Read Ntcham Osée 8 Bible Online

Osée 8 - Ntcham bible

Osée 8

¹Búḿmaan ŋyin kí kpāafì binib! Kii ukaabu nín tòó puee, míǹ ní mbusu làá jēetí ti-Dindaan tiŋki pu. Di sá yii Isirayeel beel yab kaa tɔ́ m-poondi ní kaa yúl̀ deedee m-marab poon.

²Bi kūuntí fám ki lì yii: <Ti-Nimbɔtiu, timbi Isirayeel yab, ti nyí-si!>

³Isirayeel beel yab dū tin ŋān̄ee ki fá. An pu ní unannanli bíi jì-bi.

⁴Bi kāaǹ bi-bɔtiibi kaa bālifì m-pu. Bi lēē bi-kpilib kaa tùkū-mi. Bi dū bi-nimbiliŋ nì bi-sindaariyab ki mɔ́ɔ́ awaa ŋin làá nàan̄-bee.

⁵Samaarii yab, maa là m-nimbil ń ká ni-nabil[18]. Ni yāntì m gíí ni-pu diŋuul. Kí cáá sāā ŋyunti ŋulɔŋu ní m làá ká yii naa ti bí ikpitin?

⁶Ni-nabil gbantee nyánní Isirayeel beelin ní. Unil di máń-dì, dàa sá Unimbɔti. Tiŋman, Samaarii nabil gbanti làá nà ní dúsi dusi.

⁷Kii ni nín búĺ kubuŋuee, kubuŋkpaaŋŋu ní ni làá cā. <Didikakal yaa kaa cáá ŋfinee, ŋyim mun kpá dee.> Báà di yaa lòon̄aaa, binicambi di dāa yì kí jī.

⁸«Bi dū Isirayeel beel ki náĺ. Dì kíǹ ki bí atimbun kansikin kii kuyukpuŋuee ní.

⁹Di sá yii bi yíkìi cūtì Asuur tiŋkin, bi bí kii kumooun maŋki kin tú ki yìiǹ ki-babee ní. Eefiraayiim yab dá bibɔntiibi.

¹⁰Báà bi yaa yākatì tiwan ki pú atimbun ŋin kíǹee, ŋyunti bāań ḿ kóoǹ-bi kí kpāfì. Án kaa làá ti sūŋkì bi làá jī falaa abɔtibil bɔtiu ŋaan.

¹¹Eefiraayiim yab máń isaraafan tikpil kí nīn ŋáań ikpiti pɔ̄tam saraabi. - Ama isaraafan gbanti di yàntī bi mɔ̀tīi ŋáań ikpiti. -

¹²Báà m yaa ŋmàn̄ m-marab nee bɔkpaaŋi ŋfunyɔm kutuku pu, án làá nīn bí-bi kii tibɔcan tibee ní.

¹³Bi ŋáań saraabi ki tìì-mi, kun puee tinan ní bi nyàab̀ kí ŋmɔ́. Ama man bi-Dindaan, maa làá fōō saraabi gbanti. Too m làá téetí bi-yìntitam pu, m làá dáaĺ bi-tafal bi-kpitii pu. Bi làá fàtīí gítí Eejipiti tiŋkin.

¹⁴«Isirayeel beel yab máń adinyaan ní ki súntì bi-náanliu pu. Juuda beel yabee, bíǹ máń agun ní ki tú bi-timmu. Ama m làá yàntī ŋŋmi ń wà bi-timmu gbanti, ní kí wà bi-dinyaaŋŋi mun.»