Read Ntcham Osée 1 Bible Online

Osée 1 - Ntcham bible

Osée 1

¹Ti-Dindaan nìn sòon̄ nì Beerii jipɔɔn Ooseeya iyunti in ní Oosiyasi nì Yootam nì Akaasi nì Eeseekiyaasi nìn kāl̀ kāl̀ Juuda beel pu dibeelee. Iyunti gbanti ibaanti poon ní Joowaasi jipɔɔn Jeerooboowaam mun nìn kāl̀ Isirayeel beel pu dibeel[1].

²Ti-Dindaan nín dī Ooseeya pu ki sòon̄ tibɔti tiŋyee sɔ̀. Ti-Dindaan nìn bí Ooseeya yii: «Cùú cáab́ kinimpulaakpaai ú màal̀-si kinimpulaakpaai biyaamu. Di sá yii kitiŋ nee nib cūtìi bíi jáaḿ awaa ki dū man bi-Dindaan ki fá kii kinimpulaakpaai nín féeń u-cal puee.»

³Niinee ní Ooseeya cáab́ Diibilayiim bisal Goomeer ní Goomeer cáá dipool ki màl̄-u kibininjabiki.

⁴Ní ti-Dindaan tùkū Ooseeya yii: «Pɔ̄ kibikee diyindi yii Jisirayeel, di sá yii an kaa ti làá yúntí, Jeewuu nín kūū binib bin Jisirayeel tantakalinee puee, m làá dáaĺ u-naantiibi tafal ní kí kúntí Isirayeel beel.

⁵Ŋwiin gbantee, m làá dāá kɔ̄fì Isirayeel tɔbu Jisirayeel tantakalin.»

⁶Ní Goomeer gíti cáá dipool ní ki màl̄ kibinimpubiki ní ti-Dindaan bí Ooseeya yii: «Pɔ̄ kibikee diyindi yii Loo Ruwama, taapu di sá yii, Baa Là-mi, di sá yii maa ti làá dàkà Isirayeel beel yab dineendi, maa ti làá nīn pée néeń-bi.

⁷Ama m làá nīn néeń Juuda yab. Man di sá bi-Dindaan bi-Nimbɔtiu, m làá fīī-bi, ama kaa sá nì butɔbu àá kitàataajiki àá tijanjawan tin kíǹee àá nì itaamu àá nì bitanjakaliibi.»

⁸Goomeer gíí Loo-Ruwama dibiil boonee ní ki tí cáá dipool ki màl̄ kibininjabiki.

⁹Ní ti-Dindaan bí Ooseeya yii: «Pɔ̄ kibikee diyindi yii Loo-Amii, an dàkà yii naa sá m-nibul. Di sá yii naa ti sá m-nibul ní ma mun kaa ti sá ni-Nimbɔtiu.»