu nee jéetì ti-pu. Ama timbi kaa gbāam̀ sii ti-Dindaan ti-Nimbɔtiu yii á sɔ̀ŋkì a-pɔbil, tí bàà dū ti-kpitii kí fá kí nyàab̀ kí nīn nóó ibaamɔn.

¹⁴An pu ní sii ti-Dindaan yāntì nnaabu nee jéetì ti-pu, di sá yii sii ti-Dindaan ti-Nimbɔtiu bí deedee a-tuuŋŋi kɔkɔ poon ní, ama timbi kaa pílifiǹ-si.

¹⁵«Ti-Dindaan ti-Nimbɔtiu, a nín nìn dū a-pɔŋkpaaŋŋu ki nyántì a-nibul Eejipiti tiŋkinee, a nyáń diyindi ki dāa sāā díǹ. Ama ti ŋá ikpiti, ki ŋá tin kaa kítèe.

¹⁶Ti-Dindaan, a-deedeeu puee, páatí a-ŋuukpaandi Jeerusaleem, a-tiŋki, a-circir jool pu. Di sá yii ti-kpitii nì ti-baabi yìntitam puee, bin kɔkɔ māntìi tú-tee sìí Jeerusaleem nì a-nibul.

¹⁷Kɔŋkɔnnee, m-Nimbɔtiu, á pīlifì man a-tɔntɔnliu wimmeem nì u-gbaamii. Sii a-ba yindi puee, m-Dindaan, sɔ̄ a-circir kɔŋkooŋŋu ŋun bi bíil̀ee saai.

¹⁸M-Nimbɔtiu, kpòon̄ a-tafal kí pīlifì! Ŋúbití a-nimbiliŋ kí kpèè ti-tiŋki kin bi nāaǹ dúsi dusee, kitiŋ kin sá a-yakee nín bí tin poonee. Di sá yii ti yaa bíi gbàam̄-see, an kaa sá ti-deedeetuuŋŋi pu, ama an sá a-poon nín mɔ̄ tikpil puee pu.

¹⁹Ti-Dindaan, pīlifì-ti! Ti-Dindaan, dūú pɔ̄-ti! Ti-Dindaan, pīlifì soooo! A-yindi puee, m-Nimbɔtiu, jòoń a-tiŋki nì a-nibul.»

²⁰«M nìn gbíntìi bíi mèé m-kpitii nì m-nibul Isirayeel yab kpitii pu, ki gbàam̄ ti-Dindaan m-Nimbɔtiu ú sɔ̀ u-circir jool saai.

²¹Ŋyunti ŋun m gbíntìi bíi mèéyee, ntuun Gabriyeel[33] un m bàà pée ká dileedakal poonee, ŋàan̄ní malaa malaa ki bāań m-cee. An nìn sá ŋyunti ŋun bi ŋáań kujoou saraauee ní.

²²Ní ŋu sòon̄ nì mi ki bí-mi yii: <M dɔ́miń kí yàntī á ŋmā kí gbìl̄ tibɔti taapu ní.

²³Ŋyunti ŋun a kíĺ ki bíi gbàam̄ Unimbɔtee ní u sòon̄ tibɔti tiba ní m dɔ́miń kí dūú tùkù-si, di sá yii u néeń-si. Míǹ puee á gbìl̄ tin m làá tùkù-si nee tiŋan kí béé dileedakal nee taapu.

²⁴Bi síiǹ a-nibul nì a-circir tiŋki pu abin imuŋku ita nì saalaa miluli pu kí kúntí diyìntil. Ŋyunti gbanti làá yàntī ikpiti ń gbèen̄, án nín làá ŋá pu Unimbɔti ń dū ikpiti kí pɔ̄ee. Ŋyunti gbanti làá bà kí yàntī deedee un làá nīn bí jaanjaanee ń nyā kí páań mpaampiin pu, ní án ŋá kii aleedaka nì tibɔnaatikaal nín sòon̄ puee, ní bí fàtīí gíiǹ kunimbɔtidii circir páaa laŋki kí sú Unimbɔtee.

²⁵Á béé tin bí nee kí gbìl̄ ti-taapu tiŋan. Kí yòon̄ daliŋkin dinyɔɔbundi nyáń yii bin nìn bí kuyuŋunee ń fàtīí gítí kí mā Jeerusaleemee, kí cáá sāā ŋyunti ŋun ukpil un Unimbɔti lēēyee ń dāá nyēe, án làá nyā abin aluli miluli pu. Míǹ boonee, abin aluli imuŋku ita nì mili pu poonee, bi làá dāá fàtīí mā kitiŋee nì ki-guŋŋi kí tū, ama án làá dāá nīn sá iyunti in pɔ̄ɔ̄yee ní.

²⁶Abin imuŋku ita nì ali miluli pu boonee, bi làá dāá kpɔ̀ un Unimbɔti lēēyee, ama ubɔ kaa làá dāá mɔ̄tì u-pu. Míǹ boonee, ukpil ubɔ nì u-janjakitil làá dāan̄ kí nàan̄ kitiŋee nì ki-circir paaŋŋu. Ama Unimbɔti ŋuul làá dāá jēetí u-pu kí kúntí-u. Kí cáá sāā ŋyunti ŋun u làá kpúee, u làá nàan̄ tikɔkɔ kii an nín sòon̄ pu ki síiǹee.

²⁷Ukpilee làá dāá dū mpɔn kí ŋá mpèé nì binib tikpil abin aluli. Abin ata nì dijandee, u làá dāá kúntí tiwaŋkuti nì tijimpin saraabi. Unàanlee làá dāá tɔ̄ ntimbiil tuuŋŋi malaa kí cáá sāā ŋyunti ŋun án làá nàan̄ úǹ u-bee, kii an nín sòon̄ pu ki síiǹee.>»