Read Ntcham Osée 4 Bible Online

Osée 4 - Ntcham bible

Osée 4

¹Isirayeel yab, pīlifìmaan ti-Dindaan bɔti, di sá yii ti-Dindaan bíi sòoǹ bin kóò kitiŋ nee puee bɔti. Kitiŋ nee puee, mbaamɔn gíti kpáaa, dineendi gíti kpáaa, bin nyí Unimbɔtee gíti kpá.

²Bi tòó tɔb mbusu, ki mɔ́ntí inyimɔn, ki kù binib, ki yù bunaayubu, ki ŋáań tilaakpaal, ki ŋáań tipɔmbɔti, ní ki cáá nnikpaakoon.

³An pu ní kitiŋ nee kɔkɔ làá kpā, ní bin kɔkɔ kóò ki-puee ń yɔ̀l̄, kí kpáaǹ ipeel nì inoon. Áli gba tiŋkun jɔmii làá céetí.

⁴Ama ubɔ ń taa kɔ̄kɔl̀ ubɔ, ubɔ ń taa wòoǹ u-juti. An sá man nì nimbi bisaraaŋaliibi di cáá tɔb tibɔti.

⁵Ni làá dāá gbéetí kuwiŋkaŋu pu, bibɔnaatiliibi mun làá gbéetí kunyeeu kii nimbee, ní ḿ kpɔ̀ ni-na Isirayeel.

⁶M-nibul kúù kun puee di lóò dinyil. Kii ni nín fātì ni-boon ki tīī dinyilee puee, ma mun làá fàtī m-boon kí tīī-ni ní naa ti làá nīn sá m-saraaŋaliibi. Ni súntì mama, ni-Nimbɔtiu marau puɔɔ! Ma mun làá súntí ni-jipɔmbi pu.

⁷Kii bisaraaŋaliibi nín būtì tikpil tikpil puee, míǹ ní bi yīntiǹ-mi mun. M làá yàntī tin nìn tìì-bi tinyoolee ń kpántí-bi ticoobɔti

⁸M-nibul nín ŋáań ikpiti pɔ̄tam saraabi biŋyee di kpīintí-bi. An pu ní bi tìì m-nibul kunyannyaau bí nīn mɔ̀tīi ŋáań ikpiti[7].

⁹Tin dɔ̄ ki cí bisaraaŋaliibee di dɔ̄ ki cí samaa un kíǹee. M làá dáaĺ bi-tafal bi-bimbikpitim pu, ní kí pà-bi bi-tuŋkpitiŋ paati.

¹⁰Bi làá jī kí gíti jī, ama ŋkùm làá nīn pée gbíntìi cáá-bi ní. Bi làá ŋá alaakpaatuun kí gíti ŋá, ama bi kpá kí ká mbiyaamu. Di sá yii bi dū man bi-Dindaan ki fá ki dū bi-ba ki líì nì alaakpaatuun.

¹¹Alaakpaatuun nì ndanyoon gábitì m-nibul yil.

¹²M-nibul bàlifī awaa ŋin sá idɔee ní bi-yil pu bɔti, ní mbɔɔkpandɔ tùkù-bi tin bi là kí bééyee. Di sá yii alaakpaatuun fam gáatì-bi. Bi dū bi-ba ki líì nì awaa, ki dū man bi-Nimbɔtiu ki fá.

¹³Ajoon yilpu kúntí kunti ní bi ŋáań bi-saraabi. Ŋgbantamu pu ní bi tùutī talaalub ki ŋáań saraa. Iwaasufi in bi yíì yii seeni nì peepiliiyee nì teereebintee taapu ní bi kàal̀, di sá yii i-booŋyi sɔ̀m̀. An pu ní ni-bisalib ŋáań alaakpaatuun ní ni-coopoobi nyēē bi-calib boon.

¹⁴Ama maa làá dáaĺ ni-bisalib tafal bi-laakpaatuuŋŋi pu, kaa làá dáaĺ ni-coopoobi tafal bi nín nyáń bi-calib boonee pu. Nimbi bisaraaŋaliibi tafal ní m làá dáaĺ, kun puee nimbi di nyāntí nnimpulaakpaamu ŋkpaanceeti ki dɔ̀ nì mu, ní ni nì nlaakpaamu mun bí awaadiinnee kpáfí ki jīǹ saraabi jinti. Kii dilaŋkpandi diba nín lī puee yii: <Dinibul din kaa cáá iciinee sá dinibul din wáŋkèe ní.>

¹⁵Báà nimbi Isirayeel beel yab yaa nyáń m-boonaaa, Juuda beel yab ń taa ŋá míǹ mbaantiim. Ní taa cùmaan Giilgaal circir paaŋŋu pu, kí taa cù Beeti Aween, kí taa tí pùtī kí lì yii: «Nì Unimbɔti un bí nee pu[8]!»

¹⁶Kii unapɔɔl nín bí puee, míǹ ní Isirayeel beel yab tafaliŋ pɔ̄ɔ̄. Mimmee, kɔŋkɔnnee ní ti-Dindaan làá nín ŋá u-nibul kii apibil ŋin bi cáǹ kupikpaaueeee?

¹⁷Eefiraayiim yab[9] nì awaa ŋá mpèé. Yàntī-bi.

¹⁸Bi yaa nyùn̄ ki gbée ní bí kɔ́ alaakpaatuun poon. Bi-kpootiliibi néeń tin kɔ̄ntí-bi icooyee ní.

¹⁹Kubuŋu làá dāá yòon̄-bi kí páań ku-feeŋyi pu, ní icoo ń dāá cúú-bi saraabi bin bi ŋáańee pu.