Read Ntcham Osée 9 Bible Online

Osée 9 - Ntcham bible

Osée 9

¹Isirayeel, taa nín̄ fàal̀ kí lákatí mara pu kii atimbun ŋin kíǹee nín ŋáań puee. Di sá yii alaakpaatuun puee, a dū a-Nimbɔtiu ki fá, ki ŋá alaakpaatuun. A néeń kí fōō a-laakpaatuuŋŋi paati laakin kamaa ní bilee naapaaŋi bée.

²Bilee un bi gbáà dinaapaal puee nì ŋkpam min bi ŋmāam̀ kutaŋkpaboounee, aa làá ká. Ndapɔm min a kā ki cée, a kpá kí ká-mì kí dáká.

³Eefiraayiim yab kaa làá ŋmā kí nīn gbíntìi kóò ti-Dindaan tiŋkin. Bi làá fàtīí gítí Eejipiti tiŋkin, ní kí jī tijin tin bi kòóyee Asuur tiŋkin.

⁴Baa dāa gíti féeń ndaam kí ŋá ti-Dindaan saraa, bi-saraabi kaa làá dāá nīn fáatiǹ-u. Bi-jinti làá dāá kɔ́ tijɔkɔndi kii dikpoolin jintee, un kamaa yaa jíń-tèe kóò tijɔkɔndin ní. Bi làá dāá ká tijin kí jī kí díkí, ama baa dāa ŋūǹ kí kɔ́ǹ-tì ti-Dindaan diikun.

⁵Ni làá dāá ŋá mana dikpafil wiiŋŋu dal, ti-Dindaan jiŋaaliu wiiŋŋu dal?

⁶Ni yaa láa yíkì ni-tiŋki kin bi nāaǹee nee, Eejipiti tiŋki làá dāá fōō-ni, ama Meemifiisi tiŋkin ní bi làá dāá síb́-ni. Abɔjanaakun di làá dāá jī bi-gaajawammɔntiiti fakal, ní ikuŋkum ń dāá nyā bi-diiŋŋin.

⁷Ditafadaaldi yuntiŋu bāań dee, ŋyunti ŋun báà ŋma làá sòoǹ u-nyɔkɔpu yayee bāań[19]. Isirayeel beel yab máaǹ kí béé míǹ! Ni lì yii: «Ubɔnaatil nee wáatì ní, unil un pu Ŋfam bí nee yil lábitì.» Tiŋman, m yaa wáatèe, an sá ni-kpitii nín wīikí puee, nì ni nín bí ki jáà nì mi mpɔn nì mpɔnee pu.

⁸Man ubɔnaatil, man di sá un cí Eefiraayiimee, man nì m-Nimbɔtiu di bí. Ama binib pīil̀-mi titalindi laakin kamaa ní m yaa cée. Bi jáà nì mi áli m-Nimbɔtiu diikun.

⁹Bi pée kɔ́ ikpiti poon poon ní kábu, a lì kii bi nín nìn ŋá pu Giibeeya tiŋkinee[20]. Ama Unimbɔti kpá kí súntí bi-kpitii pu, asee u pée dáaĺ bi-tafal bi-kpitii gbanti pu.

¹⁰Ti-Dindaan lī yii: «Dooooyee, m nìn ká Isirayeel yab kii ɔliifi biliŋ ŋin bi kītì kuteeunee nín mɔ̄ puee ní. M nìn ká ni-naanjab kii difiigibipeepeekaal din bi kāntí bufiigisubu puee ní. Ama ni-naanjab nín nìn bāań Beeti-Peewɔɔree[21], bi nìn dū bi-ba ki líiǹ ticoobɔti. Bi ŋá mimmee ní m kíǹ ki ná-bi kii m nín ná diwaal din bi néeńee puee.

¹¹Eefiraayiim yab, kun tìì-ni tinyoolee làá yīkì kí ŋàaǹ kii unoonee ní. Binimpoobi kaa dāa gíti màal̀ mbiyaamuɔɔɔ, baa dāa gíti cāab̀ apooyaaa, mbiyaamu kaa dāa gíti nāantí bi-pooŋŋin.

¹²Báà bi yaa cáá mbiyaamu mu cíkitàaa, maa làá yàntī mú nīn bí kí kpántí binib. Ama m yaa fātì m-boon ki tīī-bi, dinimbinaamandi làá kɔ́-beeee!

¹³M wāĺ Eefiraayiim kii Tiir tiŋki kin nìn bí laakin timool múkú an sɔ̀m̀ fílfilee ní, nì míǹ kɔkɔee Eefiraayiim làá dāá dū u-biyaamu kí tīī bí kpɔ̀.»

¹⁴Ti-Dindaan, a yaa làá dáaĺ binib nee tafalee, ba ní a làá dūú dáaĺ ní? Yàntī bi-nimpoobi ń kpántí biŋmaŋŋmantiibi, bi-biiŋi ń fáká.

¹⁵Ti-Dindaan gíti bí yii: «Bi-tuŋkpitiŋ kɔkɔ kíĺ Giilgaal ní[22]. Niin ní m kíĺ ki kíǹ ki ná-bi. Ikpiti in ní bi ŋée puee, m làá jà-bi kí nyāntí m-diikun. Maa ti làá nīn néeń-bi. Bi-kpootiliibi kɔkɔ sá pɔɔgaatib ní.

¹⁶Bi gbáń Eefiraayiim yab an bàn̄-bi. Bi-nyaaŋyi kūń. Baa ti làá lòoǹ abil. Báà binimpoobi yaa dáá gbíntìi cáá mbiyaamuɔɔɔ, m làá fáá kí kpɔ̀ bi-poon naŋu biyaamu mun bi néeńee.»

¹⁷M-Nimbɔtiu làá dū-bi kí fá di sá yii baa pílifiǹ-u. Bi làá nīn kíǹ ki tú ki yìiǹ atimbun ŋin kíǹee kansikin ní.