Read Ntcham Joël 2 Bible Online

Joël 2 - Ntcham bible

Joël 2

¹Ní búḿmaan dikantándi Siiyɔn tiŋkin, kúum̀maan mpɔn m-circir jool pu. Kitiŋee pu nib kɔkɔ wunti ń fáá dijinjikil, di sá yii ti-Dindaan wiiŋŋu dòoń, ŋu tóobiń gba.

²Dibɔmbɔŋkpaandi wiiŋŋu dee ŋu-baba, atagbambɔn nì dipɔ̀ńdi wiiŋŋu dee. Inaaki janjakitil dòoń. I pɔ̄ɔ̄ ní ki wīikí bɔ̀m, a lì kii kunyeeu di mɔ́ ki bīiǹ ajoon puee. Baa láá pée ká míǹ ki ká ní ki pée gíti kpá kí ká míǹ jaanjaan kí nīn cáá cá abin abin.

³I-nyɔkɔpuee, ŋŋmi di wù, ní i-boon púee, aŋmilimbil nàantí. Kí wàatī í jītée, kitiŋ nìn sɔ̀m̀ kii Eedeen kpaabuee ní[2], ama i nín jítì ki dóòyee, an kpántì kii kuteeuee. Tiba nì tiba kaa ŋūǹ kí ŋmátí kí nyā i-ŋaan.

⁴I yaa páaǹnée, a lì kii itaamuee ní, ní i sáń kii bitanjakaliibee.

⁵I gà kuwoou kii janjatɔrɔkub di dàb̀ ki póotí ajoonee, a lì kii ŋŋmi di yaa wù timool, an pòol̄ puee. I dòoń kii dijanjakitil din pɔ̄ɔ̄ ki tātìi gbāaǹ dikɔ̀ndi puee.

⁶I yaa páaǹnée, anibul kɔkɔ kóò dinyoondin ní, ní ŋi-nimbiiŋyi ń cúú kpántí.

⁷I sáń kii bibaatandambee, ní ki dàb̀ agun kii bijanjaliibee. Báà ŋma pée túĺ u-saŋŋu ní cáaa ki cá, kaa kpèetī kí dī laaba pú.

⁸Ubɔ kaa pìkil̄ u-juti, di sá yii báà ŋma tàkā u-saŋŋu ní. Laakin aganlaka bée, niin ní bi cátí bi-saŋyi, ní tiba kaa ŋūǹ kí cúú-bi kí síiń.

⁹I gbáb̀ kí bìin̄ kitiŋ pu, ki tɔ̄kɔntí digundi din bi máń ki tú kitiŋee pu ki sáń, ní ki dìŋfī tɔkɔlabin ki kóò adiinni kii unaayuuyee.

¹⁰I yaa bāańee, kitiŋ cìŋkī ní, ní an bí kii kutagbɔŋu làá kìtī kí lítée. Uŋmal nì ŋwìiń kpántí dibɔmbɔndi, ní iŋmalbijaa kaa ti wāĺ.

¹¹Ti-Dindaan līī u-janjakitil nyɔkɔpu ki téeń. U-janjakitiŋ ŋin tɔ́ u-marabee wīikí tikpil ní ki pɔ̄ɔ̄. Di sá yii ti-Dindaan wiiŋŋu dal sá ŋwiŋkpaan ní, ŋwiinee nyāŋkì ní ŋma di dāa ŋūǹ kí ŋmátí?

¹²Ti-Dindaan bí yii: «Ŋyunti bāań ní fàtīí gítiń m-cee nì ni-pɔbil kɔkɔ. Bóob́maan kinyɔkɔ, kí sɔ̄maan ní kí gbàam̀-mi.

¹³An kaa sá ni-wampeeŋkaati ní ní cátí, ama an sá ni-pɔbiliŋ ní ní kpántí.» Fàtīí gítiḿmaan ti-Dindaan ni-Nimbɔtiu cee. U sá ulaŋŋaŋfiti ní u-poon mɔ̄, waa gífí diŋuul malaa, ama ní u-ŋanti wīikí tikpil, ní ki bɔ́ntì kí yàntī ditafadaaldi din pu u sòon̄ee.

¹⁴An yaa yíì, u ŋūǹ kí kpántí u-landɔkɔŋu ní kí bìin̄ ni-pu. Niinee, ni dāa ŋūǹ kí cáań tijimpin nì ndaam saraau kí tīī ti-Dindaan ni-Nimbɔtiu.

¹⁵Búḿmaan dikantándi Siiyɔn tiŋkin, bóob́maan kinyɔkɔ. Yíiḿmaan dikpafikpaandi.

¹⁶Yíiḿmaan samaa kɔkɔ bí kpāfì circir kpafil. Kpāfìmaan bitikpilib nì binipɔmbi, kí kpáaǹ mbipɔmu mun ŋáaḿee. Unimpucaan nì u-cal ń nyānní kunimpucandiin.

¹⁷Ti-Dindaan tɔntɔnliibi bisaraaŋaliibi ń yūĺ kunimbɔtidiin kipunyɔkɔ nì nsaraafan kansikin kí nīn sūǹ. Bí nīn lì yii: «Ti-Dindaan, sɔ̄ timbi a-nibul saai. Taa yàntī icoo ń cúú a-nibooliŋu. Taa yàntī anibul ŋin kíǹee ń nīn bèel̄-ti ki lì yii: <Bi-Nimbɔtiuee bí là?>»

¹⁸Ti-Dindaan cáá u-tiŋki pu dineeŋkpaandi, u súń u-nibul saai.

¹⁹U fōō u-nibul wimmeem ki bí-bi yii: «Too, m làá tīī-ni tijin nì ndamam nì ŋkpam. Ni làá dāá jī kí díkí. Kí yòon̄ díǹ kí nīn cée, maa ti làá dū-ni kí líiǹ atimbun ŋin kíǹee ŋí nīn bèel̄-ni.

²⁰M làá jà ni-nannanliibi bin nyánní ŋgan pú puee kí cùnnì kuteeu pu laakin kūńee. M làá jà bin līī nyɔkɔpuee kí tɔ̄ Ŋyaam mɔɔl poon, ní kí jà bin kíǹ ki pá boonee kí tɔ̄ Meediiteeranee tiŋkuun. Niin ní bijanjaliibi bin kpíìyee làá sūū kí nūukì, di sá yii bi ŋá-ni inikpiti tikpil.

²¹Sii kitiŋ, taa fàŋkì! Yàntī án nīn mɔ̄ǹ-si á nīn fàal̀, di sá yii ti-Dindaan túń atuŋkpaan.

²²Ipeel, ní taa fàŋkìmaan. Kuteeu pu mooti bíi túkù ki sɔ̀m̀ fílfil. Isufi bíi lòoǹ, ní fiigi nì fiinyi sufii mun lòon̄ sàka saka.

²³Nín̄ bímaan mmɔnni, Siiyɔn yab, nín̄ fàal̀maan ti-Dindaan ni-Nimbɔtiu pu, di sá yii u tīī-ni ukpaasiitaa kí fīī-ni. U yāntì ukpaasiitaa nì useetaa nìn̄ tiŋan kii dooooyee.

²⁴Tijimpin gbí dinaapaal pu, ní ndamam nì ŋkpam gbí tilɔn ki féeń.

²⁵M làá fàtīí téeǹ-ni ni-kpaajinti tin ní anaakitɔmbil nì inaakitoon nì inaakicaan nì inaaki dūu ŋmɔ́ee. Man di nìn dū dijanjakitil gbanti ki tɔ́ ni-pu.

²⁶Ni làá jī kí díkí, ní kí nyɔ̄ŋkì man ni-Dindaan ni-Nimbɔtiu un di túń atunnyaan ki tīī-nee. Icoo pée gíti kpá kí jī m-nibul jaanjaan.

²⁷Niin ní nimbi Isirayeel yab làá béé yii m bí ni-kansikin. Man di sá ni-Dindaan ni-Nimbɔtiu, ní maa cáá juti. Icoo pée gíti kpá kí jī m-nibul jaanjaan.»