Read Ntcham Osée 7 Bible Online

Osée 7 - Ntcham bible

Osée 7

¹m yaa baa là kí cáaǹ Isirayeelee, ní Eefiraayiim yab kpitii nì Samaarii yab tuŋkpitiŋ ń nyā kí páań mpaampiin pu. Di sá yii bi kíiĺ tɔb, ní binaayub kóò adiinni ki yù, ní digaŋgam daan bí adan pu ki bìlim̄.

²Ama an kaa sòoǹ nì bi-pɔbiliŋin yii m téetí bi-kpitii in bi ŋáańee kɔkɔ pu. Kɔŋkɔnnee bi-kpitii gbanti di māntìi tú-bee. I dɔ̄ m-nimbiin ní baabadal.

³Bi cáá bi-tuŋkpitiŋ ki kɔ̀ntī ubɔti nimbiliŋ, ní ki cáá bi-nyimɔŋyi ki kɔ̀ntī bikàliŋkpilib yaŋ[16].

⁴Bi-kɔkɔ sá bilaakpaadambi ní. Bi náań nì dikpɔnɔbubul din píĺ kpaŋkpam ní ukpɔnɔŋal kaa ti bíi pàá án nyàtī kí cáá sāā ŋyunti ŋun ní bukpɔnɔsaa làá jɔ̄m̀ee ní.

⁵Ubɔti maaliwiiŋŋu jiŋaaliu dalee, abɔtibil nyù ndaam áli kí tin būŋkì. Ubɔti tàntī u-ŋal ki tìì bin bèel̄-uee kuboou.

⁶Di sá yii bi sútìń ki pìlìń-u ki tùm̀ kpaŋkpam kii kipaai ŋmiŋuee. Biibii di gbí bi-pɔbiliŋin. Kunyeeu kɔkɔee, bi-ŋuul dɔ̄ ki gèeǹ, ama kutaa yaa wúntèe, dì fòol̄ bìlbil kii ŋŋmikpaanee ní.

⁷Bi-kɔkɔ píĺ ní kpaŋkpam kii dikpɔnɔbubulee, bi kù ki céetí bi-kpootiliibi. Bi kpákatì bi-bɔtiibi kɔkɔ, ama bi-kansikin báà ubɔ mun kaa kúuǹ ki yíiń-mi.

⁸«Eefiraayiim dū u-ba ki ŋmālim̀ anibul ŋin kíǹee poon. U náań nì kalaa un bi tɔ́ kaa lábitèe ní.

⁹Binicambi fóofì u-pɔŋŋu, ní waa kpáàa nyí gba. Tiyikpipin nyáń u-yil pu ní waa kpáàa béè.

¹⁰Isirayeel beel yab badakal di lèekī bi-pu mmɔ́ɔn. Isirayeel beel yab kaa fātìi gítìń man bi-Dindaan bi-Nimbɔtiu cee. Min kamaa tin bí nee kɔkɔ jítèe, baa nyàab̄-mi.

¹¹Eefiraayiim sá kii dibeenanjil din kaa nyí tiba kaa dàkafēe ní. U yíì Eejipiti tiŋki ń dāá jòoń-u, ní ki sáń ki cá Asuur tiŋkin.

¹²Ama ŋyunti ŋun u tú ki lábití mimmee, ní ḿ dū m-laaŋku kí tɔ̄-u, ní kí cúuń-u kii bi nín cútí inoon puee. M làá dáaĺ u-tafal kii m nín sòon̄ pu bi-kpafil poonee.

¹³Mbusu dɔ̄ ki cí-bi, di sá yii bi sáǹ-mi! Án làá nàan̄-bi, di sá yii bi yíkìi bíi jáà nì mi! M bàà nyàab̄ kí fīī-bi dee, ama ní bi bí ki sòoǹ m-pu tinyimɔmbɔti!

¹⁴Baa kūuntí ki yíì-mi mbaamɔm, ama ní bi dɔ̄ bi-dooŋu pu ki yáliŋkí. Bi cáá njimu ki gífí bi-ba[17] kí ŋmā kí ká tijin nì ndaam. Baa nyí yii bi yaa bíi ŋáań mimmee, bi bíi jáà nì man dee.

¹⁵Man di kpōotì-bi ki tīī-bi mpɔn, ama nì míǹ kɔkɔee, bi dàkafī m-pu ilandɔkɔkpiti ŋma ní.

¹⁶Bi yaa gítìńaaa, an kaa sá man cee ní bi gítìń. Bi náań nì butɔbu bun gíì ki gbàkēe ní. Ama bi-kpilib nín sòoǹ ki bíiĺ-mi puee, kujaaun ní bi làá kpú, ní binib ń nīn bèel̄-bi Eejipiti tiŋkin.»