Read Ntcham Osée 11 Bible Online

Osée 11 - Ntcham bible

Osée 11

¹«Ŋyunti ŋun Isirayeel nìn sá kibikee ní m nìn kíĺ ki néeń-u, ní ki yíiń úǹ, m-jipɔɔn ki nyántìń Eejipiti tiŋkin[27].»

²Ama míǹ boonee, m yaa gíti yíiń-uee, u kíǹ ki sáń-mi ní. Bi ŋáań saraabi ki tìì awaa ŋin bi yíì Baalee, ní ki tùutī talaalub ki tìì awaakpitikaa.

³Min kamaa man di ŋúb́ Eefiraayiim ŋalii, ki dātì-u tàatáa u cōom̀ee, waa béè gba yii man di lōō-u.

⁴Nì mpoommɔn nì dineendi ní m dūu kpēē-u. M nìn sá kii ubinaati nín yòontí u-biki kí nákań u-ba pu, kí bòon̄ kí tīī-kì dibiil kí ŋāam̀ puee ní.

⁵«Baa làá fàtīí gítí Eejipiti tiŋkin, ama Asuur yab di làá dāá nīn cáá bi-pu mpɔn, di sá yii bi yíì kaa fātìi gítìń m-cee.

⁶An pu ní kujaau tùm̀ bi-timmun dàii, ku bíiĺ bi-timmu punyɔmmu, ki làá kpɔ̀ kí céetí bin kóò mu-nee bi-saŋkpitii pu.

⁷M-nibul lafun lēē bi-pɔbilin kí dū-mi kí fá. Bi yíì-bi doooo yilpu, ama bi-kansikin báà ubɔ kaa yíkì.

⁸«Mana ní m ŋūǹ kí fàtī m-boon kí tīī-si ní, Eefiraayiim? Mana ní m ŋūǹ kí dū-si kí fá ní, Isirayeel? Mana ní m ŋūǹ kí ŋá-si kii m nín ŋá Adima tiŋki puee, àá kí ŋá-si kii m nín ŋá Seebooyiim tiŋki puee? M yaa ŋá míǹ, an làá páb́-mi tikpil. An gbí-mi isaa.

⁹Maa làá dū m-ŋuukpaandi kí tɔ̄ ditundi. Maa ti làá nàan̄ Eefiraayiim, di sá yii m sá Unimbɔti ní, maa sá unil. M sá circirdaan ní ki bí ni-kansikin, maa làá dāan̄ nì diŋuul poon.»

¹⁰Bi làá dāá páań ti-Dindaan boon. Ti-Dindaan làá dāá mùuǹ kii gbikintee. U yaa láa bíi mùuǹee, u-biyaamu làá dāá nyānní ŋwìiń jeetilaŋki pú bi-wunti gbáà kí dāan̄.

¹¹Bi làá dāá nyānní Eejipiti tiŋkin bi-wunti gbáà kpàkpa kii idiyaalee, ní kí dāá nyānní Asuur tiŋkin kii abeenanjilee. M làá dāá yàntī bí gítí bi-diiŋŋi poon. Ti-Dindaan di sòon̄.