Read Ntcham Osée 13 Bible Online

Osée 13 - Ntcham bible

Osée 13

¹Njaminee, Eefiraayiim yaa nìn sòoǹee, báà ŋma nìn fàŋkí ní. Isirayeel naakɔti kansikinee, úǹ di nìn līī. Ama u nóó diwaal Baal ki fōō dibɔkpil, ní ki kpíì an pu.

²Díǹ pu nee, bi dáá gbíntìi nìkì ki ŋáań ikpiti. Bi dūntì bi-nimbiliŋ ki dūu mɔ́ɔ́ awaa, awaa ŋin ní bíǹ bi-ba dākafì ki mɔ́ɔ́yee. An sá uwammɔ́ɔl tuuŋŋi aba ní, awaa gbanti pu ní bi lì yii: «Tí ŋámaan saraabi kí tīī-ŋi!» Binib móotí anabil ki ŋáań saraabi.

³An pu ní bi làá nīn bí kii ditaafaapɔ̀ńdee, a lì kii ditaafaamalindi nín wáŋkí pu malaayee. Bi làá nīn bí kii tifeel nín yíkí pu kí cù ndandati kí wàatī dibileenaapaal puee ní, àá kii ŋŋminyiim nín nyēē mbùń ŋubɔ poon puee ní.

⁴Doooo Eejipiti tiŋkin ní man sá a-Dindaan a-Nimbɔtiu. Aa ti nyí Unimbɔti ubɔ ki kútì man pu, ufiil ubɔ mun kaa ti bí laaba, asee man baba.

⁵Mamee, kuteeun, ŋweel tiŋkin ní m béè-si.

⁶A pée bàn̄ kunaakpaapɔɔunee ní a jíń ki díkí. Ama ŋyunti ŋun a jíń ki díkée ní a kɔ́ dilambilin[32]. An pu ní a súntì man pu.

⁷Niinee ní m kpántì kii gbikintee ki tīī-si, a lì kii ugbii un di náká nsan caŋin ki cée.

⁸M làá kpìl̄-si kii digbiŋgbil din ní bi cúú di-biyaamuee. M làá yā kí cátí a-bindi. M làá cúú-si kí tɔ̀ntī kii ugbikintinaatee dibɔbil pu niin, ní ipeel ń cúú-si kí tɔ̀ntī tɔ̀ntī.

⁹Kɔŋkɔnnee Isirayeel, an nāaǹ-si! Too, man baba di bàà ŋūǹ kí jòoń-si?

¹⁰A-bɔtiuee bí la ní kaa làá dāan̄ kí fīī-si a-timmu poon ní? A-kpootiliibee bí là ní? Ŋyuntee, a nìn bí-mi yii: <Tīī-mi ubɔti nì bikpootiliibi[33].>

¹¹Tiŋman m nìn tīī-si ubɔti m-ŋuul poon, ní ki fātìi fōō-u m-bum poon[34].

¹²M ŋmàn̄ Eefiraayiim yab yìntitam ki síiǹ. M dū bi-kpitii ki kpáafì tiŋan.

¹³Imatiŋween làá jēetí bi-pu. Ama kibikee sá kibigbaaŋŋi ní. Ŋyunti bàà bàn̄ dee, ama kì yíì kaa là kí nyā ki-na poon.

¹⁴Mimmee mama bi-Dindaan, m máaǹ kí dā-bi kí nyāntí ditaŋkpiil ŋaanaaa? Ḿ fīī-bi kí nyāntí ŋkúm ŋaanaaa? Too, ŋkúm, a-pɔŋŋu bí la? Too, ditaŋkpiil, a-looti bí la[35]? Disaasɔl nyáń m-nimbiliŋin.

¹⁵Min kamaa an bútì Eefiraayiim yab bi-nabiyaamu kansikinee, ŋwìiń nyalaŋki pú buŋku dòoń, ti-Dindaan buŋku làá nyānní kuteeu pú. Ku làá fáá nnyimbul pu ní ŋú fóotí ní dinyimbɔbil ń kpā, ní bí fūkul̀ laakin bi dū bi-gaajawammɔntiiti ki kpáafèe.