Read Ntcham Amos 1 Bible Online

Amos 1 - Ntcham bible

Amos 1

¹Tibɔti tin Amoosi upikpaal un sá Teekoowa tiŋkinee sòon̄ee sɔ̀. Abin ali kí wàatī kitiŋ ń cìŋkèe, ti-Dindaan nìn lēē tin u làá sòoǹ Isirayeel beel puee bɔti ki dàkā-u. Ŋyunti gbantee, Oosiyasi di nìn sá Juuda tiŋki bɔtiu ní Joowaasi jipɔɔn Jeerooboowaam nìn sá Isirayeel tiŋki bɔtiu.

²Amoosi nìn lī yii: «Ti-Dindaan téeń mpɔn doooo Siiyɔn jool pu, u yāntì bi gbìl̄ u-nyɔkɔ pu doooo Jeerusaleem. Niinee kupikpaau mooti fáaḿ, ní Kaarmeel jool pu mooti kūń.»

³Ti-Dindaan nín lī puee sèé: «Damaasi yab ŋá ikpiti tikpil, bi gíti ŋá an jítì mara pu. An puee m nín pée síiǹ kí ŋá puee, míǹ ní m làá ŋá. Bi dū apinjal ŋin inaa dátí ki kpátí atannaapikee ki nàn̄ Galaadi yab.

⁴An puee m làá sēē Asayeel beecindi ŋŋmi, Been-Adaadi beecindi làá wà kí lítí[1].

⁵M làá wīī Damaasi tiŋki punyɔkɔki kpàlkaati. M làá kúntí ikpiti tantakal tiŋki bɔtiu, nì un kā mmɔn tiŋki pu dibeelee, ní kí yàntī bí cúú Aram yab kí cùnnì Kiiri tiŋkin kuyuŋu.» Ti-Dindaan di lī míǹ.

⁶Ti-Dindaan nín lī puee sèé: «Gaasaa yab ŋá ikpiti tikpil, bi gíti ŋá an jítì mara pu. An puee m nín pée síiǹ kí ŋá puee, míǹ ní m làá ŋá. Bi cáá ditimbummɔndi nib ki nyáfiǹ Eedoom tiŋkin yab.

⁷M làá sēē Gaasaa tiŋki gundi ŋŋmi, ní ki-beeciŋŋi ń wà kí lítí.

⁸M làá kúntí Asidoodi tiŋki bɔtiu, nì un sá Asikeelɔn tiŋki bɔtiuee. M làá dū m-ba kí bíití Eekrɔn yab, kí yàntī Fiiliistii yab ń kúntí.» Ti-Dindaan Unimbɔti di lī míǹ.

⁹Ti-Dindaan nín lī puee sèé: «Tiir yab ŋá ikpiti tikpil, bi gíti ŋá an jítì mara pu. An puee m nín pée síiǹ kí ŋá puee, míǹ ní m làá ŋá. Bi cáá ditimbummɔndi nib ki nyáfiǹ Eedoom tiŋki yab, kun puee baa dū kunabitiiu poondi ki yíiń tiba.

¹⁰M làá sēē Tiir tiŋki ŋŋmi, ní ki-beeciŋŋi ń wà kí lítí.»

¹¹Ti-Dindaan nín lī puee sèé: «Eedoom yab ŋá ikpiti tikpil, bi gíti ŋá an jítì mara pu. An puee m nín pée síiǹ kí ŋá puee, míǹ ní m làá ŋá. Bi kùl̄ ki bīiǹ bi-nabiyaamu Isirayeel yab boon nì ntàataajimu. Baa pée súń bi-saai báà fiii. Bi fōō mbum an kaa kúntí, bi-ŋuul kaa cáá yii an sɔ̄ŋkì.

¹²M làá sēē Teeman tiŋki ŋŋmi, ní Bɔsiraa beeciŋŋi ń wà kí lítí.»

¹³Ti-Dindaan nín lī puee sèé: «Amɔn yab ŋá ikpiti tikpil, bi gíti ŋá an jítì mara pu. An puee m nín pée síiǹ kí ŋá puee, míǹ ní m làá ŋá. Kun puee bi pūtì Galaadi tiŋkin pɔdambi kí ŋmā kí wàan̄ bi-tiŋki.

¹⁴M làá sēē Raaba tiŋki gundi ŋŋmi, ní ki-beeciŋŋi ń wà kí lítí. An dāa sá ikuŋkuunti nì kujaau wiiŋŋu dal, utaa nì kubuŋkpaaŋŋu kun pɔ̄ɔ̄yee wiiŋŋu ní.

¹⁵Bi làá dāá cúú bi-bɔtiu, kí kpáaǹ u-kàliŋkpilib kí cùnnì kuyuŋu.» Ti-Dindaan di lī míǹ.