Read Ntcham Bel et le Dragon 1 Bible Online

Bel et le Dragon 1 - Ntcham bible

Bel et le Dragon 1

¹Ubɔti Aastiiyaagi nín kpíì ki cūtìi ŋàl̄ u-baabee, upeersija Siirusi di fōō u-yil ki kpántì ubɔti.

²Daniyeel nìn sá ubɔti bɔɔmɔntiu ní ki nìn jítiǹ u-bɔɔbi kɔkɔ.

³Babiloon yab mun nìn cáá diwaal diba bi yíì-dì Beeli. Ŋwiin kamaayee, bi nìn tìì-dì ŋyim kiiloobi alaataa aŋmoo nì ipii imuŋku ili nì ndamam liitirib alaataa ali nì imuŋku ili nì saalaa nyɔkɔm.

⁴Ubɔti nìn tìì-dì disíndi ní ki nìn jáaḿ-dì. Daniyeel úǹ nìn jáaḿ u-Nimbɔtiu ní. Dalbee ní ubɔti bālifì-u yii: «Ba pu ní aa jáaḿ Beeli ní?»

⁵Ní Daniyeel kíí-u yii: «Kun puee maa jáaḿ awaa ŋin unil dū u-ŋal ki máńee, ama Unimbɔti un bí dimaŋfalin, ki náań kutagbɔŋu nì kitiŋ[1], ní ki cáá tiwan tin kɔkɔ cáá kufoouee pu mpɔnee ní m jáaḿ.»

⁶Ní ubɔti bí-u yii: «Mimmee a là kí lì yii Beeli kaa sá unimbɔti un bí dimaŋfalinee deeyaaa? Aa kāntí tin kɔkɔ u jīǹ ki nyù ŋwiin kamaayeeee?»

⁷Ní Daniyeel láń ní ki lī yii: «Ti-baa ubɔti, taa mɔ̄ntì a-ba! An sá kuyɔkɔu ní bi dū tasa kúti ki nyūntì ki bīiǹ[2]. Waa pée jíń ki nyùn̄ tiba ki ká jaanjaan.»

⁸Niinee ubɔti fōō mbum ní ki yíí u-saraaŋaliibi ki bí-bi yii: «Ni yaa kaa tùkū-mi un di jīǹ tin ti cāabìńee, ni làá kpú ní.

⁹Ama ni yaa ŋúń ki dàkā-mi yii Beeli nín jīǹ-tèe, Daniyeel di làá kpú, di sá yii u sòon̄ ki ŋèen̄ nì Beeli.» Ní Daniyeel bí ubɔti yii: «A nín lī puee, án ŋá míǹ!»

¹⁰Beeli saraaŋaliibi nìn bí binib imuŋku ita nì saalaa, ní kí nín kūtì binimpoobi nì mbiyaamu. Ubɔti nìn kpáaǹ Daniyeel ki cūnnì diwaal Beeli diikun.

¹¹Beeli saraaŋaliibi nìn lī yii: «Ti-baa ubɔti, kpèè ti làá nyā dee. Nyàab̀ tijin nì ndamam min bi bɔ́ntèe kí síiń kuwaadiin. Míǹ boonee á dū kipunyɔkɔ kí pìin̄ kí kpàl̄ ní kí dū a-jaliiki kí nyīī.

¹²Fool kutaafaau, a yaa fu dɔ́miń ní ki dáań ki ká yii diwaal Beeli kaa jíń tijin gbantee, á kpɔ̀-ti. Ama dì yaa fu dū tijin gbanti ki jíńee, Daniyeel di làá kpú, kun puee u mɔ́ntì.»

¹³Bisaraaŋaliibee nìn cáá bi-ba pu dimákal an kaa cáá bí lì, kun puee bi nìn gbìn̄ mbòó ní an tin nyáń teebil taapu kuwaadiin. An puee bi nìn pée ŋūǹ kí kɔ́ niin ŋyunti ŋun bi yaa nìn lèe kí yòon̄ tisaraajin tin bi nín̄ cáa tɔ̄kɔntí teebil puee.

¹⁴Ŋyunti ŋun bisaraaŋaliibee nyáńee ní ubɔti nyàab̄ saraa jinti ki síiǹ diwaal Beeli. Míǹ boonee ní Daniyeel tīī u-tɔntɔnliibi mara yii bí cáań ŋfantam. Bi cáańee ní bi dūu yāaǹ kuwaadiin. Ubɔti baba di nìn bí niin ki ká. Míǹ boonee ní bi-kɔkɔ nyáń ní bi dū kipunyɔkɔ ki pīiǹ ki kpàl̄ ní ki dū ubɔti jaliiki ki nyīī[3], ní ki búntì.

¹⁵Kunyeeuee ní bisaraaŋaliibee nì bi-nimpoobi nì bi-biyaamu dɔ́miń ki jíń ki nyùn̄, kii bi nín kpààa ŋáań puee.

¹⁶Kutaafaau pɔ̀lpɔlee ní ubɔti yíkìi cūtì kuwaadiin ki kpáaǹ Daniyeel.

¹⁷Niinee ní ubɔti bālifì yii: «Daniyeel, kijalii kin bi dūu nyīīyee dáá gbíntìi bí ki-laŋkaaa?» Ní Daniyeel kíí yii: «Ki dáá gbíntìi bí ki-laŋki, ti-baa ubɔti.»

¹⁸Ŋyunti ŋun bi pée pīitì kipunyɔkɔee, ubɔti kpēē teebil puee ní ki téeń mpɔn yii: «A sá ukpaaneeee! diwaal Beeli. Baa kāntí inaamuul a-ni!»

¹⁹Ama Daniyeel úǹ nìn kíĺ ki bíi lāā, ní ki pīiǹ nsan ubɔti ń taa kɔ́ poon ní ki bí yii: «Kpèè kudii taapu, a nyí bin yì ataa ŋin dɔ̄ neeee?»

²⁰Ní ubɔti bí yii: «M wāĺ bininjab nì binimpoobi nì mbiyaamu taaŋi!»

²¹Ní ubɔti fōō mbum ní ki yāntì bi cúú bisaraaŋaliibi nì bi-nimpoobi nì bi-biyaamu. Bisaraaŋaliibi dāa gīīyee ní ki dàkā-u nsan ŋun bi dì ki kóò ki jīǹ tijin tin bi cáa tɔ̄kɔntí teebil puee.

²²Niinee ní ubɔti yāntì bi kūū-bi, ní ki dū diwaal Beeli ki tīī Daniyeel, ní úǹ gbáń ki wīī[4] dì nì di-diiku.

²³Ukookpaan ubɔ mun nìn bí ní Babiloon yab nìn jáaḿ-u.

²⁴Ní ubɔti bí Daniyeel yii: «Aa ŋūǹ kí lì yii u nee úǹ kaa sá unimbɔti un bí dimaŋfalinee. Míǹ puee, gbàan̄ kí jāam̀-u!»

²⁵Ní Daniyeel bí yii: «Ti-Dindaan m-Nimbɔtiu baba ní m làá jāam̀[5], di sá yii úǹ baba di bí dimaŋfalin.

²⁶Ama ti-baa ubɔti yaa kíí, maa làá dū kitàataajiki àá ndɔ ní kí kpɔ̀ ukookpaan nee.» Ní ubɔti kíí yii: «Too, m pú-si nsan.»

²⁷Ní Daniyeel yōoǹ aŋɔ nì ŋkpam nì tikuti ki tɔ́kɔǹ dicilpu ki ŋá kalaabi ní ki dūu ŋá ukookpaanee nyɔkɔn. Ukookpaanee dūu ŋmɔ́ee ní ki lítìi kpíì. Ní Daniyeel bí yii: «Kpèèmaan kun ni jáaḿee!»

²⁸Babiloon yab nín gbìl̄ tibɔti gbantee ní bi gíí diŋuul ŋkpitim pu. Bi nìn kóoǹ ki múkúǹ ubɔti pu ní ki bí-u yii: «Ubɔti kpántì ujuudaja! U gbáń ki wīil̀ diwaal Beeli, ki kūū ukookpaan ní ki kūū ki céetì bisaraaŋaliibi.»

²⁹Míǹ boonee ní bi nín cá ubɔti cee ki bí-u yii: «Dū Daniyeel kí ŋá ti-ŋaan, an yaa kaa sá míǹ, ti làá kpɔ̀ sii a-ba nì a-dicaŋkun yab kɔkɔ.»

³⁰Ubɔti nín ká yii bi kā u-pu an kaa cáá tinaacinee, u là waa là, see u nín dū Daniyeel ki ŋá bi-ŋaanee.

³¹Babiloon yab nìn dū Daniyeel ki tɔ́ gbikintib bookun[6]. U nìn kāl̀ niin iwiin iluu ní.

³²Mbòó gbantinee, gbikintib biluli di nìn bí. Bi nìn tìì-bi ŋwiin kamaa anikpil ali nì apibil ali ní. Ama min bí neeyee, baa nìn tīī-bi tiba, án nín làá ŋá pu bí bàà cúú Daniyeel kí ŋmɔ́ee.

³³Unimbɔti bɔnaatiliu Abakuuki nìn bí Juudee tiŋkin. U nìn ŋá nnyuntum miba ki càkā kpɔnɔb ki ŋá disambil diban ki bàà cáǹ kí tīī bijincaliibi kusaau.

³⁴Ti-Dindaan tuuŋŋu nìn bí-u yii: «Yòon̄ tijin tin a tú nee kí cùnnì kí tīī Daniyeel. U bí Babiloon tiŋkin, gbikintib bookun.»

³⁵Ní Abakuuki bí yii: «Ti-Dindaan, maa cūtì Babiloon tiŋkin ki ká, kaa tí nyí mbòó gbanti mun.»

³⁶Ní ti-Dindaan tuuŋŋu cúú u-yikpiti, ki sáǹ malaa malaa ki jítiǹ kubuŋu pu ki cáá-u ki cūnnì Babiloon tiŋkin.

³⁷Abakuuki téeń ki lī yii: «Daniyeel! Daniyeel! Fōō tijin tin Unimbɔti cáań-see!»

³⁸Daniyeel bí yii: «Unimbɔti, a téetì m-puɔɔ! Aa dù bin néeń-see kí fá[7]!»

³⁹Ní Daniyeel kíĺ ki bíi jīǹ. Ŋyunti gbantee, ti-Dindaan tuuŋŋu kpáàa fātìi yōoǹ Abakuuki ki gíiǹ u-dumpu.

⁴⁰Iwiin iluli dalee, ubɔti dɔ́miń kí sɔ̄ Daniyeel kpool. U bāań ki kpēē kubòóu poonee, Daniyeel di kēe.

⁴¹Niinee ní ubɔti téeń mpɔn ki bí yii: «Ti-Dindaan, Daniyeel Nimbɔtiu, a sá ukpaaneeee! Aa cáá juti!»

⁴²Niinee ní u yāntì bi dáaĺ Daniyeel ki nyántì mbòó poon. Ama bin nìn nyàab̀ kí kpɔ̀ Daniyeelee, u nìn cúú-bi ki tɔ́ mbòó poon, ní gbikintib cúú-bi ki tɔ̄ntì niin niin niin u-nimbilin[8].